سستی شہرت دی حد ای مُک گئی اے

خالد مسعود خان

پرسوں میں شاکرحسین دے نال ایس پی چوک توں لنگھ رہیا سی تے اچانک میری نظر اوس چوک دے درمیان لگے خوبصورت تھم دے چارے پاسے لگے ہوئے بورڈ تے پئی۔ ایہ پینافلیکس اوس تھم دے دوالے فریم وچ لگا ہویا سی تے اُتے لکھیا سی ’’اسیں جناب عامرکریم خان سابق ڈپٹی کمشنر ملتان دے دِلوں مشکور آں جہناں نے سرکاری رقم خرچ کیتے بناں ملتان دی خوبصورتی لئی اٹھ توں ودھ چوکاں دی تزئین و آرائش تے ریکارڈ ترقیاتی کم سرانجام دتے۔ منجانب: اہالیان ملتان‘‘۔ میں ایہ بورڈ ویکھ کے شاکر توں پچھیا کہ ایہ کیہ ماجرا اے؟ آخر ایس بورڈ دی کیہ لوڑ پئی اے؟ ساریاں نوں پتہ اے کہ ملتان دے ایس ڈپٹی کمشنر نے اپنے دور وچ ملتان شہر تے شہر دیاں داخلی تھاواں والے چوکاں نوں ملتان دے مخیر حضرات دے تعاون نال سرکاری خزانے چوں اک پیسے لائے بناں نہ صرف خوبصورت طریقے نال بنوایا سگوں ایس تزئین و آرائش نے ایہناں چوکاں دے ٹریفک دے نظام نوں وی بہتر بنان وچ بڑی مدد کیتی۔ اجہے وچ ڈپٹی کمشنر دے ایس شہر توں چلے جان دے دس مہینے بعد اچانک باسی کڑھی وچ ایہ اُبال کس لئی آیا اے؟۔
شاکراپنے مخصوص انداز وچ مسکرایا تے کہن لگا۔ تسیں سوشل میڈیا توں لاتعلق او ایس لئی تہانوں بڑی آسانی اے کہ ایس قسم دیاں ساری غیر ضروری مصروفیات توں اپنی جان چھڑوا کے بیٹھے ہوئے او۔ اصل وچ قصہ ایس طرح اے کہ ملتان ڈویلپمنٹ اتھارٹی نے اچانک دس مہینے بعد اپنی صفر قسم دی کارکردگی نوں لوکاں وچ باور کروان دی غرض نال سابق ڈپٹی کمشنر دے عوامی فنڈ دے راہیں بنائے گئے ایہناں ست پراجیکٹس دا کریڈٹ سمیٹن لئی اک عدد اشتہار لایا اے جہدے وچ اٹھ عدد پراجیکٹس نوں اپنیاں کاوشاں تے کامیابیاں دی فہرست وچ وکھاندے ہوئے اوہناں دی تکمیل دا سہرا اپنے سر بنھیا اے۔ کسے دل جلے نے ایم ڈی اے ولوں حلوائی دی دکان تے نانا جی دا فاتحہ دوان دی ایس بھونڈی حرکت دا بھانڈا پھوڑن دی غرض نال ایہ بورڈ لگوا دتا اے۔
میں ایہ واقعہ شاہ جی نوں سنایا تے اوہ فرمان لگے کہ ایہدے وچ حیرانی دی کہڑی گل اے؟ ایس شہر وچ سارے لوک ایہو کر رہے نیں کوئی سرکاری فنڈ تے اپنے خاندان دے ناواں والے بورڈ لا رہیا اے تے کوئی ملتان دے مخیرحضرات دے لگے ہوئے پیسیاں تے اپنے محکمے دے کارنامیاں دے اشتہار لا رہیا اے۔ دھیان رہوے کہ ایہ محکمہ کدھرے ملتان دے مخیرحضرات ولوں خرچ کیتی جان والی رقم اپنے خرچیاں وچ وکھا کے سرکاری خزانے چوں نہ کڈھوا لوے۔ ایہدے نال اوہناں نوں دوہرا فائدہ ہووے گا اک ایہ کہ دوجیاں دے بنائے گئے پراجیکٹ اوہناں دے کھاتے وچ آ جان گے تے کسے ہور دی جیب چوں لگن والے پیسے اوہ سرکاری خزانے چوں کڈھ کے اپنی جیب وچ پا لین گے۔ میں کہیا شاہ جی بھلا انج کیویں ممکن اے۔ شاہ جی کہن لگے گل پنتالی چالھی ورھے پرانی اے تے مینوں وی پوری صحت دے نال یاد نہیں۔ ملتان وچ سیوریج دا مسئلہ جیویں سکندراعظم دے حملے دے ویلے موجود سی اج اکیہویں صدی وچ وی اوسے طرح دھڑلے نال موجود اے۔ ملتان دے کئی علاقے بناں بارش دے ای گٹر دے پانی وچ ڈبے رہندے نیں ہن بارشاں دے بعد تے ایس شہر ناپرساں دا حال ای نہ پچھو۔ اودوں سیوریج دا مسئلہ حل کرن لئی ملتان دے ترقیاتی ادارے نے اک ماسٹر پلان بنایا۔ ایہ کروڑاں روپیے دا منصوبہ سی مینوں رقم وغیرہ تے یاد نہیں پر یاد رہوے کہ اودوں دے کروڑاں اج دے ارباں روپیے تے بھاری سن خیر ایس منصوبے تے کروڑاں روپیے خرچ ہو گئے تے برا بھلا ایہ منصوبہ پایہ تکمیل تک اپڑ گیا۔ ایسے دوران ورلڈ بینک یاں ایشین ڈویلپمنٹ بینک توں وی ملتان دے سیوریج دے مسئلے حل کرن لئی بھاری رقم آ گئی۔ یار لوکاں نے ترقیاتی محکمے ولوں ڈالی گئی اوسے سیوریج لائن تے پائپ وغیرہ دے نقشے تے بلیوپرنٹ اودھر وی جمع کرا دتے تے اک منصوبے دی دوہاں ولوں ادائیگی وصول کرکے اک نوں مزے نال غتربود کر لیا۔ دوجا منصوبہ تے صرف کاغذاں وچ ای تکمیل پا کے فارغ ہو گیا سی۔
فیر شاہ جی دسن لگے کہ اینٹی کرپشن والیاں نے شاید تہاڈے کالم دی بنیاد تے سابق ایم این اے نوں اپنے چاچا دے ناں تے بنوائے گئے پارک دے سلسلے وچ سدیا اے۔ اوہناں نے اوس پارک دی تعمیر وچ ہون والی ہیرپھیر دے سلسلے وچ سمن گھلیا اے فیر مینوں پچھن لگے کہ اصل معاملہ کیہ اے؟ تہانوں تے اصل گل دا پتہ ہووے گا میں کہیا شاہ جی! تہانوں تے پتہ ای اے کہ اودھر گلشن مہر کالونی وچ اک کافی وڈے خالی پلاٹ تے خانہ بدوشاں نے جھگیاں بنا رکھیاں سن تے اوہ ایتھے عرصہ کئی سال توں قابض سن۔ مہنگائی تے بیروزگاری پاروں اوہناں دے منڈیاں نے آل دوالے چوری چکاری شروع کر دتی۔ علاقے دے لوک پریشان سن کہ روزمرہ دی ایس مصیبت توں کیویں جان چھڑائی جاوے۔ خیر لوکاں نے رَل کے بمشکل اوہناں نوں ایتھوں کڈھوایا۔ میں کئی ورھے پہلاں ایم ڈی اے توں گلشن مہر کالونی دا منظورشدہ نقشہ کڈھوایا تے ایہ تھاں پارک لئی مخصوص سی۔ جدوں ایہ تھاں خالی ہو گئی تے میں ڈپٹی کمشنر نوں مل کے اوس تھاں پارک بنان دی درخواست کیتی تے آکھیا کہ جے ایہ پلاٹ خالی رہیا تے ایدھر وی کوئی قبضہ کر لوے گا تے ایہنوں دوبارہ خالی کروانا اوکھا ہو جاوے گا۔ فیر اک دن ملکوں باہر میرے واٹس ایپ تے میسج ملیا کیہ اوس پارک دی تھاں ایہو اے؟ جواباً میں لکھیا جی ہاں‘ ایہو اے‘ گل ختم ہو گئی۔ پاکستان واپسی تے ڈپٹی کمشنر نے مینوں آکھیا کہ ایہدے تے سارا کاغذی کم تے ہو گیا اے پر اجے ایہدے لئی پی ایچ اے دے کول پیسے نہیں۔ اوہناں نوں آکھیا اے کہ کسے رکن اسمبلی دے ترقیاتی فنڈ نال ایس تھاں تے پارک بنوا دیو نہیں تے ایس تھاں تے جے کسے نے قبضہ نہ وی کیتا تے ایہ کوڑا سٹن دی تھاں بن جاوے گی۔ کجھ عرصے بعد پارک بننا شروع ہو گیا کدی ایہدی تعمیر وچ تیزی آ جاندی تے کدی ایہ سست روی دا شکار ہو جاندا۔ بہرحال ایہ پارک نومبر 2022ء نوں مکمل ہو گیا۔٭