موجودہ حکومت تے گینز بک آف ورلڈ ریکارڈ

شکیل امجد صادق

وقت بڑا ظالم اے۔ ایہدی عدالت وچ ظالم نوں معافی نہیں تے نہ بچ نکلن دی کوئی صورت اے تے مظلوم نوں بناں گواہ دے تے بناں وکیل دے انصاف پل بھر وچ مل جاندا اے۔ دوجی گل زندگی اک عارضی شے اے تے ذی روح نوں موت اے۔ فنا ایس کائنات دا پہلا سبق اے۔ جس بندے نے ایہناں گلاں نوں پا لیا تے اوہدے تے عمل کر گیا اوہدے لئی دنیا وچ امن و سکون اے تے آخرت وچ کامیابی اے جنہے جان کے لاعلمی اختیار کر لئی اوہ دوہاں جہاناں وچ آپ اپنی نکامی دے پچھے پے گیا۔ بس اینی جہی گل سمجھن تے سوچن والی اے۔ ایس عمل لئی کسے لمے چوڑے فلسفے تے کسے وڈے علم دی لوڑ نہیں۔
ایہ 1950ء دی گل اے کہ آئرستان دی گینزبریوری دے ڈائریکٹر سرہیوبیور اپنے ساتھیاں دے نال شکار کھیڈ رہے سن۔ اوہ شکار لئی وسیع عریض حداں نوں چھو چکے سن۔ اوہناں نے اک گولڈن پلور تے گولی چلائی پر اوہناں دا نشانہ چوک گیا۔ اوہناں دے ساتھیاں نے جدوں نشانہ خطا ہون تے اوہناں تے طنز کیتا تے اوہناں نے اپنے دفاع وچ کہیا کہ گولڈن پلور یورپ دا تیز ترین پرندہ اے پر اوہناں دے ساتھیاں نے ایس گل نال اتفاق نہ کیتا تے بحث شروع ہو گئی ایس لئی شکار توں واپس جان دے بعد ہیوبیور نے اک دے بعد اک کتاب چھاننی شروع کر دتی کہ اپنے ساتھیاں تے ایہ گل ثابت کر سکن کہ گولڈ پلور واقعتاً یورپ دا تیز ترین پرندہ اے۔
پر کئی دن کئی لائبریریاں دی مٹی چھانن دے بعد اوہناں نوں اندازہ ہویا کہ اجہی کوئی کتاب سرے توں موجود ای نہیں کہ جس وچ تیز ترین‘ بلند ترین‘ امیرترین ورگی کیٹگریز وچ وکھووکھ شخصیات‘ جانوراں یاں مقامات نوں کیٹگرائز کیتا گیا ہووے ایس لئی ہیوبیور نے بذات خود اجہی اک کتاب دی ترتیب تے کم شروع کر دتا جہنوں اج دنیا گینز بک آف ورلڈ ریکارڈ دے ناں توں جان دی اے تے ایس کتاب وچ ہر پہلو تے شعبہ ہائے زندگی تے معلومات میسر نیں جہناں نے انوکھے کارہائے نمایاں کر کے اپنا ناں ایہدے وچ شامل کرایا تے اک اعزاز اپنے ناں کیتا۔
اپریل 2022ء توں اپریل 2023ء اک ورھے دے گھٹ عرصے وچ کنے غریب عوام تے ظلم و ستم دی بارش ہوئی۔ ایہدی تفصیل کجھ ایس طرح اے۔ (1) ڈالر 178 توں 287 دی بلند ترین سطح تے اپڑیا۔ (2) پٹرول 149 توں 272 تک گیا تے کرایوں وچ ڈھیر وادھا ہویا جہدا بھار لوکاں دی برداشت توں باہر ہون لگا۔ (3) آٹا 20 کلو بوری 1300 توں 3200 تک ملنے لگااتے روٹی قیمت 7روپے توں 20روپے دی ہو گئی۔(4) اسٹاک مارکیٹ 47000 توں 39000 دی تھلڑی سطح اختیار کر گئی۔ (5) سیمنٹ 750 توں 1200 تک آگیا۔(6) بجلی 12 روپے یونٹ توں 26 روپے یونٹ دی قیمت اختیار کر گیا۔ (7) کوکنگ آئل 350 توں 600 روپے بلند قیمت وچ ملن لگا تے گھیو کمپنیاں دی چاندی ہو گئی۔ (8) چاول 160 روپے کلو توں 350 روپے کلو تک آگیا تے غریب چاول دے دانے نوں ترسن لگا۔(9) گروتھ ریٹ 6 توں 0.4 فیصد تک چلی گئی۔(10) شرح سود 12 توں 21 فیصد تک پہنچ گئی۔