محفل سجناں دی سیالکوٹ ولوں پہلی پنجابی کانفرنس دا اکٹھ

ماں بولی زبان نوں روٹی روزی نال جوڑ دتا جائے تے سارے طبقے اپنے آپ ماں بولی وچ گل بات کرن لگ پین گے

ڈاکٹر اکبر علی غازی

اج مورخہ 30 اپریل 2023 نوں محفل سجناں دی سیالکوٹ نے اک اکٹھ منعقد کیتا جہدے تن حصے سن۔ پہلے حصے دے طور تے پہلی پنجابی کانفرنس رکھی گئی سی جہدے پردھان پنجابی تحریک دے آگو محمد الیاس گھمن ہوری سن۔ ایس اکٹھ وچ ڈاکٹر حفیظ احمد باجوہ تے مدثر اقبال بٹ ہوراں نوں وی سدـا دتا گیا سی۔ ماں بولی پنجابی دے دونویں مان جوگ سیوک آن لئی تیار سن پر کجھ ذاتی کماں دی وجہ توں آن دا ارادہ بدلنا پیا۔
بہرحال اسیں ایہناں دونواں آگوواں نوں نال ای سمجھیا۔ راقم ڈاکٹر اکبر علی غازی تے الیاس گھمن ہوراں نے وی بٹ صاحب دا تذکرہ کیتا تے اوہناں دی حاضری لوائی۔ راقم نے روایت مطابق تلاوت کلام پاک تے نعت رسول مقبول صلی اللہ علیہ و آلہ وسلم توں آغاز کیتا ۔

ایس کانفرنس دے پردھان نوں اپنی صدارتی کرسی تے سدیا گیا تے اوہناں لاچہ کرتہ پایا ہویا سی جدوں کہ پیریں کھُسہ تے سر اُتے اُچے شملے والا کُلا سی۔ ماشاء اللہ روایتی پنجابی لگ رہے سن۔ ڈاکٹر احسان اللہ طاہر، افتخار وڑائچ کالروی تے علی احمد گجراتی اُچیچے پروہنے سن۔ محفل سجناں دی سیالکوٹ دے صدر حافظ محمد انیس طارق ہوراں تے ایس محفل دے سر پرستِ اعلی ڈاکٹر اکبر علی غازی ہوراں وی پگ بنھی ہوئی سی۔
سب توں پہلاں راقم نے گل بات کیتی تے ویکھن تے سُنن والیاں اگے بینتی کیتی پئی گھٹو گھٹ اپنے گھراں وچ تے آپس وچ پنجابی ای بولیا کرو۔ نکی جئی گل بات کرن توں وکھ پنجابیاں توں منگ کیتی پئی اوہ پنجاب وچ پنجابی نوں اونی مانتا ضرور دوان جنی دوجیاں قوماں اپنی ماں بولی نوں دیندیاں نیں۔
ایس توں بعد راقم نے آدری پروہنے افتخار وڑائچ کالروی ہوراں نوں دعوت دتی پئی اوہ اپنی ادبی تنظیم دی نمائندگی کردیاں ہویاں پنجابی زبان تحریک دے حوالے نال اپنے وچار سانجھے کرن۔ ایہناں بڑی بھروی گل کیتی تے پنجاب دے اصل ہیروز دیاں خدمتاں بارے دس پائی تے جعلی ہیروواں دے دھروہ بارے وی چانن پایا۔ ایس توں بعد دل دریا پاکستان دے بانی تے آہری علی احمد گجراتی ہوراں بڑے دھڑلے نال گل بات کیتی تے رلتیاں نوں پنجاب تے پنجابی دی مہانتا بڑے بھرویں طریقے نال سمجھائی۔ ایہناں دا انداز بڑا دلیرانہ تے ناصحانہ سی۔ ایس توں بعد ڈاکٹر احسان اللہ طاہر ہوراں نے اپنے ڈھنگ نال گل اگے ٹوری تے باقی صوبیاں وچ صوبائی زباناں دی حالت اُتے چانن پایا تے دسیا پئی سانوں سندھی ،پشتون تے بلوچ بھراواں وانگ ماں بولی نوں تھاں دوان لئی اگے ودھنا چاہی دا اے۔ پرائمری توں لے کے بارہویں تک پی ایس ٹی، ای ایس ٹی، ایس ایس ٹی تے ایس ایس دے سکیلاں تے وی پنجابی استاد بھرن کرن دی منگ کیتی تاں جے پنجابی نوں روزگار نال جوڑیا جا سکے۔
ایس توں بعد حافظ محمد انیس طارق ہوراں نے گل بات کیتی تے ماں بولی پنجابی نال اپنے پیار پریت دی گل سانجھی کیتی۔

