غذائی بحران تے کرپشن دی اجازت

روحیل اکبر

پاکستان وچ سیاسی دنگل تے چل ای رہیا اے نال ای صدر تے وزیراعظم دے خط وی دلچسپ صورتحال اختیار کردے جا رہے نیں تے ایہناں خطوط دی روشنی وچ مہنگائی دے بھار تھلے دبے ہوئے سرکاری ملازماں وی دبی دبی سرگوشیاں نال کھلے خط ول آن پہنچے نیں۔ صدر تے وزیراعظم دے مبینہ الزامات نال بھرپور خط دا فائدہ چکدے ہوئے فیڈرل بورڈ آف ریونیو دے ملازم نے وزیراعظم شہبازشریف نوں حقیقت تے مبنی خط لکھ کے کرپشن کرن دی اجازت منگ لئی۔ ملازم نے خط وچ لکھیا کہ مہنگائی پاروں گھریلو خرچے تنخواہ نال پورے نہیں ہو رہے خرچے اک لکھ 10 ہزار 500 روپیے نیں تے تنخواہ گھٹ اے جے حکومت تنخواہ نہیں ودھاندی تے فیر سانوں کرپشن دی اجازت دتی جاوے۔ مہنگائی تے خرچے ودھن پاروں مستقب لئی کوئی جمع پونجی نہیں جد کہ ساڈے مقابلے وچ نیب‘ ایف آئی اے‘ پی ایم آفس تے دوجے اداریاں دے ملازماں دیاں تنخواہواں زیادہ نیں تے ہن گھٹ تنخواہ تے مہنگائی پاروں گھریلو خرچے پورے کرنا ممکن نہیں رہیا۔ ایف بی آر دے ملازم ولوں لکھیا گیا ایہ خط سچ من لیا جاوے تے ایہدے وچ کوئی برائی نہیں کیوں جے صرف اک ہفتے وچ مہنگائی دی شرح وچ 1.80 فیصد دا وڈا اضافہ ہویا اے جہدے بعد ملک وچ مہنگائی دی مجموعی شرح 46.65 فیصد ہو گئی تے ایس صورتحال وچ سرکاری ملازماں دیاں چیکاں نکل گئیاں نیں تے عام بندے دا کیہ حشر ہوندا ہووے گا سگوں عام بندے دا اندازہ تسیں ایس گل توں لا لوو کہ حکومت ولوں مفت آٹا لین دے چکر وچ ملک دے وکھووکھ شہراں وچ ہن تک کئی جاناں جا چکیاں نیں تے سابق وزیراعلیٰ پنجاب سردار عثمان بزدار دے شہر تونسہ وچ اسسٹنٹ کمشنر نوں اپنی واسکٹ دی قربانی دے کے نسنا پینا نہیں تے ہجوم نے اوہدے کپڑے وی لاہ دینے سن۔
ایس ساری صورتحال دے باوجود ضلعی انتظامیہ آٹے دی پرسکون تقسیم دا طریقہ کار نہ بنا سکی جہڑے شہراں وچ آٹے دے حصول وچ لوک جان توں گئے اوہناں وچ بھکر‘ مظفرگڑھ‘ ملتان‘ فیصل آباد‘ کوٹ ادو تے چارسدہ شامل نیں جے ضلعی حکومت نے آٹے دی مفت تقسیم دا سوکھا تے پرسکون طریقہ اختیار نہ کیتا تے فیر آن والے دیہاڑیاں وچ حالات کسے دے وی قابو وچ نہیں رہن گے۔ تونسہ وچ مفت آٹے دے حصول وچ آن والے شہریاں نے اپنے پرتشدد رویے نال اسسٹنٹ کمشنر نوں نسن تے ایس لئی مجبور کیتا کہ اوہناں نوں کئی گھنٹے لائن وچ لگن دے باوجود آٹا نہیں ملیا‘ بلاشبہ حکومت دا آٹے دی مفت فراہمی دا فیصلہ بڑا ای ودھیا اے تے ایس سلسلے وچ پنجاب دا محکمہ خوراک وی اپنی ذمہ داریاں توں جانوں اے سیکرٹری فوڈ زمان وٹو اپنی ٹیم دے نال ہر شہر وچ آٹا تے دے رہے نیں پر شہراں دی انتظامیہ کوئی اجیہا طریقہ وضع کرن وچ اجے تک کامیاب نہیں ہو سکی کہ لوکاں نوں بناں دھینگامشتی دے آٹے دا اک تھیلا مل سکے۔ امید اے نگران وزیراعلیٰ پنجاب محسن نقوی ایس پاسے وی دھیان دین گے کیوں جے لوکاں دے جان و مال دا تحفظ اوہناں دی پہلی ترجیح اے ایہدے نال نال حکومت نوں مستقبل وچ کنک سنے وکھووکھ اجناس نوں ذخیرہ کرن لئی وی جدید ماڈلز نوں اپنانا ہووے گا جے انج نہ کیتا گیا تے لکھاں نہیں سگوں کروڑاں روپیے دی کنک چوہے وی ہضم کر سکدے نیں سندھ وچ تے انج ہو چکیا اے تے سانوں کنک دی کمی دا سامنا وی اے۔ اجے پنجاب وچ ہون والی حالیہ بارشاں نال کنک دی فصل نوں ڈاڈھا نقصان اپڑیا اے ایس لئی سانوں آن والے ورھیاں وچ پاکستان نوں خوراک دے حوالے نال وکھووکھ چیلنجاں دا سامنا کرنا پے سکدا اے۔
پاکستان وچ اناج ذخیرہ کرن دیاں موجودہ سہولتاں نکافی تے پرانیاں نیں جہدی وجہ نال پیداوار دے بعد اناج نوں نقصان اپڑدا اے جہدے نال خوراک دی دستیابی گھٹ تے قیمتاں ودھ جاندیاں نیں ایس مسئلے نوں حل کرن لئی حکومت نوں چاہیدا اے کہ اناج ذخیرہ کرن دیاں جدید سہولتاں توں فائدہ چکے تاں جے کیڑے‘ چوہے تے نمی دی وجہ نال اناج خراب ہون توں بچ سکے۔ اقوام متحدہ دے ادارہ برائے خوراک و زراعت دے مطابق پاکستان خوراک دے نقصان دے حوالے نال دنیا بھر وچ 63ویں نمبر اُتے اے باقی اجناس نوں تے چھڈو تسیں صرف چنے دی فصل نوں ویکھو جہدی کاشت اوہناں علاقیاں وچ ہوندی اے جتھے زمین زرخیز اے نہ پانی دی دستیابی اے بارشاں نال تیار ہون والی ایس فصل دی پیداوار نوں سنبھالن لئی ساڈے کساناں دے کول وسیلے ناں دی کوئی چیز نہیں۔ جے ساڈے ایتھے چنے دی پیداوار زیادہ ہوندی اے تے کسان اوہنوں ذخیرہ کرن توں قاصر نیں تے اوہنوں مقامی تاجراں نوں گھٹ قیمت تے ویچن تے مجبور نیں ایس مسئلے نوں حل کرن لئی اج تک کسے حکومت نے دھیان نہیں دتا حالاں کہ محکمہ زراعت نوں چاہیدا اے کہ اوہ کساناں نوں اپنی فصل وڈے پیمانے تے ذخیرہ کرن دیاں سہولتاں استعمال کرن لئی سوکھے طریقے دسن تاں جے غریب کسان ذخیرہ کرن دی بہتر سہولتاں دے نال اپنے اناج نوں زیادہ دیر تک ذخیرہ کر سکن تے اوہ اپنی مصنوعات نوں بہتر قیمت تے ویچن۔ حکومت جے ایس پاسے دھیان دیوے تے کوئی شک نہیں کہ پاکستان غذائی عدم تحفظ دے مسئلے نال نبڑ سکدا اے جد کہ اناج ذخیرہ کرن دیاں سہولتاں وچ سرمایہ کاری نال پاکستان دی فوڈ ویلیوچین نوں مضبوط بنان وچ وی مدد مل سکدی اے تے ایس سلسلے وچ اناج ذخیرہ کرن دیاں سہولتاں نوں بہتر بنان وچ نجی شعبہ وی اہم کردار ادا کر سکدا اے۔٭