مزدوراں دا دیہاڑتے قنونی تقاضے

پیارے وطن وچ ایس ویلے تقریباً30لکھ بھٹہ مزدور کم کر رہے نیں
جنہاں وچ مرد‘ زنانیاں‘ بچے تے بڈھے وی شامل نیں

پروفیسر حکیم سید عمران فیاض

وطن عزیز وچ ایس ویلے تقریباً30لکھ بھٹہ مزدور کم کر رہے نیں۔ جنہاں وچ مرد‘ زنانیاں‘ بچے تے بڈھے وی شامل نیں۔ بھٹہ مزدوراں توں جہڑے انداز وچ مشقت لیتی جاندی اے تے ایس سلسلہ وچ بسا اوقات جہڑے تکلیف تے اذیت رساں طریق کار اختیار کیتا جاندا اے۔ ایہدے بارے وچ گاہے بگاہے ایسی تفصیلاںوی اخباراں دی زینت بندی رہندیاں نیں جہناں نوں پڑھ کے رونگٹے کھڑے ہو جاندے نیں۔ اوہناں نوں جسمانی اذیت رسانی مزدور زنانیاں نال ناروا سلوک توں ودھ چڑھ کے بدطریقہ یشگی دا اے جہڑا مزدور اپنی گزربسر کرن لئی بھٹہ مالکان کولوں لین تے مجبور ہوندے نیں لیکن چونکہ اجرت بہت گھٹ ملدی اے ایس لئی اوہناں دے معاوضے دا 50 فیصد کٹوتی دی نذر ہو جاندا اے تے انج پیشگی لین دی لوڑ روز افزوں ہوندی جاندی اے تے بھٹہ مزدور ہر گزردے ہوئے دن دے نال جبری مشقت دی سخت تر زنجیراں وچ جکڑے جاندے نیں تے کوئی مزدور جے ایس حالت وچ دارفانی توں کوچ کر جاندا اے تے پیشگی قرض اوہدے خاندان وَل منتقل ہو جاندا اے تے ایس طرح اوہناں دی حیثیت یرغمالیاں جئی ہو کے رہ جاندی اے۔ ایسے مزدوراں نوں اجتماعی طور تے دُوجے مالکان نوں فروخت کر دین دے واقعات وی ہوندے رہندے نیں۔
مزدور دن رات محنت مشقت کردے نیں۔ ستاریاں دے چانن وچ کم تے جانا تے ستاریاں دے چانن وچ واپس آنا اینی محنت دے باوجود وی ایہہ مزدور زندگی دی مُڈھلی سہولتاں توں محروم نیں۔ ایہہ مجبور تے بے بس انسان اپنی زندگیاں زہریلا دھواں اگلن والی چمنیاں دی نذر کر دیندے نیں۔ دوجیاں نوں عالی شان بنگلیاں‘ کوٹھیاں تے محلاں لئی اِٹاں بنا کے دیندے نیں تے خود بے گھر نیں۔ اوہناں دے کول سر لکان لئی جگہ تک نہیں تے اوہدے اتے وی ظلم دی انتہا کہ مالکان بھٹہ اوہناں مزدوراں نال غلاماں توں وی بدتر سلوک کردے نیں جہدی مثل نہیں ملدی۔ جہالت تے ناخواندگی دی وجہ نال ملازمت دے بوہے اوہناں لئی بند ہوندے نیں لیکن نہ ای سیاسی اقتدار حاصل ہوندا اے تے نہ ای سماجی حیثیت حاصل ہوندی اے۔ اوہناں دا پیدا ہون والا بچہ مقروض ہوندا اے۔ سخت سردی‘ موسم گرما دی تپش دے علاوہ زہریلی مئی ناخوشگوار آب و ہوا وچ کم کرن والے ایہناں زرد پیلے چہریاں تے چلدی پھردی لاشاں تے اوہ وی زندہ لاشاں دا جے معائنہ کروایا جاوے تے 98 فیصد مزدور متعدد بیماریاں وچ مبتلا ہون گے۔
اٹھو میری دنیا کے غریبوں کو جگا دو
کاخ امراء کے در و دیوار ہلا دو
