پنجاب ہاؤس وچ منے پرمنے سوجھوان زاہد حسن دی ورھے گنڈ دا اکٹھ

رپورٹ، زاہد حسن

اپریل اک ایسا مہینہ اے جہدے وچ بے شمار شعرا و ادبا دی پیدائش دا ذکر ملدا اے۔ انج تے اک بہت وڈےشاعر‘ نقاد تی انگریزی ادب دے وڈے نام ٹی ایس ایلیٹ نے اپریل نوں ظالم تے ستمگر مہینے نال موسوم کیتا اے تے اوہنوں دل تے روح دا قرار لُٹ لین والے مہینے سے تشبیہہ دتی اے۔ بہرحال ایس مہینے دے بارے وچ کسی نے کجھ وی کہہ رکھیا ہووے۔ ایہہ حقیقت اے کہ دنیا اتے ایہہ بہرحال نویں زندگی لے کی آندا اے۔ فطرت نوں زیور حسن نال آراستہ کردا اے‘ دلاں وچ نویں امنگاں‘ نویں جذبے پیدا کردا اے۔ بالعموم ادبا و شعرا لئی تخلیق نو دا سامان لے کے وارد ہوندا اے بلکہ ساڈے اک بزرگ تے بڑے لکھن والے دا کہنا تے ایہہ سی کہ میں تے سارے سال اک عجیب و غریب کرب توں لنگھدا رہندا واں تے آخر کار ایس مہینے وچ اینا کجھ کہہ دینا واں اینا کجھ لکھ دینا واں کہ املا پورا عرصہ اوہنوں سدھا کرن‘ اوہدی نوک پلک سنوارن وچ ای لنگھ جاندا اے۔ تاہم ہر سال ایس مہینے وچ اینا کجھ لکھیا جاندا اے کہ اک دو سال وچ میں جے چاہواں تے اک نویں تصنیف دی اشاعت ممکن ہو سکدی اے۔ جدوں اوہناں دی گل اتے غور کیتا تے پتہ چلیا کہ مکمل طور تے تے نہیں لیکن کجھ نہ کجھ میرے اپنے نال وی انج ای ہوندا اے ہاں البتہ ایہدے اتے غوروفکر کرن دا موقع ایس گل نوں سنن مگروں ملیا اے۔ ایہدا کارن کیہ اے جدوں ایہدے اتے سوچ بچار کیتا تے پتہ چلیا کہ ایہدی اک وڈی وجہ تے ایس مہینے پیدائش کیتی اے تے کجھ اگے پچھے تے اتے تھرلے دی وی نہیں سدھی سدھی یکم اپریل دی اے۔ ایس تریخ نوں پیش نظر رکھدے ہوئے جے حقیقت دا بیان کراں تے اوہ ایہہ اے کہع مر عزیز دا پیشتر حصہ تے خود نوں ایہہ یقین دوان وچ ای لنگھ گیا اے کہ میں پیدا وی ہویا واں یا ایہہ سارا محض مذاق ای اے لیکن ایہدے اتے وی دل نوں ایہہ کہہ کے تسلی دے لینا واں کہ ایس دن میں کلا ای نہیں کئی ہور نامور لکھن والے وی پیدا ہوئے نیں تے جے اوہناں دا پیدا ہونا حقیقت ہو سکدا اے تے صرف میرا پیدا ہونا باطل کیویں ہو سکدا اے۔ شاید ایہو گل سامنے رکھدے ہوئے یا محض میری دوستی تے تعلق نوں نباہندے ہوئے مدثر اقبال بٹ نے پنجاب ہائوس وچ سالگرہ منان دا پربندھ کیتا جہدے وچ ندیم رضا‘ بلال مدثر بٹ‘ رضوان اصغر بٹ‘ فاروق اکرم تے دوجے احباب نے موقع دی مناسبت نال اظہار خیال کیتا۔ مدثر اقبال بٹ دا کہنا سی کہ ’’پنجاب ہائوس‘‘ تے ’’پنجابی یونین‘‘دا بنیادی تے وڈا مقصد ایہو اے کہ پنجابی شاعراں‘ ادیباں تے پنجابی زبان و ادب دی کسی وی طرحاں خدمت کرن والیاں دا اعتراف کیتا جاوے تے اوہناں دی اپنی زبان تے دھرتی لئی خدمات نوں لوکاں دے سامنے لیایا جاوے ساڈی اج دی ایس تقریب دا وی وڈا مقصد ایہو سی ندیم رضا دا کہنا سی کہ اسیں اج جہناںدی سالگرہ منا رہے نیں۔ پنجابی زبان و ادب لئی اوہناں نے تخلیق‘ شعری تے تحقیقی حوالے نال جہڑا کم کیتا اے موجودہ دور وچ اوہدی دوجی مثال گھٹ ای ملدی اے تے فیر ایہہ گل وی یاد رکھن دی اے کہ اوہناں دے ایس کم دے اعتراف دے طور تے اوہناں نوں قومی تے بین الاقوامی سطح اتے وی یاد رکھیا گیا اے تے اعتراف فن دے طور تے اوہناں نوں بے شمار ایوارڈز نال وی نوازیا گیا اے۔ پنجابی فکشن لئی قائم سب توں وڈا ایوارڈ اوہناں نوں اوہناں دے ناول‘ تسی دھرتی 2017اتے دتا گیا۔ ایہہ ایوارڈ جو ’’ڈھاہاںانٹرنیشنل ایوارڈ‘‘ دے نام توں معروف اے تے جہدے نال چنگی بھلی رقم وی ہوندی اے۔ اوہناں نوں مل چکیا اے۔ بلال مدثر بٹ تے رضوان اصغر بٹ نے وی راقم دی پنجابی ادب لئی خدمات دے حوالے نال سیر حاصل گل بات کیتی۔