ستیاناس ہو جاوے ایہناں دا

لکھت:مظہربرلاس

کئی حکومتاں وچ وزیر رہن والے نے ملکی معیشت تے روشنی پانی چاہی تے فیر اوہ اوہی ہیرا پھیریاں بیان کرن لگا جو معاشی ماہرین کردے نیں۔ ہندسیاں تے لفظاں دے گورکھ دھندے دی مدد نال کہن لگا سانوں ایہ کرنا چاہیدا اے، اسیں اینے سود تے کم کر رہے آں، ایناں سود دے کے سانوں ایہ نہیں بچے گا، اوہ نہیں بچے گا، ساڈی زراعت وچ وی اوہ کجھ نہیں ہو رہیا جو ہونا چاہیدا سی، سانوں ایہدے وچ وی اجیہا کرنا چاہیدا اے جے اجیہا نہیں تے ویسا کرنا چاہیدا اے کیوں جے اسیں نقصان وچ جا رہے آں۔اوہ اک لمحے لئی رکیا تے کسے نے کوئی سوال داغ دتا۔ اوہ اک واری فیر شروع ہو گیا، پہلے ورگے بیان کیتے ہندسے فیر توں بیان کرن لگا، اوہی پرانی گردان فیر توں شروع ہو گئی۔ جدوں گل سنبھل نہیں پا رہی سی تے اوہنے ترپ دا پتا استعمال کیتا تے آکھیا میں لندن سکول آف اکنامکس دا پڑھیا ہویا آں۔ ایہدے تے پہلاں تے مینوں لندن وچ مقیم دانشور نسیم باجوہ یاد آئے جہڑے اکثر آکھیا کردے نیں کہ جدوں قرآن وچ سود منع کر دتا گیا اے تے فیر سود توں فلاح کیویں، سود توں فائدہ کیویں ہو سکدا اے ،سود سراسر گھاٹے دا سودا اےپنجابی بولن والے باجوہ صاحب زبردست بندے نیں پر جدوں پاکستان آن تے رشتے داراں دے چکر وچ اوہناں نوں کدی سیالکوٹ تے کدی جوہر آباد تے سرگودھا جانا پیندا اے۔ دوستاں دے چکر وچ اسلام آباد تے لہور دی یاتر ا وی کرنی پیندی اے۔پہلا خیال تے نسیم باجوہ دے حوالے نال آیا تے دوجا خیال ایہ آیا کہ ایہناں لوکاں نے تے پاکستان دا ستیاناس کیتا اے، ایہو لوک جہڑے دسدے نیں کہ میں لندن سکول آف اکنامکس دا پڑھیا آں، کوئی کہندا اے میں آکسفورڈ دا پڑھیا آں، کوئی ہارورڈ تے کوئی کیمبرج دا رعب جماندا اے۔ایہناں لوکاں نے پاکستان نوں بربادیاں دا راہ وکھایا، ایہو لوک مسئلے حل کرن دے ناں تے مسئلیاں وچ وادھا کردے رہے۔ پچھلے 50,40سالہ حکمرانی دا قصہ تے سب دے ساہمنے اے، ایہناں 50,40ورھیاں وچ ایہناں کالے انگریزاں نے ملک نوں مقروض بنایا، ملکی مسئلیاں وچ وادھا کیتا، اوہناں نے پاکستان دی سماجی زندگی برباد کیتی، ایہناں دے کرتوتاں نے ساڈے معاشرے توں حسن کھوہیا، شاعری تے موسیقی کھوہی، برداشت کھوہی، اوہناں نے زندگی نوں ایناں تنگ کیتا کہ زندگی ہچکیاں لین تے مجبور اے۔ایہ لوک پاکستان نوں بھنور وچ لے آئے، ایہناں دے لوک گرداب توں نکلن دا کوئی راہ نہیں، ایہ سانوں ہور ڈونگھے پانیاں ول لے جاندے نیں۔ انج کیوں اے کیوں جے ایہ لوک کجھ ابتدائی کلاساں وڈے نجی سکولاں وچ پڑھن دے بعد برطانیہ تے امریکہ وچ پڑھدے نیں، ایہناں دی جوانی مغرب وچ لنگھدی اے تے مغرب دے مسئلے ساڈے معاشرے توں وکھرے نیں ایسے لئی جدوں ایہ لوک واپس آ کے حکمرانی کردے نیں تے بجائے مسئلے حل کرن دے مسئلے ودھا دیندے نیں۔