بھٹہ مزدوراں اتے جبری مشقت دے نظام دے انسداد لئی قنون امتناعی جبری مشقت مجریہ 1992جاری کیتا گیا جہنوں حیرت انگیز گزٹ آف پاکستان 1دا ناں دتا جاندا اے دی اہم تفصیل مندرجہ ذیل اے۔ مضمون دی لمائی نوں مدنظر رکھدے ہوئے کجھ اہم نکات ای پیش کیتے جا سکن گے۔
1992دا تیجا قنون
قنون امتناع نظام جبری مشقت مجریہ 1992اک قنون جہڑا جبری مشقت دے نظام دے انسداد لئی جاری کیتا گیا
مجلس شوریٰ (پارلیمنٹ) دا جہڑا مندرجہ ذیل قنون جہڑا کہ 11مارچ 1992ء نوں عزت مآب جناب صدر پاکستان دی منظوری حاصل ہوئی تے بذریعہ ہذا اطلاع عام لئی مشتہر کیتاجاندا اے تے ایہہ اسلامی جمہوریہ پاکستان دے آئین 1973 دی ذیلی دفعہ (2) آرٹیکل نمبر11 ہرقسم دی جبری مشقت نوں ممنوع قرار دیندی اے تے جتھوں تک ایہہ ضروری اے کہ ملک دے اندر جبری مشقت دے نظام دے انسداد لئی مزدور طبقہ دے اقتصادی تے جبری جسمانی استحصال یا اوہدے متعلقہ یا اوس ضمن وچ آن والے امور دی روک تھام دے پیش نظرا وہنوں پیش کیتا جاندا اے۔
لہٰذا بذریعہ ہذا مندرجہ ذیل قنون دی شکل وچ پیش کیتا جاندا اے۔
مختصر نام ۔ آغاز ۔ وسعت:
1- ایس قنون دا ناں امتناع نظام جبری مشقت 1992ہووے گا۔2-ایہہ سارے پاکستان اتے محیط ہووے گا۔3- ایہہ فی الفور نافذ العمل ہووے گا۔
تعریفات:
ایس قنون دے اندر جدوں تک کوئی چیز نفس مضمون یا سیاق و سباق دے منافی نہ ہووے تے اوہدے ایہومعنی لیتے جان گے۔
a) ایڈوانس پیشگی توں مراد ایڈوانس یا پیشگی اے جہڑی اک بندے مگروں قرض خواہ کہلاوے گا۔ کسے دوجے بندے نوں جہڑا (مابعد جہڑا مقروض کہلاوے گا) خواہ نقدی دی صورت وچ یا جنس دی صورت وچ یا کجھ حصہ نقدی تے کجھ جنس دی شکل وچ ادا کردا اے۔(b) مجبوری دا قرضہ: مجبوری دا قرضہ توں مراد ایسی ایڈوانس یا پیشگی ادائیگی جہڑی اک مجبور مزدور نے جبری مشقت دے نظام دے تحت حاصل کیتا ہووے یا تصور کیتا جاندا اے۔(c)جبری مشقت توں مراد ایسے مشقت یا خدمات جہڑی جبری مشقت دے نظام دے تحت کیتی جاوے یا لیتی جاوے۔(d) جبری مشقتی یا مجبور مزدور توں مراد ایسا مزدور یا مشقتی اے جہڑا مجبوری دا قرضہ چکدا اے یا مجبوری دا قرضہ چکیا ہویا تصور کیتا جاندا اے۔(e) جبری مشقت دا نظام توں مراد جبری مشقت یا جزوی جبری مشقت جہدے تحت اک مجبور مقروض کسے قرض خواہ دے نال کوئی معاہدہ کردا اے یا معاہدہ وچ اوہناں معنیاں وچ شامل ہوندا اے:(1) کہ ایس پیشگی رقم دے حصول دے عوضانہ طور تے جہڑا اوہنے خود یا اوہدے خاندان دے کسے فرد نے (خواہ اوہدی پیشگی دی کوئی دستاویز ہووے یا نہ ہووے) تے اوس پیشگی اتے سود دے عوض جہڑی اوہدی پیشگی اتے واجب الادا اے پیشگی دی رقم دے حصول دے عوضانہ طور تے مشقت کردا ہووے یا (2) کسے رواج یا کسے سماج احسان مندی دے حصول دے پچھے لگے رہن دے تحت کردا ہووے یا (3) کسے اقتصادی عوضانہ دے عوض جہڑا مقروض نے قرض خواہ کولوں وصول کیتا ہووے یااوہدے خاندان دے کسے فرد نے وصول کیتا ہووے تے اوہنوں:(i) خود یا اوہدے خاندان دے کسے فرد یا کسے اوہدے زیر کفالت شخص دے ذریعے کسے قرض خواہ دے مفادات لئی معینہ عرصہ یا غیر معینہ عرصہ تک لئی بغیر کسی معاوضہ دے یا برائے نام معاوضہ دے عوض مزدوری یا خدمت یا
