خط غربت تے خطرے دی گھنٹی

روہیل اکبر

اج کل سوشل میڈیا دا دور اے تے وکھووکھ پبلی کیشنز گوگل پلے سٹور تے موجود نیں جو انسانی زندگی وچ ڈھیر جانکاری دا کارن نیں ایس ویلے تقریباً 27 لکھ توں ودھ ایپس موجود نیں اسیں ایس ٹیکنالوجی وچ دنیا توں بڑا دور تے پچھے آں۔ پنجاب دے نگران وزیراعلیٰ محسن نقوی ڈیجیٹل ٹیکنالوجی نوں بخوبی سمجھدے نیں تے ایسے لئی اوہناں نے پنجاب وچ اک اجہی ایپلی کیشن متعارف کرائی اے جو بچھڑے ہوئے لوکاں نوں اپنے پیاریاں نال ملان وچ اہم سنگ میل ثابت ہووے گی ایس ایپلی کیشن دا ناں وی ’’میرا پیارا‘‘ رکھیا گیا اے ایس ایپ دے راہیں گواچے بچیاں‘ بزرگاں‘ مریضاں نوں وارثاں نال ملایا جاوے گا۔ ایس ایپ وچ گواچے بچے تے بندے اوہناں دے لواحقین دا بائیوڈیٹا‘ فوٹو‘ فنگرپرنٹ‘ شناختی کارڈ تے ب فارم دیاں تفصیلاں ہون گئیاں۔ گواچے بچے‘ بندے تے اوہناں دے لواحقین دے ڈی این اے ٹیسٹ وی کرائے جان گے تے پنجاب بھر دے تھانیاں وچ گمشدگی دیاں رپورٹاں دا ڈیٹا وی تیار کیتا جاوے گا۔ یتیم خانیاں‘ دارالامان تے دوجے اداریاں وچ رہندے بچیاں تے بندیاں دا ڈیٹا وی ’’میرا پیارا ایپ‘‘ تے موجود ہووے گا۔ شہری ہن اپنے موبائل فون‘ فرنٹ ڈیسک‘ تحفظ مرکز تے خدمت مرکز دے راہیں گمشدگی دی رپورٹ ’’میرا پیارا‘‘ تے لوڈ کر سکاں گے تے اپنے پیاریاں نوں ایسے ایپ دے راہیں لبھ وی سکاں گے۔ پنجاب حکومت دا پیاریاں دا پیاریاں نال ملان دا ایہ اقدام قابل تحسین اے ایس توں علاوہ پنجاب حکومت نے مزدوراں دی خشحالی لئی گھٹوگھٹ اجرت ست ہزار روپیے وادھے نال 32 ہزار روپیے مقرر کر دتی جو پہلے پنجی ہزار سی تے ایہ صرف پنجاب حکومت دا ای کارنامہ اے پر ایہدے نال نال مہنگائی‘ غربت تے بیروزگاری دے نال نال مفت آٹے دی تلاش وچ بہت سارے پیارے اپنے پیاریاں توں بچھڑ چکے نیں۔
ملک وچ مہنگائی دی شرح وچ 55فیصد وادھا ہو چکیا اے۔ زرعی ملک ہون دے باوجود پاکستان غذائی قلت دا شکار اے ملک وچ تقریباً 220 ملین بندے رہندے نیں فیر وی تقریباً 40فیصد آبادی خوراک دے عدم تحفظ دا شکار اے۔ مہنگائی تے بیروزگاری عروج اُتے اے تے ماڑے طبقے دی قوت خرید جواب دے چکی اے۔ روزیاں وچ آٹا‘ چینی‘ سبزیاں‘ دالاں‘ گوشت‘ مچھی‘ چاول‘ جان بچان والیاں دوائیاں تے خوردنی شیواں لوکاں دی پہنچ توں دور ہو گئیاں نیں ملک بھر وچ پرائس کنٹرول کمیٹیاں دی ناقص کارکردگی دی وجہ نال غریب لوک کھان پین والیاں شیواں مہنگے مُل خریدن تے مجبور نیں تے انتظامیہ خاموش تماشائی دا کردار ادا کر رہی اے۔ غریب لوکاں نوں ذخیرہ اندوزاں تے خودساختہ مہنگائی گھٹ کرن والیاں دے رحم و کرم تے چھڈ رکھیا اے ذخیرہ اندوز تے خودساختہ و مصنوعی مہنگائی کرن والے سرکاری نرخ نامہ صرف اک کاغذی ٹکڑا سمجھ کے سٹ دیندے نیں حکومت ولوں سستے تے مفت آٹے دا اعلان وی اک مذاق بن چکیا اے غریب لوک سستے تے مفت آٹے دے حصول وچ اپنیاں جاناں گنوا رہے نیں۔ حکومت مفت آٹے دے ناں تے بزرگاں‘ بچیاں تے عورتاں نوں ذلیل و رسوا کر رہی اے۔
