نریندر مودی دا ہندوستان

ایس دوران اپنی پہلی مدت اقتدار پوری ہون مگروں 2019 وچ عام انتخابات ہوئے
جہدے وچ بی جے پی نے پہلے توں وی ودھ ووٹ تے پارلیمانی اکثریت حاصل کیتی

رابعہ رحمن

نریندر مودی دی سربراہی وچ بی جے پی دی حکومت 2014وج قائم ہوئی تے اج ست ورھیاں توں ودھ دا عرصہ لنگھن مگروں وی ایہ حکومت نہ صرف قائم اے بلکہ فی الوقت ایہنوں کوئی سیاسی چیلنج وی درپیش نہیں۔ ایس دوران اپنی پہلی مدت اقتدار پوری ہون مگروں 2019 وچ عام انتخابات ہوئے جہدے وچ بی جے پی نے پہلے توں وی ودھ ووٹ تے پارلیمانی اکثریت حاصل کیتی۔ ہندوستان دی سب توں پرانی تے لمے عرصے تک اقتدار وچ رہن والی جماعت کانگریس جہنوں ہندوستان دی بانی جماعت وی آکھیا جاندا اے پچھلے کجھ عرصہ توں ارتقا دے مرحلے توں لنگھ رہی اے لہٰذا ایہدی سیاسی حیثیت اجے فی الحال پہلے ورگی نہیں۔ مرکز دے علاوہ بی جے پی 12ریاستاں وچ وی برسراقتدار اے۔ نریندر مودی تے بی جے پی دے حمایتی ایہنوں ہندوستان دا سب توں کامیاب لیڈر تے جماعت نوں سب توں مضبوط جماعت قرار دیندے نیں تے ایہناں دا ایہ آکھنا وی اے کہ مودی دی حکومت وچ ہندوستان نے ہر محاذ اتے بے مثال کامیابیاںحاصل کیتیاں نیں تے دنیا وچ ہندوستان دا مجموعی تاثر بہت بہتر ہویا اے۔ جے زمینی حقائق دا جائزہ لیتا جاوے تے صورتحال ایہدے نال مطابقت نہیں رکھدی۔ مہاتما گاندھی توں لے کے نہرو اندرا گاندھی‘ راجیو گاندھی تے اوہناں مگروں آن والے کانگرس دے وزیراعظم تے پارٹی دا بیانیہ اک سکیولر ہندوستان دا رہیا اے تے بی جے پی موجودہ حکومت دے برسراقتدار آن توں پہلے تک دنیا بھر وچ انج ای سمجھیا جاندا سی جہدے وچ کسی حد تک حقیقت وی سی مگر ہن انج نہیں اے۔
نریندر مودی 2001توں لے کے 2014تک ریاست گجرات دے وزیراعلیٰ وی رہے نیں تے اوہناں دے دور حکومت وچ اوتھے مسلماناں دے نال جہڑا سلوک روا رکھیا گیا اوہ کسی توں لکیا چھپیا نہیں۔ 2002 وچ مسلماناں دے خلاف حملیاں‘ تشدد دی کارروائیاں تے بیمانہ مظالم دے دوران مسلماناں نوں شہید کیتا گیا تے کروڑاں دی املاک نوں وی نقصان پہنچایا گیا۔ ایہناں واقعیاں دی اج تک آزادانہ تحقیقات نہیں ہو سکیاں۔ ایہناں واقعات پاروں نریندر مودی دے امریکہ وچ داخلے اتے پابندی وی لا دتی گئی۔ اج صورتحال ایہ اے کہ ہندوستان دی کئی ریاستاں وچ ہریانہ‘ اترکھنڈا تے اتر پردیش دے کجھ علاقے شامل نیں۔ مسلماناں دی کھلی تھاں اتے نماز پڑھن اتے پابندی لا دتی گئی اے۔
اترکھنڈ وچ انتہا پسند ہندو تنظیم دے اجتماع وچ سرعام مسلماناں دے قتل عام تے نسل کشی دا اعلان کیتا گیا اے۔ چیتا رہوے کہ ایس اجتماع وچ حکمران جماعت دے رہنماواں نے وی رلت کیتی سی۔ نویں مسجداں دی تعمیر اتے وی پابندی عائد کردتی گئی اے۔
مقبوضہ کشمیر وچ مسلماناں دے نال روا رکھا جان والا سلوک کسی کولوں لکیا نہیں۔ مودی صحیح معنیاں وچ اک انتہا پسندانہ مذہبی جنونن دے طور تے جانیا تے پہچانیا جان لگیا اے۔ ہن دنیا دے سامنے وی ایہدا چہرہ ہور عیاں ہوندا جا رہیا اے۔ ہندوستان دا سکیولر چہرہ ہن اک انتہا پسند ریاست دے چہرے دے طور تے سامنے آیا اے۔ صرف مسلمان ای نہیں دوجی اقلیتاں وی اپنے آپ نوں عیر محفوظ سمجھن لگی نیں۔ عیسائی تے سکھ وی ہندوواں دی انتہا پسندی دا نشانہ بن رہے نیں۔ ساریاں دی مذہبی آزادی اتے قدغناں لگائی جا رہیاں نیں۔
زندگی دا کوئی وی شعبہ ہووے‘ نریندر مودی دی کارکردگی مایوس کن اے تے ایسے وجہ نال جمہوری آزادی انسانی ترقی‘ بنیادی انسانی حقوق رائے دی آزادی‘ حکومت دے حقوق تے تحفظ سماجی آزادی‘ کرپشن تے اقرباپروری معاشرتی رواداری تے اتحاد و یگانگت ہرشعبے وچ ہندوستان دی بحیثیت ریاست بین الاقوامی ریٹنگ تنزلی دا شکر اے۔ ایتھوں تک کہ ات گردی دے خلاف مہم جہدے وچ مودی اپنے آپ نوں بہت بڑھا چڑھا کے پیش کردا اے تے ایسے بنا تے پاکستان دے خلاف جھوٹا تے بے بنیاد پراپیگنڈا کردا اے۔ ایہدے وچ وی مودی دی کارکردگی محض اک ڈرامے توں گھٹ نہیں تے ہر تھاں ایہنوں جگ ہنسائی دا سامنا کرنا پیا اے۔ گجرات حملیاں مگروں ہون والی تحقیقات دے نتیجے وچ چھ بندیاں نوں سزائے موت تے عمرقید دی سزاواں سنائی گئیاں جنہاں مگروں ہندوستان دی سپریم کورٹ نے یہ آکھ کے ختم کر دتا کہ اصل مجرماں نوں پھڑن دے بجائے بے گناہ لوکاں نوں جھوٹے الزاماں دے تحت غلط گرفتار کر کے سزاواں دوان گئیاں۔ آزادانہ تے حقیقت اتے مبنی رائے رکھن والے صحافیاں نوں وی ریاست ات گردی دا نشانہ بنایا جا رہیا اے تاں جے حقیقت دنیا نوں پتہ نہ چل سکے۔ ویلا ایہ ثابت کرے گا کہ نریندر مودی دی سوچ تے انداز حکمرانی نے ای ہندوستان نوں ناقابل تلافی نقصان پہنچایا اے۔