(ii ملازمت کرن دی آزادی توں محروم کرنا یا زندگی گزارن دے ذرائع اختیار کرن دی آزادی توں محروم کرنا یا زندگی گزارن دے دوجے ذرائع اختیار کرن دے کسے معینہ یا غیر معینہ عرصہ لئی محروم کرنا۔(iii اک جگہ توں دوجی جگہ جان دی آزادی توں محروم کرنا۔ (ivکسے مقروض نوں اوہدے خاندان دے کسے فرد نوں یا اوہدے کسے زیر کفالت نوں مزدوری کرن یا اوہدی پیداوار یا اوہدی جائیداد نوں استعمال کرن مارکیٹ وچ مناسب داماں فروخت کرن توں محروم کرنا تے جبری مشقت یا جزوی جبری مشقت دا نظام شامل اے۔ جہدے تحت اک ضامن اک معاہدہ دی رو نال جہڑا مقروض لئی ضمانت دیندا اے یا ضامن تصور کیتا جاندا اے کہ اوہ قرض خواہ دا ضامن اے۔ بدیں معنی دے بصورت عدم ادائیگی قرضہ مقروض دی جابجا ضامن جبری مشقت کرے گا۔
(f) خاندان دے معنی نیں: مرد مجبور مزدور دی صورت وچ بیوی‘ بیویاں تے زنانی مجبورمزدوردی صورت وچ اوس مجبور مزدور دا خاون تے اوس مجبور مزدور دے والدین‘ بچے‘ چھوٹے بھراں تے غیر شادی شدہ متعلقہ تے بیوہ نہیں جہڑی مجبور مزدور دے زیر کفالت نیں۔(g) اجرت کسے محنت دے سلسلہ وچ کسے محنت دے طور تے معاوضح جہڑا کہ مقررہ اجرت توں گھٹ ہووے۔
(a)جتھے کدھرے ایسی اجرت محنت دی کسی شکل وچ مقررہ نہ ہووے تے اوسے علاقہ وچ یا اوس قسم دے کم کرن والے مزدور لئی جہڑی عام طور تے ادا کیتی جاندی اے تے Cمجوزہ توں مراد اے جہڑے اوس قنون دے تحت بنائے گئے قواعد دی رو نال تجویز کیتے جان۔(3) ایہہ قنون دوجے قنوناں نوں رد کردا اے۔ باوجود کسے دوجے رائج الوقت قنون یا دستاویز دے جہڑے کسی ایسے قنون دی وجہ نال موثر ہووے اوہناں دی بجائے ایہہ قنون نافذ العمل ہووے گا۔(4) انسداد نظام جبری مشقت۔
ایس قنون دے نفاذ تے جبری مشقت دا نظام ختم ہو جاوے گا تے ہر اک مجبور مشقتی آزاد ہو جاوے گا تے ایہہ ہر قسم دی ذمہ واری جہڑا جے ذیلی دفعہ 5-4 یا 6 وچ مذکورہ جائیداد دا قبضہ ایس قنون دے نفاذ نال 90دن دے اندر اندر واپس نہیں دتا گیا تے مظلوم شخص مجوزہ عرصہ دے اندر اندر افسر نوں درخواست دے سکے گا۔ ایسی جائیداد دے قبضہ دی بحالی لئی تے حاکم مجاز قرض خواہ نوں سماعت دا مناسب موقع دین مگروں درخواست دہندہ نوں مذکورہ جائیداد دی واپسی دا اپنے حکم دے اندر دتے گئے ویلے دے اندر واپس کران دا حکم دیوے گا۔
