چینی سرمایہ کاراں دی سکیورٹی تے وزیراعظم دی تشویش

اسد اللہ غالب

وزیراعظم شہباز شریف نے پچھلے ہفتے گوادر دا دورہ کیتا۔ ایس موقعے تے اک تقریب نال خطاب کردے ہویاں چینی سرمایہ کار کمپنیاں نوں اوہناں نے زبردست خراج تحسین پیش کیتا۔ جہڑی سی پیک دے تحت مختلف منصوبیاں اتے بڑے انہماک نال کم کر رہیاں نیں۔ وزیراعظم نے آکھیا کہ چین ساڈا پرانا تے آزمودہ دوست اے۔ اوہ ہر اوکھے ویلے وچ ساڈے نال کھڑا نظر آیا اے۔ شاہراہ ریشم دی تعمیر ایہدا اک عظیم کارنامہ اے۔ جہدے وچ چینی ہنرمنداں نے اپنی جاناں دا نذرانہ وی پیش کیتا۔ وزیراعظم نے آکھیا کہ پاک چین دوستی ہمایلہ توں اچی‘ سمندر توں ڈونگی تے شہد توں بوہتی مٹھی اے۔ چین نے نہ صرف معاشی محاذ اتے ساڈی دست گیری کیتی بلکہ خارجہ پالیسی دے میدان وچ وی اوہنے ساڈی آواز دے نال آواز لائی۔ سی پیک منصوبیاں دے تحت چین دی بھرواں کوشش اے کہ اوہ پاکستان دی صنعتی‘ تجارتی تے معاشی ترقی وچ اہم کردار ادا کرے۔
سی پیک اک گیم چینجر منصوبہ اے جہدی وجہ نال پاکستان تے چین تن براعظماں توں تجارتی رابطے وچ منسلک ہو سکدے نیں۔چین ایس منصوبہ نوں انتہائی قدر دی نظر نال ویھکدا اے تے اوہدی چھیتی توں چھیتی تکمیل دا خواہاں اے تاں جے پاکستان وچ لوڈشیڈنگ دے انھیرے دور ہون۔ غربت وچ کمی واقع ہووے‘ صنعت و تجارت پھلے پھلے‘ پاکستانی عوام لئی روزگار دے موقعے وسیع ہون۔ وزیراعظم نے انتہائی افسوس دا اظہار کردے ہوئے آکھیا کہ کجھ بیرونی قوتاں سی پیک نوں کامیاب ہوندا نہیں ویکھ سکدیاں تے اوہ اوہدے رستے وچ روڑے اٹکا رہیاں نیں۔ ایس مقصد لئی اوہ براہ راست وی سرگرم عمل نیں تے مقامی سہولت کاراں دے ذریعے سانوں اوہناں دی حفاظت کرنی چاہیدی اے لیکن بعض شرپسند عناصر اوہناں نوں نشانہ بناندے نیں جہدے توں چینی کارکناں دی حوصلہ شکنی ہوندی اے۔اگرچہ پاکستان دے سکیورٹی ادارے پوری طرح چوکس نیں لیکن جدوں گھر دے اندروں شرپسند کارروائیاں کرن گے تے اوہدے توں پاکستان دے مفادات اتے ضرب لگدی اے۔ وزیراعظم نے ایہہ وی دسیا کہ جدوں اوہ وزیراعلیٰ سن تے پاکستان وچ لوڈشیڈنگ دے انھیریاں دا راج سی۔ بیرزوگاری ودھ رہی سی تے عوام شدید عدم تحفظ تے بے یقینی دا شکار سن۔
چین نے ایس موقعے اتے ساڈا ہتھ پھریا تے فراخدلانہ سرمایہ کاری کر کے تھرمل‘ سولر تے کوئلے دے بجلی گھراں دا جال وچھا دتا۔ سانوں چین دے اوہناں احساناں نوں نہیں بھلنا چاہیدا۔ وزیراعظم نے دسیا کہ اوہ چینی صدر نال ملے نیں تے اوہناں نال بڑی لمی تے مفید گل بات ہوئی اے۔ اک موقعے اتے چینی صدر نے آکھیا کہ وزیراعظم صاحب تسیں شاید پہلی واری اپنا منصب سنبھالن مگروں تشریف لیائے اوایس لئی پہلی ملاقات وچ تسیں ہچکچا رہے او تے حرف مدعا تہاڈی زبان اتے نہیں آ رہیا۔ لیکن میں تہاڈے ولوں یقین دوانا واں کہ تسیں خاطر جمع رکھو۔ چین ہمیشہ وانگوں پاکستان وچ ارباں ڈالر دی سرمایہ کاری جاری رکھے۔ وزیراعظم نے آکھیا کہ چینی صدر دی ایہہ گل سن کے میرا حوصلہ ودھیا تے اپنے عوام نوں ایہہ گل دسن دا مقصد ایہہ اے کہ اوہ چین دے جذبیاں دی قدر کرن تے شرپسنداں‘ تخریب کاراں تے ات گرداں دے ہتھاں وچ نہ کھیڈن۔