ایہ لوک اپنے شاہانہ طرز زندگی نوں برقرار رکھن لئی ملکی وسیلیاں دی پروا نہیں کردے سگوں ملک دے ناں تے قرضے حاصل کردے نیں۔ کدی اوہناں دی قربت وچ بیٹھ کے ویکھو تہانوں اندازہ ہووے گا کہ اوہناں دی ساری توجہ سوٹ، نکٹائیاں، جتیاں، گھڑیاں تے گڈیاں تے ہوندی اے، کجھ اک تے جہازاں دی گل کردے نیں، ایہ کلاس پاکستان دی اک فیصد توں وی گھٹ اے تے بدقسمتی نال ایہو حکمران کلاس اے ایسے لئی تے پاکستان وچ جمہوریت نہیں، پاکستان وچ ہمیشہ جمہوریت دے ناں تے اقلیت نے اکثریت تے حکومت کیتی اے۔پاکستان دے 99فیصد عوام لمے عرصے توں محکوم نیں، شاید ایسے لئی پاکستان وچ زیادہ ترقی آمرانہ ادوار وچ ہوئی کیوں جے جمہوری دور وچ تے اوہ کلاس حکمران رہی جہناں نوں صرف اپنی فکر رہندی اے، ایس کلاس دے لوک وی عجیب نیں، تقریراں اردو وچ کردے نیں، فیصلے انگریزی وچ لکھدے نیں، ایہناں وچوں بہت ساریاں نوں تے اردو وچ تقریر وی کرنی نہیں آندی، بس اوہ ونگی اردو نال کم چلاندے نیں۔ پاکستان وچ سب توں وڈی بیماری وی عجیب اے، لوک اپنے آپ نوں بہتر ثابت کرن لئی انگریزی دا سہارا لیندے نیں حالاں جے برطانیہ دے پاگل خانیاں وچ سب انگریزی بولدے نیں، اوتھے جھاڑو دین والا وی انگریزی بولدا اے، انگریزی صرف اک زبان اے، قابلیت دی علامت نہیں پر ساڈے لوک سادے نیں۔ زبان وچ ذہانت لبھدے نیں۔خواتین و حضرات! پاکستان تے حکمرانی کرن والے روپے وچ نہیں ڈالر وچ سوچدے نیں، شاید اوہناں نوں روپے توں ودھ ڈالر نال غرض اے۔ دن رات آئین دی گلاں کرن والیاں دی حالت ایہ اے کہ 1973ء وچ اقرار کیتا گیا سی کہ اگلے پندرہ ورھیاں وچ اردو نوں نافذ کر دتا جاوے گا پر اج 50ورھے ہون نوں نیں، اجے تک سرکاری خطوط دی زبان نہیں بدلی، مقابلے دے امتحان دی زبان نہیں بدلی۔آئین دے نال ایہدے توں وڈا مذاق کیہ ہو سکدا اے، ایہدے توں وڈی بددیانتی کیہ ہو سکدی اے۔ ایس ملک دے بابو وی ایہدے وچ خوش نیں۔ ایس ملک دے عدالتی نظام وچ وی اجے تک غلامانہ علامتاں سر چڑھ کے بولدیاں نیں۔ کدی عدالتاں وچ بحث دے مناظر ویکھو، اک دوجے نوں مخاطب کرن دے انداز ویکھو تے تہاڈے تے سب واضح ہو جاوے گا۔سپریم کورٹ آف پاکستان نے فیصلہ دتا سی دفتری، سرکاری زبان اردو ہووے گی پر اجے تک سپریم کورٹ توں فیصلے وی انگریزی وچ آ رہے نیں۔پاکستان وچ حکمراناں دی کلاس عام بندے دا راہ روکدی اے، ایسے کلاس نے پاکستان وچ چیزاں دا ستیاناس کیتا اے، ایس کلاس دی کارکردگی صفر اے۔اوہناں نوں لوکاں دے مسئلیاں دا پتہ ای نہیں، بھارت وچ لالوپرشاد یادیو تے کیجریوال دی مثال دتی جا سکدی اے، ساڈے ایتھے ایہ مثال وی نہیں پر اسیں فیر وی محسن نقوی دے اشعار پیش کرنے آں کہ
دل سے لٹ کر بھی سخاوت کی تمنا نہ گئی
کوئی اجڑا ہوا آئے تو دعا لے جائے
جس کا دامن بھی محبت سے ہو خالی محسن
ہم غریبوں سے زرِ عہدِ وفا لے جائے