سیالکوٹ دے اک صحافی تے قلمکار مرزا عبدالشکور ہوراں وی گل بات کیتی تے مانواں اُتے زور دتا پئی اوہ بالاں نال پنجابی بولن تاں جے اوہناں دے دلاں وچ پنجابی نال محبت ودھے۔ آخر اُتے کانفرنس دے پردھان چوہدری محمد الیاس گھمن ہوراں نے گل بات کیتی تے گج وج کے پنجابی زبان دا مقدمہ پیش کیتا۔
گھمن صاحب دا اج اک نواں رنگ سامنے آیا پئی اوہناں اک تحریک دے آگو وانگ تحریک دیاں مقصداں نوں پیش کیتا تے آگوواں دے رویے نوں تحریک دے مقصداں نال ہم آہنگ کرن دی لوڑ تے طریقیاں توں وی جانو کرایا۔ پنجابی ماواں جیہڑیاں بالاں نال ماں بولی دی تھاں کوئی ہور زبان بولدیاں نیں ، نوں ڈیفنڈ کرن دی کوشش کیتی تے دسیا پئی اوہناں دی مجبوری نوں وی سمجھنا چاہی دا اے۔
جہڑی وجہ توں اوہ ایس کم لئی مجبور ہوئیاں نیں اوس وجہ نوں ختم کرنا ساڈی ذمہ داری اے۔ اوہناں دسیا پئی کجھ طبقیاں تے تنقید کر کے تحریک نوں اگے نئیں ودھایا جا سک دا۔ سگوں اوس وجہ نوں ختم کرن دی کوشش کیتی جائے جیہڑی ماواں نوں تے دوجے لوکاں نوں دوجی زبان بولن تے مجبور کر دی اے۔ زبان نوں روٹی روزی نال جوڑ دتا جائے تے سارے طبقے اپنے آپ ماں بولی وچ گل بات کرن لگ پین گے۔ ایہہ گل مینوں بڑی چنگی لگی۔پنجابی تحریک دے مان جوگ آگو نے تحریک دے آہریاں لئی متھے ہوئے اصول وی دسے تے بعض معاملیاں وچ سوچ دے پرت ہٹا کے وچلے معنے وی سمجھان دا جتن کیتا۔
ایہ اک کامیاب پنجابی کانفرنس سی جہدے آخر اُتے اوہناں کانفرنس دے بلاوے تے محفل سجناں دی دے سرپرست اعلی ڈاکٹر اکبر علی غازی ، صدر حافظ محمد انیس طارق، بانی محمد عدنان قلزم رانجھا تے جنرل سیکرٹری غلام محی الدین واصف یعنی جی ایم واصف ہوراں نوں سیالکوٹ وچ ایس پدھر دی پنجابی کانفرنس منعقد کروان تے مبارک باد دتی ، سلاہنا کیتی تے رلتیاں دے ذوق شوق تے بھرویں رلت نوں صلاحیا۔ السبطینی میرج ہال وچ ایہہ اکٹھ منعقد کیتا گیا سی، شاعراں تے ادیباں توں وچ سنن والے وی ڈھیر سن۔