ایہدے وچ کوئی شک نہیں کہ امریکہ تے یورپ جئی وڈی طاقتاں سی پیک جئے گیم چینرمنصوبے دی مخالفت وچ دن رات اک کیتے ہوئے نیں تے بھارت تے کھلم کھلا بلوچستان تے پاکستان بھر وج ات گردی دی کارروائیاں وچ ملوث اے۔ کلبھوشن دا ات گردی وچ ملوث نیٹ ورک رنگے ہتھوںپھڑیا جا چکیا اے۔ بھارتی وزیراعظم نریندر مودی کھلے عام آکھ چکے نیں کہ اوہ بلوچستان‘ کشمیر تے گلگت بلتستان دے عوام نوں اوہو حقوق دوان گے جہڑے 1971 وچ بھارت نے بنگلہ دیش نوں دوائے سن۔ بھارتی وزیراعظم دا ایہہ بیان پاکستان دی دھرتی نوں ٹکڑے ٹکڑے کرن دی سازش دا اعتراف تے پاکستان نوں کھلی دھمکی دے مترادف اے۔امریکی تے نیٹو فورسز 20 سال تک افغانستان وچ ڈیرے پائے بیٹھیاں رہیاں۔ ایس دوران بھارت نے کھلم کھلا افغانستان دے اندر بیٹھ کے پاکستان دے اندر گھس کے ات گردانہ کارروائیاں کیتیاں۔ افغان فوج نوں تربیت دین دے بہانے بھارت نے دراصل پاکستان وچ ات گردی دی ٹریننگ لئی کیمپ قائم کیتے سن تے ایسا طوفان بدتمیزی مچایا کہ پاکستان دے طول و عرض وچ خودکش دھماکے شروع ہو گئے۔نہ گھر محفوظ سن‘ نہ بازار‘ نہ سکول محفوظ سن ‘ نہ مسجد‘ مزار تے امام بارگاہواں محفوظ سن۔ سکیورٹی اداریاں دے دفتراں اتے وی حملے کیتے گئے‘ کامرہ تے واہ آرڈیننس فیکٹریاں نوں بار بار نشانہ بنایا گیا۔ تربیلا وچ کمانڈوواں دے ٹریننگ سنٹراں اتے حملہ ہویا۔ حتیٰ کہ جی ایچ کیو نوں وی نہیں بخشیا گیا۔ پاکستان دی جگہ کوئی ہور ملک ہوندا تے حوصلہ ہار بیٹھددا تے ات گرداں دے سامنے سرنڈر کر دیندا۔ لیکن پاکستان دی بہادر فوج نے ات گرداں دا پچھا کیتا۔ اوہناں دے ٹھکانیاں دا سراغ لایا تے ٹھیک ٹھیک نشانے لا کے اوہناں نوں ملیامیٹ کر کے رکھ دتا۔ بلاشبہ ایس جنگ وچ پاکستان نوں بہت وڈی قربانیاں دینی پئیاں۔ 80 ہزار پاکستانیاں نے جام شہادت نوش کیتا تے پاکستان معیشت نوں ڈیڑھ سو ارب دا نقصان پہنچیا لیکن آفریں اے افواج پاکستان تے دوجے سکیورٹی اداریاں دی کہ اوہناں نے ایس لمی جنگ وچ فتح حاصل کیتی۔
افواج پاکستان دی ایہہ عظیم الشان مثالی کارکردگی پوری دنیائے عالم لئی مشعل راہ اے کیوں جے امریکہ تے یورپی افواج نے دنیا بھر وچ ات گرداں نال متھا لایا تے اوہناں نوںاپنے مقصداں وچ کامیابی حاصل نہیں ہو سکی۔ پاکستانی افواج نے ات گردی دی جنگ وچ کامیاب ہو کے دنیا لئی روشن مثال قائم کیتی اے۔
انج لگدا اے کہ دشمن دے سازشی منصوبے اجے جاری نیں۔ بلوچستان دے بعض سیاسی لیڈر بھارت وچ پناہ گزیں نیں۔ بلوچستان لبریشن آرمی دی بھارت ولوں پٹھ ٹھونکی جا رہی اے۔ پاکستان جاندا اے کہ اوہنوں ات گردی دے آخری ہلے نوں وی نکام بنانا اے ایس لئی وزیراعظم اقتدار سنبھالن مگروں دو واری بلوچستان دا دورہ کر چکے نیں۔ اوہ سینہ چوڑا کر کے ات گرداں نوں للکار رہے نیں تے اوہناں دے سہولت کاراں نوں شرم دوا رہے نیں کہ چین جیا پاکستان دا مسلمہ دوست فراخدلی نال پاکستان دی مدد کر رہیا اے تے اسیں الٹا اوہناں دے کارکناں تے عملے نوں پاکستان توں نسانا چاہندے نیں۔ وزیراعظم نے واضح کیتا کہ اوہ دشمن دے عزائم نوں ہرگز کامیاب نہیں ہون دین گے تے سی پیک نوں چھیتی توں چھیتی پایہ تکمیل تک پہنچا کے پاکستان نوں اک عظیم معاشی انقلاب دے رستے اتے گامزن کرن گے۔