آئی کیمپ

اقتدارجاوید

سوسائٹی فار پریوینشن آف بلائنڈنیس اینڈ کیور والے حیران سن کہ پچھلے لگاتار 23 ورھیاں توں بادشاہ پور وچ لگن والے آئی کیمپ دا کوئی اکھ دا اک اپریشن وی نکام نہیں ہویا نہ کسے مریض دی بینائی دا کوئی مسئلہ پیش آیا۔ حیرت اے نہیں تے کیمپ سرجری وچ کوئی نہ کوئی مسئلہ ضرور پیش آندا اے۔ ایہ اللہ دا خاص کرم ای تے ہے۔ کیہ ایہ کیمپ انتظامیہ دے بے لوث ہون دا نتیجہ اے یاں ایس کامیاب کیمپ دے پچھے کوئی خاص حکمت عملی اے۔ اودوں اوہناں نوں دسیا گیا ایہ کیمپ بادشاہ پور ویلفیئر آرگنائزیشن ولوں لگدا اے ایہ این جی او کسے قسم دی امداد دی طالب تے کیہ روادار وی نہیں۔ ایہ پنڈ والیاں دی مشترکہ محبت سی ہن مشترکہ میراث اے۔ ایہ کیمپ اپنی مدد آپ دے تحت لگدا اے۔ غریباں‘ بے آسرا تے نادار لوکاں لئی لایا جاندا اے جتھے نہ صرف عدسے مفت لائے جاندے نیں سگوں تن روزہ کیمپ دوران سارے مریضاں تے اوہناں دے وارثاں دے کھان پین توں علاوہ اوہناں دے مفت قیام دا وی انتظام کیتا جاندا اے۔ ایہ کیمپ بادشاہ پور وچ ہر ورھے لگدا اے۔ ایہ اک غربت دی پٹی اے جو دریائے جہلم تے دریائے چناب دے وچکار سینکڑوں پنڈاں تے کھلری ہوئی اے اوتھوں دے نادار لوکاں لئی ایہ آئی کیمپ لایا جاندا اے۔ ہن تک ایس سالانہ آئی کیمپ وچ تن ہزار توں ودھ لوکاں دی بینائی واپس آئی اے۔ ایہ اک فلاحی سرگرمی اے جہنوں ہن پورے بادشاہ پور نے اون کر لیا اے۔
بادشاہ پور ویلفیئر سوسائٹی تے ویلفیئر کمیٹی محمداشرف گوندل ایڈووکیٹ تے اوہناں دے ساتھیاں دے تعاون دی اجہی مثال گھٹ ای ویکھن نوں ملدی اے۔ لہور تے بادشاہ پور ضلع منڈی بہائوالدین دے وچکار تن سو کلومیٹر دا سفر اے۔ لوڈر دے ڈرائیورز‘ ڈاکٹرز‘ اوہناں دے امدادی عملہ تے سارے آن والے مریضاں دے کھان پین دا پربندھ وی کرنا ہوندا اے ایہدے وچ لوکل تے ایتھے لہور دی سطح تے دو ٹیماں نوں کئی دن پہلے ای متحرک ہونا پیندا اے۔ ایس ابتدائی تیاری توں پہلاں آئی کیمپ دے پربندھ لئی باقاعدہ تریخ دی دستیابی دے بعد اک مرحلہ ملک دے مایہ ناز آئی سرجن تے میوہسپتال دے چیف ایگزیکٹو ڈاکٹر اسداسلم کمال محبت تے شفقت نال اوتھے اپریشن کرن والے ڈاکٹراں دی ڈیوٹی لانی ہوندی اے تاں جے اپریشن تے آئی کیمپ دے دن کسے قسم دی پریشانی دا خطرہ پیش نہ آوے تے جو ٹائم ٹیبل دے دتا گیا اے اوہدے نال نہ کیمپ دی انتظامیہ تے نہ سوسائٹی تے نہ اکھاں دے اپریشن کرن والے ڈاکٹرز انحراف کرن۔ اک لگے بندھے ضابطے دے تحت کم چنگے طریقے نال پایہ تکمیل تک پہنچے۔ Society for Prevention of Blindness and Cure and Care دا لہور وچ آفس اے تے ایہ سوسائٹی نادار تے لاچار مریضاں لئی اکھاں دے اپریشن لئی ملک دے وکھووکھ حصیاں وچ آئی کیمپس دے پربندھ وچ تعاون وی کردی اے تے آئی کیمپ لئی سارا ضروری سامان وی دیندی اے۔ ایہدے روح رواں رضوی صاحب نیں جہناں دا کم ای اکھاں دے مرض تے خاص کر انھے پن توں بچانا اے۔ اکھاں کنی وڈی نعمت نیں ایہ اوہو جان سکدا اے جہنوں کدی بینائی یاں اکھ وچ کسے بیماری نال واہ پیا ہووے۔ ایہدے تے ایہ کم صرف اللہ دی خوشنودی تے عام بندے دی بھلائی لئی ہووے تے اوہدی داد و تحسین تے بن دی اے۔ بھاویں اوہناں دی خدمات دا کماحقہ اعتراف کیتا ای نہیں جا سکدا فیر ایہ فلاحی کم اک ورھا‘ پنج ورھے یاں دس ورھیاں توں نہیں پچھلے پنجاہ ورھیاں توں کامیابی نال جاری رکھنا کوئی سوکھا کم تے نہیں ایس کم وچ لک دوہرے ہو جاندے نیں تے ساہواں اکھڑ جاندیاں نیں پر جدوں سارا کم‘ ساری بھج نس اک اللہ دی خوشنودی تے عام بندے دی بھلائی لئی کیتی جا رہی ہووے تے اللہ حوصلہ وی عطا کردا اے تے انتظامات کرن دی استطاعت وی بخشدا اے تے توفیق وی۔
پچھلے 23 ورھیاں توں ایہ آئی کیمپ ہر ورھے قبلہ والد سراج قادری دی یاد وچ لایا جاندا اے۔ خودستائی نہ ہووے تے کہواں کہ قبلہ والد نے ایس ضلع وچ جہالت تے غلط رسم و رواج دے خلاف ساری حیاتی جہاد کیتا۔ اوہ ضلع منڈی بہائوالدین وچ روشنی دا سمبل نیں۔ بادشاہ پور جتھے ایہ مفت کیمپ لگدا اے اوہدے مالی تعاون وچ اوتھوں دا غیرملکاں وچ رہندا نوجوان طبقہ وی بڑے جذبے نال ایہدے وچ حصہ لیندا اے تے دامے درمے سخنے مدد وی کردا اے۔ اوہناں نے ایس علاقے دی افلاس دا آپ مشاہدہ کیتا ہویا اے ایس لئی دو دوستاں دا ذکر لازمی اے جہناں دا تعاون قابل قدر اے۔ ایہناں وچ اک برطانیہ وچ رہندے وکیل صفدرعلی نیں تے دوجے نیویارک وچ رہندے نصراقبال گوندل نیں اوہناں دی کوشش دی جنی وی تعریف کیتی جاوے گھٹ اے۔ مریضاں دے قیام تے اوہناں دے کھان پین دا سارا سلسلہ ایہناں دے دم نال اے کہ اوہ ایسے غربت تے پسماندگی دے آپ شاہد نیں۔ایس علاقے وچ غربت‘ دھول دھوپ تے صحت و صفائی دی عدم سہولیات دی وجہ نال اکھاں وچ موتیا آن تے انھے پن دے اینے مریض ودھ سکدے نیں جہناں دا شمار کرنا وی اوکھا ہو سکدا اے غربت دا ایہ عالم اے کہ اک بڈھی مریضہ جہنوں اپریشن لئی تھیٹر وچ لے جایا جا رہیا سی اوس بڈھی دی حالت ایہ سی کہ جدوں اوہنوں اپریشن تھیٹر لیاندا جا رہیا سی اودوں وی اوہنے اپنی پرانی تے ٹُٹی ہوئی چپل ہتھ وچ پھڑی ہوئی سی۔ اوہنوں ڈر سی کہ اوہدی چپل گواچ نہ جاوے جدوں اوہنوں سٹریچر تے پایا گیا فیر وی اوہنوں اکھ توں ودھ اپنی ٹُٹی پھٹی چپل دی فکر زیادہ سی۔ ایس کیمپ دے کامیاب انعقاد لئی ایس کیمپ دے روح رواں صاحبزادہ توقیراحمد فائق‘ ڈاکٹر تنویراحمد شائق تے میاں وقارعظیم دی خدمات سلاہن جوگ نیں۔٭