امریکہ وچ سیاہ فام محفوظ نہیں

آئے دن سیاہ فاماں نال ناروا سلوک دی خبراں نظراں سامنے آندیاں رہندیاں نیں

لکھت:شہباز چودھری

امریکا دے ٹیلی ویژن چینل اے بی سی نیوز دے پروگرام ’دی ویو‘دی سیاہ فام میزبان وہوپی گولڈ برگ (Whoopi Goldberg) نوں ایس بنا تے دو ہفتے لئی معطل کردتا گیا کہ ا وہناں نے اپنے تازہ پروگرام دے دوران دوجی جنگ عظیم دے دوران نازی فوج دے ہتھوں یہودیاں دے قتل بارے آکھیا سی کہ ایہہ نسلی بنیاداں اتے کیتی گئی کارروائی نہیں سی تے ایہدے وچ سفید فام لوکاں دے دو گروہ ملوث سن ۔ گو کہ وہوپی گولڈ برگ نے پروگرام مگروں ایس گل تے معافی وی منگ لئی سی لیکن ایہدے باوجود اے بی سی نیوز نے اوہناں نوں معطل کردے ہوئے آکھیا اے کہ اوہناں دی گل غلط تے تکلیف دہ سی۔ چینل ولوں ایہہ وی آکھیا گیا اے کہ ایس بارے سوچنا تے سکھنا چاہیدا اے کہ اوہناں دی ایس گل پاروں (یہودیاں تے) کیہ اثر ہویا ہووے گا۔ چینل دی انتظامیہ نے اپنے بیان وچ یہودیاں دے نال یکجہتی دا اظہار وی کیتا اے۔ وہوپی نے پروگرام وچ جو کجھ آکھیا اوہ اوہناں دے لفظاں وچ کجھ انج سی:
(سانوں سچی گل آکھنی چاہیدی اے‘ ہولوکاسٹ نسل پرستی توں متعلق نہیں‘ واقعی نہیں۔ ایہ انسان دے دوجے انساناں لئی غیر انسانی رویے توں متعلق اے‘ ایہ اوقعی ایس بارے وچ اے۔ ایہ سفید فام افراد دے دو گروہ نیں… تسیں بنیادی نکتہ نہیں سمجھ رہے… سانوں ایہدے تے ویسے گل کرنی چاہیدی اے جہڑی ایہ واقعی اے۔ ایہہ ایس بارے وچ اے کہ لوکی اک دوجے نال کیہ سلوک کردے نیں۔ ایہہ اک مسئلہ اے۔ ایس توں فرق نہیں پیندا کہ تسیں سیاہ فارم او‘ سفید فام یا یہودی… ہر کوئی دوجے اتے ظلم کر رہیا اے)۔
یہودیاں دی مختلف تنظیماں نے وہوپی گولڈ برگ دے ایس تبصرے اتے ردعمل دا اظہار کردے ہوئے ایس تبصرے نوں ’خطرناک‘ قرار دتا اے تے امریکا تے یورپ دا شاید ای کوئی وڈا صحافتی ادارہ ایسا ہووے گا جہنے ایس خبر نوں بہت زیادہ اہمیت دیندے ہوئے نہ صرف اپنے کول جگہ نہ دیتی ہووے بلکہ ایہدے تے یہودی تنظیماں دا ردعمل وی شائع نہ کیتا ہووے۔ علاوہ ازیں ایس واقعے توں متعلق خبراں وچ ہولوکاسٹ دی یہودی نقطہ نظر دے مطابق وضاحت وی کیتی گئی اے۔ مغربی صحافتی اداریاں نے ایس خبر نوں جہڑی غیر معمولی اہمیت دتی اے اوہدے توں اندازہ ہوندا اے کہ یہودی مغرب دے پورے نظام اتے کس طرحاں چھائے ہوئے نیں تے اوتھے کسے وی شخص نوں کوئی ایسی گل آکھنا جہڑی یہودیاں دی ناپسندیدگی دا کارن بن سکدی ہووے‘ کنا مہنگا پے سکدا اے۔ ایہہ اپنی نوعیت دا پہلا واقعہ نہیں اے تے ہن توں تقریباً اک دہائی پہلے پیش آن والا اک ایسا ای واقعہ ایس خاتون لئی سنگین نتائج دا حامل ثابت ہویا جہنے اسرائیل دے خلاف گل کیتی سی۔
