بی بی کلاں دے کمالات

ڈاکٹر صغرا صدف

ہر بندہ قدرت ولوں ودیعت کردہ کسے خاص مقصد نوں نبھان دی ذمہ داری لے کے ایس دنیا وچ آندا اے جو اپنے آپ نوں دریافت کرکے اپنا طے شدہ کردار چنگی طرح نبھا پائے اوہ دین و دنیا وچ کامیاب ٹھہردا اے۔ کجھ لوکاں نوں وڈے مقصد تے ذمہ داریاں دتیاں جاندیاں نیں تے ایس حوالے نال اوہناں نوں مخصوص صلاحیتاں نال سرفراز کرکے گھلیا جاندا اے۔ اوہ جو ظاہری تے باطنی دوہاں دنیا وچ توازن رکھن تے مامور ہوندے نیں۔ صوفی تے گیانی کہلاندے نیں۔ اوہناں دا وجود معاشرے نوں خیروبرکت دیاں کرناں نال استوار رکھدا اے۔
دنیا وچ مرد تے عورت دوہاں نوں قدرت نے روحانی تے باطنی رہنمائی دا فریضہ عطا کیتا۔ برصغیر وچ عورتاں صوفیاء دی گل کرن تے اجہے سینکڑوں ناں ستاریاں وانگوں روشنی پھیلاندے نظر آندے نیں۔ پر بہت ساریاں ہستیاں اجہیاں وی نیں جہناں دا فیض تے عام ہویا پر اوہ آپ منظرعام تے آ نہ سکیاں۔ لہور شہر دی مٹی وچ کئی عورتاں صوفیاء محو خواب نیں۔ ایہناں وچوں ای اک درویش صفت ہستی حضرت سیدہ بی بی فاطمہ گیلانی نیں جہناں نوں بی بی کلاں دے ناں نال پکاریا جاندا سی۔ اک علمی تے روحانی خانوادے وچ پیدا ہوئیاں۔ ایہناں دے والد سید جیون شاہ جو سید عبدالقادر ثالث گیلانی دے ناں توں معروف نیں اپنے دور دے معتبر تے نیک صفت بزرگ سن بی بی کلاں نو ںقدرت ولوں روحانی کمالات عطا کیتے گئے سن۔ گھر دی صالح تربیت نے باطن دے جوہر دی چنگی تربیت کیتی۔ بی بی خدا دی محبوب ہستی سن ایس لئی اوہناں نوں خیر تے روحانیت دے علمبردار رشتے ناطے عنایت ہوئے۔ قسمت دی مہربانی ویکھو وقت دے ولی حضرت میراں محمد شاہ المعروف حضرت موج دریا بخاری سہروردی تبلیغ دی غرض نال لہور تشریف لیائے۔ لہور دی روحانی ہستیاں نال میل ملاقات ہوئی۔ حضرت عبدالقادر گیلانی نال عقید ت و محبت اجہی ودھی کہ بی بی فاطمہ نال اوہناں دا نکاح ہو گیا۔ حضرت موج دریا بخاری اوہناں دی عبادت گزاری تے تقویٰ توں بڑے متاثر ہوئے۔ اوہناں تے اجے بی بی دی روحانی صلاحیتاں نمایاں نہیں سن ہوئیاں پر اوہ اوہناں دے اعلیٰ اخلاق تے پرہیزگاری نوں بڑا پسند کردے سن۔ بی بی نے آپ وی کدی اوہناں اسرار توں پردہ اٹھان دی کوشش نہ کیتی پر قدرت جدوں ضروری سمجھدی اے آپ ای سارے راز کھولن دے کارن پیدا کر دیندی اے۔
اک واقعے نے والد تے شوہر دے نال نال دنیا تے اوہناں دی حقیقت ظاہر کر دتی۔ کہیا جاندا اے کہ اک دن بی بی نے اپنی چادر دھو کے دھپ وچ خشک ہون لئی پھیلانا چاہی تے عصر دا وقت ہون پاروں صحن چوں دھپ ختم ہو چکی سی۔ صحن وچ موجود بیری دے رُکھ دے اُتے دھپ موجود سی۔ اوہناں نے رُکھ دے کول جا کے اوہنوں جھکن لئی کہیا تاں جے اوہ چوٹی تے چادر پھیلا سکن تے اللہ دی قدرت نال رُکھ نیواں ہو گیا تے بی بی دے چادر پھیلا دین دے بعد دوبارہ اپنی اصلی حالت وچ آ گیا۔ حضرت موج دریا بخاری نے گھر دے باہروں جدوں رُکھ دی چوٹی تے اپنی بیوی دی پھیلی چادر ویکھی تے بڑے غصے دے عالم وچ گھر آئے تے بی بی نوں رُکھ تے چڑھن تے چادر پھیلان تے رنجگی دا اظہار کرن لگے۔ بی بی نے رُکھ دے جھکن دا واقعہ سنایا تے کہن لگے جے ایہ گل اے تے ہن میرے سامنے چادر لاہ کے وکھائو‘ بی بی نے رُکھ دے کول جا کے اوہنوں نیواں ہون لئی کہیا تے اوہ پہلے وانگوں سکڑ کے چھوٹا ہو گیا تے بی بی نے آرام نال چادر لاہ لئی۔ ایہ منظر ویکھ کے حضرت موج دریا بخاری حیرت زدہ ہو گئے کہ اوہناں دی بیوی خدا دی اینی محبوب تے برگزیدہ ہستی اے۔ صوفی ولی بڑے لمے سفر دے بعد اجہی منزل تک اپڑدے نیں۔ اللہ دا شکر ادا کردے ہوئے اوہناں نے بی بی اگے استفسار کیتا کہ اوہ ایس درجے تک کیویں اپڑیاں تے جواب ملیا۔ رب دی کامل اطاعت نال کہ جو رب دا ہو جاندا اے دنیا دی ہر چیز نہ صرف اوہدی تکریم کرن لگدی اے سگوں اوہدی گل سمجھن تے حکم منن لگدی اے۔ بی بی کلاں نے اپنے رب دے ذکر دے نال نال اپنے دوہاں پُتراں تے سید صفی الدین گیلانی تے سید بہائوالدین گیلانی دی بڑی سوہنی پرورش کیتی۔ جہانگیر دے دور وچ 1607عیسوی وچ جدوں اوہناں دی وفات ہوئی تے اوہناں نوں رہائشی مکان وچ ای دفن کیتا گیا۔ ایہ مزار لیک روڈ تے جین مندر تے کپورتھلہ دے درمیان واقعہ اے۔ اک مسجد تے مدرسہ وی ایس مزار دے نال قائم نیں۔ رب دا ذکر کرن والیاں دے مزار تے وی ذکر دی محفل جاری رہندی اے۔ ہو سکے تے کدی اوتھوں گزردے ہوئے ایس دربا ر تے کجھ لمحے فاتحہ پڑھو تے ملک دی تقدیس تے وقار لئی خدائے بزرگ و برتر دے حضور دعا کرو کہ دعا وچ بڑی شفا اے۔٭