نفرتاں دے بیں

محمدصغیر قمر

اک عام سطح دی مہذب ریاست دے حکمران تے ادارے ہمیشہ ایس فکر وچ رہندے نیں کہ ریاست دے دستیاب وسیلے ونڈن ویلے شہریاں دے بنیادی حقوق دا خیال رکھیا جاوے۔ جو شہری جنی قربانی قومی مفاد لئی دے رہیا اے اوہنوں اوس قربانی دا بدلا دتا جاوے تاں جے اوہ اپنی شہریت تے مان کر سکے پر اوہناں حکمراناں تے اداریاں دی عقل تے ماتم کیویں کیتا جاوے جو قیام پاکستان توں اج تک ریاستی وسیلیاں دی غیرمنصفانہ ونڈ‘ علاقائی عصبیت تے دہشت گردی نوں فروغ دین دے ذمہ دار نیں۔ پاکستان عالمی استعمار دی ایس خفیہ جنگ دا پہلا نشانہ اے اپنے شہریاں نوں اوہناں دے جائز حقوق تے مراعات دتے بناں ایس خفیہ جنگ وچ مکمل کامیابی ممکن نہیں۔ افسوس کہ پاکستان دے حکمران‘ سیاستدان تے مقتدر اداریاں نے مشرقی پاکستان دے سقوط توں وی سبق نہیں سکھیا تے بلوچیاں نوں اوہناں دے جائز حقوق توں محروم کرکے جس داخلی انتشار دا شکار کیتا اوہدے تے لمی چوڑی بحث دی گنجائش نہیں۔
آزادکشمیر وچ پیدا ہون والی بجلی دی پیداوار دا صرف پنج فیصدجے آزاد کشمیر نوں دے دتا جاوے تے ایہ خطہ لوڈشیڈنگ دے عذاب توں مستقل نجات پا سکدا اے۔ ساڈے والدین ہجرت کرکے ایس آزاد خطے وچ آباد ہوئے سن تے اوہناں نے ایہنوں اپنے خواباں دی تعبیر سمجھ کے زندگی گزار دتی۔ آزاد ریاست جموں و کشمیر نوں جس بے دردی نال قبیلیاں تے سیاسی دھڑے بندیاں وچ ونڈیا گیا اے اوہدے نتیجے وی انج ای نکلنے شروع ہو چکے نیں۔ بھارت ولوں 5اگست 2019ء نوں مقبوضہ ریاست دے اسٹیٹس وچ تبدیلی تے کجھ نہ کر سکیا۔ ریاست دی حکومت نوں اپنی آزادی توں اپنا کیس پیش کرن وچ رکاوٹ رہیا۔ پاکستان دے حکمراناں اگے شکوہ اپنی تھاں ٹھیک اے۔ ایہ اہل کشمیر دیاں خواہشاں تے پورا نہیں اترے۔ ایہ گل وی کسے شرمندگی توں گھٹ نہیں کہ ساڈے کشمیری سیاستداناں نے وی کوئی چنگی مثال قائم نہیں کیتی۔ وفاق وچ بھاویں جہدی وی حکومت ہووے کشمیر قیادت ووٹرز دا رخ ایس پاسے موڑ دیندی اے۔ ریاست دے مفاد دی تھاں اپنے ذاتی تے قبیلائی مفادات نوں پہلی ترجیح دے طور تے رکھیا جاندا اے۔ ایہو وجہ اے کہ جیویں ای وفاق وچ اقتدار ڈگمگان لگدا اے آزادکشمیر وچ وفاداریاں بدلنا شروع ہو جاندیاں نیں۔ حالیہ تبدیلی وی ایسے عادت دا حصہ اے۔ ساڈے ایس قبیل دے سیاست کاراں دی وجہ نال ریاست د ے بنیادی انسانی حقوق وی گھٹدے جا رہے نیں۔ بیس کیمپ دی حکومت دا قیام جہڑے مقصداں دے حصول لئی عمل وچ آیا سی اسیں اوہناں مقصداں نوں کنڈ پچھے سٹ دتا۔ نوبت ایتھوں تک آ گئی اے کہ ساڈے ممبران اسمبلی‘ صدر وزیراعظم تے باقی لائو لشکر نوں ایس گل دی پروا تک نہیں کہ ساڈی ریاست دا وڈا حصہ جبر دا شکار اے۔ دوجے پاسے پاکستانی حکمراناں دا رویہ آزادکشمیر دے نال غیرمنصفانہ اے۔