(11) زرمبادلہ دے ذخائر 12 ارب ڈالر توں 9 ارب ڈالر تک چلی گئی۔(12) ایل پی جی 180 روپے کلو توں 300 روپے کلو تک اپڑی تے غریباں دے بلدے چولہے بجھ گئے۔(13) ماہانہ ایکسپورٹ 3 ارب ڈالر توں 2 ارب ڈالر تک چلی گئی۔(14) ترسیلات زر 3 ارب ڈالر توں 2 ارب ڈالر تک آ گئی۔(15) گیس 300 فیصد مہنگی ہوئی۔(16) وکھووکھ سبزیاں 70 روپے کلو توں 170 روپے کلو اپڑن تے غریب عوام گلی سٹری سبزی کھان تے مجبور ہو گئے۔(17) مختلف فروٹ 120 روپے کلو توں 350 روپے کلو تک اپڑ گئی تے عوام فروٹ نوں ویکھ کے دل نوں خوش رکھن تے مجبور ہون لگے۔ (18) دودھ 100 روپے کلو توں 180 روپے کلو تے اپڑی۔ (19)چائے دی پتی 900 روپے کلو توں 1900 روپے کلو پر ہون دے باوجود عوام چائے دیاں چسکیاں توں باز نہیں آئے۔ (20) گڈیاں دی وِکری وچ 80فیصد کمی ہوئی تے لوک پیدل چلن نوں ترجیح دین لگے۔ (21) چینی 84 روپے توں 135 روپے کلو ہوئی۔(22) گڑ 100 روپے توں 150 روپے کلو ہو گیا۔(23) انڈسٹریاں جتھے مزدور نہیں سن ملدے اوہ بند ہو گئیاں تے مزدور در بدر ہو گئے۔ (24) وکھووکھ دالیں 180 روپے کلو توں 400 روپے کلو تک ہو گئیاں تے غریب عوام دال توں وی گئے۔ (25) گاڑیاں 80 فیصد مہنگیاں ہوئیاں۔(26) انڈے 180 روپے توں 300 روپے ہو گئے تے پولٹری مالکان پل بھر وچ امیر ہو گئے۔ (27) خارجہ پالیسی ٹھپ دوست ممالک وی پچھے ہٹ گئے۔(28) بیف گوشت 500 روپے کلو توں 800 روپے کلو(29) مرغی 300 روپے توں 550 روپے تک ہوئی۔(30) کپڑے 60 فیصد مہنگے ہوئے تے لوکاں نوں تن چھپان دے لالے پے گئے۔ (31)شوز 120 فیصد مہنگے ہوئے۔(32) وکھووکھ جوس 140 روپے لٹر توں 300 روپے لٹر ہوئی۔(33) اسٹیشنری 80 فیصد مہنگی ہوئی۔(34) خشک دودھ 1000 روپے کلو توں 1800 روپے کلو تک اپڑیا۔ (35) وکھووکھ ڈرائی فروٹ اوسطا 600 روپے توں 2000 روپے تک گئے۔(36) وکھووکھ شیمپو 300 روپے توں 800 روپے تک گئے۔(37) بیکری دیاں شیواں 300 روپے کلو توں 700 روپے کلو تک ہوئیاں۔ (38) میڈیسن 50 فیصد مہنگے ہوئیاںتے بیمار ہور بیمار ہو گئے تے آخر ایس بیماری دل نے آخر کار کم ای ختم کر دتا۔ (39) ملک تے کل قرضہ 42 ٹریلین توں 54 ٹریلین ہو گیا تے قرض دی مے پی کے ایہ خیال کرن لگے کہ اک دن ساڈی فاقہ مستی کم آوے گی۔ (40) لوکاں دے سارے کیس معاف ہوئے تے معاف شدگان اپنے آپ نوں پاک صاف سمجھن لگے۔
ایہ اوہ معاشی حالات سن جو قارئین دی نظر کیتے گئے پر واضح رہوے ایہ اوہ حکومت اے جہدا ناں تے کارنامے گینز بک آف ورلڈ ریکارڈ وچ لکھے ای جان گے پر ایہدے نال نال اللہ دی عدالت وچ وی لکھے گئے نیں۔ ایہناں دے نامہ اعمال گینز بک آف ورلڈ ریکارڈ توں مٹ سکدے نیں پر لوح محفوظ توں نہیں مٹ سکن گے۔ انسان نوں اوہدے اعمال دی سزا تے بہرحال مل کے ای رہوے گی۔ اقتدار اعلیٰ دا مالک اوہ اللہ اے۔ اوس دن ایہ زمینی خدا تے زمینی حکمران اپنے ظلم دی پاداش وچ ضرور پھڑے جان گے۔ اوس دن ایہناں دا کوئی جج سوموٹو نہیں لے سکے گا تے نہ اوہناں دیاں اپنیاں عدالتاں کم آن گئیاں۔٭