ذیلی دفعہ 7دے تحت حاکم مجاز دے دتے گئے حکم جہڑا اوس علاقہ دی گھٹ توں گھٹ مالی اختیار سماعت دی ادنیٰ سول عدالت دا دتا گیا حکم تصور کیتا جاوے گا جہدے وچ مقروض عام طور تے رہائش پذیر ہووے یا اوس علاقہ وچ کوئی نفع بخش کاروبار کردا ہووے یا کوئی ہور کاروبار کردا ہووے۔
جتھے کدھرے کوئی دعویٰ‘ کوئی تے کارروائی جبری مشقت دے نظام دے تحت کسی ذمہ واری دے متعلق شمولہ دعویٰ یا کوئی کارروائی ایس قنون دے نفاذ دے ویلے کسی جبری قرضہ دی پیشگی رقم دی وصولی دے متعلق زیر سماعت ہووے تے ایسا دعویٰ یا دوجی کارروائی ایس قنون دے نفاذ اتے ختم ہو جاوے گا۔ایس قنون دے نفاذ دے ویلے ہر اوہ جبری مشقتی جہڑا کسی سول قید وچ بند ہووے خواہ فیصلہ توں پہلاں یا مگروں فوری طور تے اوہنوں رہا کردتا جاوے گا۔
جبری مشقتی دی جائیداد وغیرہ دی رہن توں آزادی
ایس قنون دے نفاذ نال فوری قیل اوہ ساری جائیداد جہڑی جبری مشقتی نے جبری مشقت یک تحت کسی رہن دے عوض‘کیسی اجرت یا قرض دے عوض کسی حق دے عوض یا کسی دوجے جبری قرضہ دے سلسلے وچ زیر بار ہووے یا جتھوں تک اوہدا جبری قرضہ نال تعلق ہووے توں آزادی ہووے گی تے ایسے رہن توں وی آزاد تے سبکدوش ہووے گی۔ ایسی اجرت یا قرض توں آزاد ہووے گی۔ ایسے حق توں بری ہووے گی تے جتھے کسی ایسی جائیداد ایس قنون دے نفاذ توں فوری قبل کسی مرہون دے قبضہ وچ ہووے یا خارج گرسپندو دے چارج وچ ہووے تے اوہدے اتے کوئی حق نہیں ہووے گا یا جائیداد کسی طرح زیر بار ہووے تے جبری مشقتی نوں اوہدا قبضہ واپس کر دتا جاوے گا۔
جے ذیلی دفعہ وچ دتی ہوئی جبری مشقتی دی جائیداد دا قبضہ واپس کرن وچ دیر کیتی جاوے تے ایسا مشقتی ایس مرہون توں ایس تریخ اتے یا ایس تریخ توں جہڑے ویلے ایہہ قنون نافذ ہویا اوس جائیداد دے واپس لین دا حقدار ہووے گا یا اوہدے اتے حق رکھن والے توں یا جہدے چارج وچ ہووے یا جہدے زیر بار ہووے ایسے خالص منافع جہڑا گھٹ توں گھٹ مالیت اختیار سماعت دی سول عدالت ہووے تے جہدی حدود ارضی وچ اوہ جائیداد واقع ہووے جہڑی اوہ متعین کرے اوہناں کولوں وصول کرن دا حقدار ہووے گا۔
ایس قنون اتے عملدرآمد کرن والے افسراں دی صراحت
صوبائی حکومت ڈسٹرکٹ مجسٹریٹ نوں ایسے فرائض تے اختیارات سونپے گئے‘جہنوں ضروری تصور کرے۔ ایس امر نوں یقینی بنان لئی کہ آیا قنون اتے خاطر خواہ عمل درآمد ہو رہیا اے۔ ڈسٹرکٹ مجسٹریٹ کسی اپنے تحت آفیسر نوں مقرر کرے گا جہڑا کہ سارے دے سارے یا اوہناں وچوں کجھ اختیارات استعمال کرے گا یا سارے دے سارے یا اوہدے وچوں کجھ فرائض ہور کرے گا۔ جہڑے اوہنوں سونپے گئے ہون یا اوہدے ذمے لائے گئے ہون تے ڈسٹرکٹ مجسٹریٹ اوس حدود اراضی دی صراحت کرے گا جہدے وچ افسر دے اختیارات قابل عمل ہون گے۔
جبری مشقت لین اتے سزا