وفاق وچ کشمیر لئی طے شدہ بجٹ وی پسند تے ناپسند دی بنیاد تے ریلیز کیتا جاندا اے۔ پاکستان دے حکمران ریاست نوں بجلی دی پیداوار دا پنج فیصد وی دین نوں تیار نہیں جد کہ آزادکشمیر توں پیدا ہون والی بجلی اسلام آباد دے ایواناں نوں مسلسل روشن رکھدی اے۔ ایس صورتحال وچ آزادکشمیر دے نوجواناں وچ بے چینی ودھدی جا رہی اے جو کسے وی طرح مناسب نہیں ایہدے تے مستزاد ایہ کہ مقبوضہ کشمیر دے لوک وی ایس عمل توں خوش نہیں۔ اوہ لوک کہ جہناں نے پونی صدی پاکستان دی بقاء دی جنگ لڑدے تے لہو پیش کردے ہوئے گزار دتی اے۔ اوہ پریشان نیں کہ مستقبل وچ اوہناں نال کیہ سلوک کیتا جاوے گا؟ اوہ ہن کہن لگ پئے نیں کہ جس ملک دے لیڈر اپنے ویران پہاڑاں وچ کالاباغ ڈیم بنن نہیں دیندے اوہناں لئی آزادکشمیر دے دارالحکومت مظفرآباد نوں دریاواں دے پانی توں محروم کر دتا گیا اے۔ کشمیری پاکستان نال بڑی محبت کردے نیں پر اوہناں دے کول ایہناں سوالاں دے جواب نہیں؟۔ جے پاکستان تے آزادکشمیر دے حکمران‘ سیاسی قائدین تے مقتدر اداریاں وچ محب وطن ایہناں پریشانیاں دا حل کڈھن ایس توں پہلاں کہ نفرت دے ایہ بیں برگ و بار لیان‘ آزاد خطے دی افرادی قوت نوں احساس محرومی دا احساس دوا کے عالمی استعمار دا کوئی گماشتہ استعمال کرے یاں پاکستان لئی نواں محاذ کھول لوے۔ آزادکشمیر دے حکمراناں تے سیاستداناں نوں کدی وی آزادکشمیر‘ مسئلہ کشمیر تے نوجوان نسل دے مسئلے تے پاکستان مخالف ٹرینڈ نال کوئی دلچسپی نہیں کیوں جے اوہناں نوں آزادکشمیر وچ صرف اسمبلی ممبر یاں مالی وسیلیاں توں لطف اندوز تے اپنا حق حکمرانی وکھان توں علاوہ کسے ہور گل نال غرض نہیں۔اُتوں ہور ستم ایہ کہ ایہ لوک مظفرآباد وچ بڑے گھٹ تے اسلام آباد وچ بہت زیادہ وقت گزار کے لطف ا ندوز ہوندے نیں۔ ساڈی دینی تے پاکستانی پچھان دا تقاضا اے کہ اسیں بیس کیمپ نوں منزل ول ٹوریئے۔ نویں نسل دے شعور توں استفادہ کریئے تے ہمیشہ توں ذلت دی راہ تے ٹری نام نہاد قیادت توں چھٹکارا پائیے۔ کشمیریاں نوں بہرحال اپنا کیس آپ لڑنا پوے گا تے ایہدے لئی پاکستان دی سفارتی مدد حاصل کیتی جانی چاہیدی اے۔ ہن ویلا اے کہ نویں نسل دے وچکار نفرتاں دے بیں بون والیاں دا راہ روکیا جاوے۔