ریاست دی ذمہ داری اے کہ اوہ غریب لوکاں نوں بنیادی سہولتاں دیوے۔ حکمراناں نے غریب لوکاں خاص کر محنت کش طبقے نوں ذلت و رسوائی توں علاوہ کجھ نہیں دتا۔ ہوشربا مہنگائی نے سرکاری ملازماں دا وی لک بھن دتا اے تنخواہواں تے مراعات محدود تے مہنگائی اسمان نال گلاں کر رہی اے اوہناں لئی گھریلو خرچے پورے کرنا ناممکن ہو چکیا اے حالیہ مہنگائی دے تناسب نال اینیاں گھٹ تنخواہواں وچ گزارا مشکل ہو چکیا اے گھریلو خرچے پورے نہیں ہو رہے تے ساڈے حکمران پچھلے 75 ورھیاں توں ملک نوں دوہاں ہتھاں نال لٹ رہے نیں۔ ساڈی اشرافیہ ورھے وار ارباں روپیے کھا جاندی اے مجال اے ساڈا ملکی نظام کسے تے لٹ مار دا اک روپیہ ثابت وی کر سکیا ہووے۔ ملک دا بچہ بچہ اج آئی ایم ایف تے ورلڈبینک دا مقروض اے تے ساڈے دیانت دار تے ایماندار حکمران ارب پتی بن دے چلے جا رہے نیں۔ بدقسمتی نال حکمران طبقہ اپنا بچائو‘ مقدمے ختم کرن تے لٹ مار چھپان لئی قنون سازی کر رہیا اے۔ صرف نظر آندا اے کہ لوکاں دی پریشانی‘ اوکڑاں‘ مہنگائی‘ بھاری سودی قرضے تے ملک ڈبن نال اوہناں دا کوئی لینا دینا نہیں تے نہ ای مظلوم تے پریشان حال لوکاں دا کوئی پرسان حال اے۔
ہر پاسے ناانصافی‘ ظلم و جبر‘ لٹ مار‘ بھتہ خوری دا راج اے اُتوں آئی ایم ایف دیاں سخت شرطاں تے عملدرآمد کردے ہوئے 22کروڑ لوکاں دی زندگی اوکھی بنا دتی گئی اے۔ بجلی تے 3.23 روپیے فی یونٹ فکس سرچارج دے وادھے نال صارفین تے 335 ارب روپیے دا وادھو بھار پوے گا لوک پہلے ہی مہنگائی دی چکی وچ پس رہے نیں کساناں تے برآمدی شعبیاں لئی سبسڈی ختم کرن نال جتھے اک پاسے غریب کاشتکاراں دا لک ٹُٹے گا اوتھے دوجے پاسے ان ڈسٹریز وی تباہ ہو جاوے گی ایس ویلے لوکاں دی آمدن دے ذرائع مخدوش تے خرچیاں دا گراف اسمان نال گلاں کر رہیا اے نکام حکومتی پالیسیاں پاروں غربت دی عالمی درجہ بندی وچ پاکستان 116 ملکاں دی فہرست وچ 92 نمبر اُتے اپڑ چکیا اے۔ ملک وچ شرح غربت 47 فیصد ہو چکی اے۔ کجھ مہینے پہلاں آن والے سیلاب نال پاکستان دے 90 لکھ بندے خط غربت توں تھلے ڈگ چکے نیں جو خطرے دی گھنٹی اے ایس توں پہلاں ایہ گنتی 58 لکھ بندیاں تے مشتمل سی ایس ویلے 3.4 ملین توں ودھ بچے بھکھ دا شکار نیں اُتوں پچھلے ورھے دے سیلاب نے خوراک دے بحران نوں ہور ودھا دتا اے۔٭