جہڑا شخص ایس قنون دے نفاذ مگروں کسی شخص نوں جبری مشقت کرن اتے مجبور کردا اے۔ اوہدی قید دی سزا دتی جاوے گی۔ جہڑا دو سال توں گھٹ تے پنج سال توں ودھ نہیں ہووے گی یا جرمانہ دی سزا جہڑی پنج ہزار روپے توں گھٹ نہیں ہووے گی یا دونویں سزاواں دتیاں جان گئیاں۔
جبری مشقت دے نظام دے تحت زبردستی مشقت لین اتے سزا:
جہڑا کوئی شخص ایس قنون دے نفاذ مگروں کسی رواج‘ کسی روایت‘ کسی دورالعمل‘ کسی معاہدہ‘ کسی اقرار نامہ یا کسی دوجی دستاویز اتے کوئی عملدرآمد کردا اے جہدی وجہ نال کوئی شخص جبری مشقتی تے جبریمشقتی دے کسی فرد کولوں جبری مشقت دے نظام دے تحت کوئی خدمت لیندا اے تے اوہ شخص سزا دا مستوجب ہووے گا جہڑا 50ہزار روپیہ یومیہ توں گھٹ نہیں ہون گئیاں۔ جہڑے جبری مشقتی نوں ادا کیتے جان گے۔ ایس عرصہ لئی جبری مشقت لیتی گئی سی۔
جبری مشقتی دی جائیداد دا قبضہ واپس نہ کرن یا فرد گذاشت کرن دی سزا
جہڑے شخص نوں کسی جبری مشقتی دی ایس قنون دے تحت جائیداد واپس کرنی چاہیدی اے تے اوہ 8دن دے اندر اندر واپس نہ کرے یا واپس کرن وچ فرد گزاشت کرے تے ایسا شخص سزا دا مستوجب ہووے گا جہڑی اک سال تک ہو سکدی اے یا جرمانہ دی سزا دا مستوجب ہووے گا جہڑی اک ہزار روپیہ تک ہو سکدی اے یا دونویں سزاواں دا مستوجب ہووے گا تے جرمانہ دی رقم وچوں جے وصولی کیتی گئی ہووے تے جبری مشاتی نوں بحساب دس روپیہ یومیہ جہڑے عرصہ دے دوران جائیداد دا قبضہ جبری مشقتی نوں واپس نہ کیتا گیا ہووے ادا کیتی جاوے گی۔
جرم دی کفالت:
جہڑا کوئی شخض ایس قنون دے تحت جرم وچ کسی مجرم دی اعانت کردا اے خواہ اوہ جرم دا ارتکاب پذیر نہ ہویا ہووے‘ جہڑے جرم دی اعانت نہ کیتی گئی اوہدی اوہو سزا دتی جاوے گی۔ جہڑے جرم دے کرن وچ اعانات کیتی گئی ہووے۔
تشریح ایس واری دے مقصد لئی جہڑی اعانت دے اوہو معنی لیتے جان گے جہڑے تعزیرات پاکستان ایکٹ 186045 وچ لیتے گئے نیں۔
نگران کمیٹی:
ضلع دی سطح اتے اک مجوزہ طریقہ کار دے مطابق اک نگران کمیٹی تشکیل دتی جاوے گی جہڑی ایس علاقہ دے منتخب نمائندگان ضلعی انتظامیہ دے ممبران بار ایسوسی ایشنز پریس منظور شدہ سماجی تنظیماں تے صوبائی وفاقی محکمہ محنت دے نمائندگان اتے مشتمل ہووے گی۔
جرائم دی سماعت مجسٹریٹ کرے گا:
ایس قنون دے تحت اک مجسٹریٹ درجہ اول جہنوں صوبائی گورنمنٹ ولوں ایس سلسلہ وچ اختیارات حاصل ہون گے۔ ایس قنون دے تحت کوئی وی جرم ہووے اوہدی سماعت دا اخیر ہووے گا۔
ایس قنون دے تحت ہر اک جرم قابل دست اندازی پلس تے قابل ضمانت ہووے گا۔
کمپنیاں کولوں سرزد ہون والے جرم:
ایتھے اک جرم ایس قنون دے تحت کسی کمپنی کولوں سرزد ہویا ہووے تے ہر شخص جہڑا جرم دے ارتکاب ویلے انچارج سی تے ذمہ دار سی کمپنی دے امور چلان دا تے کمپنی
تشریح: ایس واری دے مقصد لئی:
