مہنگائی دے مارے

میٹرک وچ فیل ہویا پڑھائی چھڈ کے کسی الیکٹریشن دے نال اوہدا چھوٹا بن کے الیکٹریشن دی ٹریننگ لین لگیا: اچھوتی لکھت

لکھت:عبداللہ بھٹی

بہت سالاں مگروں مینوں میرے دوست میاں جی دا فون آیا۔ ہائی سکول وچ میرا کلاس فیلو سی۔ میٹرک وچ فیل ہویا پڑھائی چھڈ کے کسی الیکٹریشن دے نال اوہدا چھوٹا بن کے الیکٹریشن دی ٹریننگ لین لگیا۔ پوش انسان سی جدوں ایس مزدوری اتے لگیا تے شرمندگی دی دلدل وچ پھدا چلا گیا۔ دوستاں توں وی دور ہو گیا۔ میں کالج فیر یونیورسٹی تے مگروں نوکری دے سلسلے وچ کوہ مری چلا گیا تے سلسلہ ختم ہو کے رہ گیا۔کجھ سال پہلاں ایہدے کسی عزیز نے میری روحانی گلاں تے سلسلے دا ذکر کیتا ۔ نال ایس خواہش دا اظہار وی کہ اسیں پروفیسر صاحب نال ملنا چاہنے آں۔ ایس بیچارے نے بڑھک ماری کہ میں کلاس فیلو آں۔ ہن ایہدا میرے نال رابطہ نہیں سی۔ ایہنے لوکاں کولوں میرا نمبر لیتا تے کئی سالاں مگروں مینوں فون کیتا۔
پہلاں تے مینوں پہچانن وچ مشکل پیش آئی لیکن تھوڑی گل بات مگروں میں پہچان گیا تے بہت خوش ہویا تے بولیا یار توں بہت وڈا بندا بن گیا اے میں مزدور دا مزور لیکن جے توں میری مدد کرے تے میں بہت احسان مند ہوواں گا۔ میں خوشدلی نال آکھیا میاں توں حکم کر کیہ کم اے تے بولیا یار میری میری دھی تے تیری بھتیجی دے سسرال والیاں دے عزیز تیرے نال ملنا چاہندے نیں۔
میں اوہناں دے سامنے ایہہ برھک ماری اے کہ توں میرا کلاس فیلو تے دوست ایں جد کہ حقیقت وچ اسیں کئی سالاں توں ملے ای نہیں۔ ہن میں اوہناں دے نال کسی دن تیرے نال ملن آواں گا۔ یار توں چنگی طرح مل لئی دھی دا سسرال اے میری عزت بن جاوے گی۔ ساری گل سنن مگروں میں پرجوش انداز وچ میاں نوں آکھیا توں بے فکر ہو جا جدوں تسیں لوکاں نے آنا ہووے گا اک دن پہلاں دس دینا میں پوری تسلی نال پورا پروٹوکال دے کے ملاں گا تے تہاڈی بلے بلے وی کرا دیاں گا فیر مقرہ دن میاں اوس خاندان نوں لے کے میرے گھر آیا۔ میں خوب آئو بھگت دی خدمت کیتی۔ چنگی طرح ملیا۔ جدوں گل بات کیتی میاں جی دی بہت تعریفیاں کیتیاں جہڑی اوہناں لوکاں دا مسئلہ سی۔ اوہدے لئی ذکر اذکار دسے تے بہت خوش ہو کے واپس چلے گئے۔ ایہہ میرا سالاں مگروں میاں جی نال دوبارہ رابطہ سی۔ ہن میاں جی مینوں کدی کدار فون کر دیندا میں پہچان گیا سی کہ ویچارہ غربت دی چتا اتے سلگ رہیا اے ایس لئی مختلف بہانیاںنال اوہدی مدد تے تحفے تحائف دیندا رہندا۔ میاں میرا بہت احسان مند سی مینوں وی جوانید ے دوست دے ناطے چنگا لدا سی۔ ہن ساڈا رابطہ بحال ہو چکیا سی۔ بقرہ عید دا چن نظر آیا تے مینوں ایہدا فون آیا میرا حال چال پچھنا شروع کیا۔ ایدھر ادھر سکول دی گلاں کرن لگیاکافی دیر تک ساڈی گل بات جاری رہی۔ ایس دوران میں نوٹ کیا۔ میں جدوں وی گل ختم کرن دی کوشش یا الوداعی کلمات بولدا تے میاں گل نوں طول دے کے سلسلہ اگے ودھا دیندا جدوں دوران گل بات دو تن واری اوہنے گل نوں طول دتی تے مینوں سمجھ آ گئی کہ میاں دے دل وچ کوئی گل اے وہ کرنا چاہندا اے لیکن سفید پوشی دی وجہ نال کر نہیں پا رہیا۔ میاں میرے کولوں کوئی مدد چاہ رہیا سی لیکن اوہدی خودداری اوہنوں روک رہی سی لہٰذا ہن میں پہل کیتی تے آکھیا میاں یار اج کل حالات کیویں دے نیں مہنگائی بوہتی اے قربانی دے جانور بہت مہنگے نیں۔ تسیں قربانی دا جانور لے لیتا۔ ایہہ میاں دی دکھدی رگ سی پھٹ پیا: یار مہنگائی نے تے جان ای کڈ دتی اے سارا سال بچیاں نال وعدہ کردا رہیا کہ ایس واری اسیں اپنی قربانی کراں گے دھی دے سسرال دے سامنے عزت دا وی معاملہ اے کہ اسیں قربانی کیتی کہ نہیں لیکن جہنے پیسے میرے کول نیں اوہناں وچ تے جانور نہیںآ سکدا۔ ایس پریشانی وچ تہانوں فون کیتا اے یار تہاڈے تے بہت دوست مرید وی نیں کسی دے کول سستے جانور نیں تے مینوں کوئی قربانی دا جانور لے دیو مینوں ساری صورتحال دی سمجھ آ گئی کہ بیچارہ میاں اینی دیر توں کیوں میرے نال گل کر رہیا اے۔ میں میاں نوں حوصہل دتا یار تسیں پریشان نہ ہووے میرے دوست دے کول قربانی دے جانور ہیں اوہ نیکی لئی ہر سال پال کے ویچدا اے میں اوہدے کولوں جانور منگوا لوواں گا تسیں آ کے لے جانا۔ میاں بہت خوش ہویا فیر میں میاں نوں بلا کے جہنے پیسے اوہدے کول سی لے کے قربانی دا جانور اوہدے حوالے کیتا۔ بیچارہ بہت خوش ہویا تے اطمینان بھریا چہرہ لے کے شکر گزار نظراں نال ویکھدا ہویا واپس چلا گیا لیکن مینوں بہت پریشان کر گیا۔ مہنگائی دے ایس ہوشربا طوفان وچ غریب عوام کس طرح قربانی دے مہنگے جانوراں نوں خریدن دی ہمت کردے ہون گے۔ پچھلی حکومتاں دی نااہل پالیسیاں تے لٹ مار دی وجہ نال وطن دا بچہ بچہ قرض وچ جکڑیا ہویا اے۔ روپے دی ڈگدی پوزیشن ڈالر دی اچی اڑان مہنگائی دا اژدھا منہ کھولے غریباں نوں ڈسدا جا رہیا اے۔ ویچارے غریب عوام ظلم غربت دی چکی وچ دن رات پسدے جا رہے نیں۔ ایس مہنگائی وچ کس طرح دال روٹی پوری کردے نیں۔ اتوں مہنگائی تے مہنگے جانور جہناں دی قیمتاں اسمان نوں چھو رہیاں نیں۔ سفید پوش طبقہ جہنوں معاشرے وچ عزت دے نال زندہ رہن لئی قربانی وی کرنا اے کس طرح ایس مہنگائی دے طوفان وچ زندہ نیں ہر لنگھدا دن وطن عزیز وچ مہنگائی دے گراف نوں اچا کردا جا رہیا اے۔ مہنگائی ایس قدر کہ لوکاں دی قوت خرید دے بس توں باہر بیچاری عوام بے یارومددگار جانوراں دے ریوڑ وانگوں کھلے اسمان تھلے ننگے پیر نس رہی اے۔ کوئی پچھن والا نہیں۔ ہر سیاسی جماعت ہر لیڈر ایہناں بیچاریاں نوں سہانے سفنے وکھا کے اپنے پچھے لاندا اے لیکن کجھ مہینے مگروں ای بیچاریاں نوں پتہ چلدا اے کہ ایہہ جماعت تے لیڈر وی پرانے وانگوں ای اے ایہہ وی بھیس بدل کے نویں طریقے نال بے وقوف بنا دتا کسی لیڈر سیاسی جماعت نوں ایہہاں مظلوم لوکاں اتے ترس نہیں آندا۔ تسیں ایہناں لیڈراں دے درباریاں مداریاں جگادریاں دی جگالی ویکھو کس طرح دن رات مدح سرائی دے ریکارڈ توڑدے نیں۔ لفظاں دی جادوگری تے سہانے سفنیاں دا سلسلہ چلاندے نیں۔ اپنے لیڈراں نوں قائداعظم دا جانشین تے مسیحا اعظم قرار دیندے نیں۔ سارے مسائل غربت دا حل صرف اوہناں دے لیڈردے کول اے جد کہ سچ تاں ایہہ اے کہ جہڑا وی اقتدار دے کوٹھے اتے براجمان ہویا اوہنے اپنی مادی سلطنت نوں استحکام بخشیا۔ اپنے دوستاں رشتہ داراں نوں نوازیا ایہہ سیاسی لیڈر جونکیں نیں جہڑے کئی عشریاں توں غریب عوام دا لہو چوس رہیاں نیں غربت دے مارے ایہہ غریب لوک بیچارے ایہناں لفظاں دے جادوگراں دے بیانات‘ تقریراں اتے یقین کر کے فیر ایہناں دے پچھے لگ جاندے نیں۔ کسی نوں وی ایہناں بے آسرا بے یارومددگار انساناں اتے ترس نہیں آندا۔ اوہ دن پہلاں اک بڈھے غریب داڑھی والے شخص نے غربت توں تنگ آ کے ریلوے لائن اتے ریل گڈی دے تھلے آ کے خودکشی کر لیتی۔ اوس بیچارے دا چٹی داڑھی والا چہرہ تن توں جدا زمین اتے ماتم کر رہیا سی۔ باقی دھڑ ریلوے لائن اتے پاکستان دے چپے چپے اتے غریب عوام ہوشربا مہنگائی دے طوفان وچ زندگی دی بازی ہار رہے نیں۔ پتہ نہیں خدا نوں کدوں ایس مظلوم عوام اتے ترس آوے گا کوئی نجات دہنداہ ایہناں غربت دے ماریاں نوں غربت دی دلدل توں کڈے گا۔