ایہ واقعہ کجھ انج اے کہ 2010وچ ہیلن تھامس نامی خاتون رپورٹر نوں امریکی صدر دی سرکاری رہائش قصر سفید دے سبزہ زار وچ اک یہودی نشریاتی ادارے نوں دتے گئے انٹرویو دے دوران اک سوال دے جواب وچ اسرائیل مخالف گل آکھن تے نہ صرف معافی منگنی پئی سی بلکہ اوہناں نوں نوکری توں وی برخاست کردتا گیا سی۔ ہیلن اوس ویلے امریکہ دی بزرگ ترین صحافی سن تے 1960 دی دہائی وچ امریکی صدر جان ایف کینیڈی دی انتظامیہ دے دوران اوہ قصر سفید دی کوریج کرن والی پہلی خاتون سن۔ اپنے طولمے رپورٹنگ کیرئیر دے دوران اوہناں نے دس امریکی صدراں دی پریس کانفرنساں وچ رلت کیتی لیکن مذکورہ واقعے مگروں ہیلن دے معافی منگن دے باوجود نہ صرف اوہناں نوں نوکری توں کڈیا گیا بلکہ اوہناں دے ہفتہ وار کالم دا سلسلہ وی روک دتا گیا تے قصر سفید دے ترجمان تے اوتھوں دے صحافیاں دی تنظیم دے خلاف شدید ردعمل دا اظہار کیتا۔
ایہ سب کجھ ایسے مغرب وچ ہویا تے ہو رہیا اے جہڑا خود نوں انسانی حقوق تے آزادی اظہار دا علم بردار آکھدا اے تے ایہ دعویٰ کردا اے کہ ایہنوں آزادی اظہار نال اینی محبت اے کہ اوہ لوکاں اتے کسے وی قسم دی پابندی عائد نہیں کردا۔ ایسے گل نوں بنیاد بنا کے مغرب ولوں مسلماناںکولوں پیغمبر اسلامﷺ دے خلاف ہون والے مذموم تے ہتک آمیزگلاں نوں وی برداشت کرن دا تقاضا کیتا جاندا اے۔ا ک خوش آئند گل ایہ اے کہ ہن مغرب وچ ایس حوالے نال احساس پیدا ہو رہیا اے کہ جناب رسالت مآبﷺ توں متعلق گلاں نوں آزادی اظہار دا ٹھپا لا کے قابل قبول نہیں بنایا جا سکدا۔ ایسے سلسلے وچ روسی صدر ولادیمیر پیوٹن نے دسمبر 2021د ے آخروچ اپنی سالانہ پریس کانفرنس دے دوران آکھیا کہ پیغمبر اسلامﷺ دی شان وچ گستاخی آزادی داظہار دی خلاف ورزی اے جہدی اجازت نہیں دتی جا سکدی۔ ایسے طرحاں کجھ دن پہلے کینیڈین وزیراعظم جسٹن ٹروڈو نے وی اسلاموفوبیا نوں ناقابل قبول قرار دیندے ہوئے آکھیا اے کہ سانوں ایس نفرت انگیز عمل نوں روکن دی لوڑ اے۔ ہونا ایہ چاہیدا اے کہ اقوام متحدہ دے پلیٹ فارم نوں استعمال کردے ہوئے بین الاقوامی سطح تے ایس گل دا احساس پیدا کیتا جاوے کہ کسے وی مذہب دے مقدسات دی توہین صرف لوکاں دی دل آزاری دا باعث ای نہیں بندی بلکہ نفرت تے تعصب دے اک ایسے سلسلے نوں ہوا دیندی اے جہدا لازمی نتیجہ شدت پسندی دی صورت وچ نکلدا اے!