(a)کمپنی توںمراد افراد دا اجتماعی ادارہ تے اوہدے وچ فرم یا افراد دی انفرادی ایسوسی ایشن وی شامل اے۔(b)ڈائریکٹر توں مراد بسلسلہ فرم دا حصہ دار ہووے گا۔
نیک نیتی نال چکے گئے اقدام دا تحفظ:
ایس قنون دے تحت جہڑی کارروائی نیک نیتی نال کیتی گئی یا نیک نیتی نال کرن دا ارادہ ہووے تے گورنمنٹ دے خلاف یا گورنمنٹ دے کسی افسر دے خلاف ایسی کارروائی اتے کوئی دیوانی دعویٰ‘ فوجداری مقدمہ یا دوجی قنون کارروائی نہیں کیتی جاوے گی۔
عدالتاں دی حدود سماعت اتے قدغن:
ماسوائے ایہدے کہ ایس قنون وچ کسی ہور طرح ذکر ہووے کسی عدالت نوں ایس قنون توںمتعلقہ امور کرن یا نہ کرن دا حکم دین دا اختیار نہ ہووے گا تے نہ کسی عدالت نوں اختیار سماعت حاصل ہووے گا۔ ایسے امور دی سماعت دا جہدے اتے ایس قنون دا اطلاع ہوندا اے۔
رولز بنان دے اختیارات:
وفاقی حکومت بذریعہ نوٹیفکیشن گورنمنٹ گزٹ دے ایس قنون دے مقصد حاصل کرن لئی رولز بناوے گی۔
بندہ مزدوراں دے حقوق دے تحفظ لئی اگرچہ بے شمار قنون وضع کیتے گئے تے بسااوقات اوہناں وچ حسب ضرورت ترمیماں وی ہوئیاں۔ بالخصوص ساڈے مذہب نے مزدور دے حقوق توں متعلق بڑی وضاحت تے سختی نال احکام جاری کیتے نیں۔ حیرت ایس گل دی اے کہ کدی تے مزدور دے حقوق لئی نعرے لاندے نیں لیکن جیویں ای حکومت دارالحکومت وچ داخل ہوندی اے سارے دے سارے دھرے دے دھرے رہ جاندے نیں تے مزدور طبقہ اک واری فیر دکھ بھری کہانی دا عنوان بن جاندا اے۔
محنت کش مزدور تے غریب طبقہ ملک دی اکثریت اتے مشتمل اے تے ملک دی اقتصادی ترقی ایسے طبقہ دی مرہون منت اے۔ لہٰذا ایہدے وچ کوئی نمک نہیں کہ ملک دا محنت کش طبقہ دی ملکی اقتصادیات وچ ریڑھ دی ہڈی دی حیثیت رکھدا اے۔ ایس لئی کوئی وی حکومت ایس ویلے تک اقتدار نوں استحکام نہیں دے سکدی جدوں تک اوہ محنت کشاں نوں بہبود بہتری‘ بھلائی تے ترقی لئی دوررس نتائج دے حامل اقدامات نہ کرے۔ ویسے وی بنیادی حقوق دا اخلاقی تے قنون تقاضا اے کہ محنت کش نوں اوہدی محنت دا معاوضہ اوہدے پسینہ خشک ہون توں پہلاں ادا کیتا جاوے۔
ساڈے ساریاں اتے ایہہ ذمہ واری عائد ہوندی اے کہ اسیں فضول رسماں تے رواج نوں چھڈ کے غربت دی چکی وچ پسن والے عوام نوں وی دووقت دی روٹی لئی اناج فراہم کریے تاں جے اوہدے توں اوہناں نوں اک دن دی ای سہی خوشی ضرور مل جاوے۔ ارباب اختیار نے جتھے کجھ فضول رسماں نوں ختم کیتا اے اوتھے اوہناں نوں چاہیدا اے کہ اوہ غریب تے نادار طبقہ لئی اوس دن دی مناسبت نال بیروزگاری الائونس دین تے پڑھے لکھے نوجوان طبقہ جہڑا کہ سفارش تے پرچی حاصل کرن توں قاصر نیں نوں میرٹ اتے روزگار فراہم کرن تاں جے ایہہ سال واقعی محنت کش تے غریب طبقہ لئی خوشیاں بھرا سال بن جاوے۔