یونان کشتی سانحہ

محمدصغیرقمر

یونان دے سمندر وچ ہون والا سانحہ کوئی نواں نہیں ایس توں پہلاں وی اجہے واقعات ہو چکے نیں۔ یونان دا ایہ واقعہ ہر حساس انسان دا دل چیر گیا۔ ایس حادثے وچ میرے اپنے پنڈ دے دو درجن بچے جان دی بازی ہار گئے۔ ایہناں وچ تن میرے بڑے قریبی عزیز تے کئی میرے قریبی دوستاں دے بچے شامل نیں۔ ایہ بچے میری اکھاں دے سامنے پل کے جوان ہوئے سن۔ وادی بناہ دے ایہ سپوت جتھے جری‘ دلیر سن اوتھے اپنے وڈیریاں دی روایات دے امین وی سن۔ کسے مشکل گھڑی وچ ایہ چٹان وانگوں اک دوجے دے نال کھڑے ہوندے سن۔ ایہ اوہ نوجوان سن جو اپنی دلیری تے بہادری وچ اپنی مثال آپ سن۔ انج بالکل وی نہیں کہ ایہ بچے گھٹ پڑھے لکھے یاں بڑے ماڑے گھرانیاں نال تعلق رکھدے ہون ایہناں وچوں کجھ کھاندے پیندے گھرانیاں دے بچے سن۔ سوال ایہہ وے کہ فیر اینی وڈی ٹریجڈی نے کیوں جنم لیا؟ دو اڑھائی ورھے پہلاں گوجرانوالہ توں میرے اک عزیز دا یتیم بچہ انسانی سمگلراں نوں اک وڈی رقم دے کے اک گروپ دے نال تافتان بارڈر دے راہیں ایران وچ داخل ہویا۔ ایرانی بارڈر سکیورٹی فورس نے اوس گروپ نوں ویکھدے ای فائرنگ شروع کر دتی کئی دن دے بھکھے پیاسے ایہ بچے ڈاڈھی گرمی وچ میلوں سفر کر کے ایتھوں تک اپڑے سن۔ ایسے دوران اوہ بچہ ڈر گیا‘ اوہنوں دل دا دورا پیا تے موقعے تے فوت ہو گیا۔ باقی گروپ پھڑیا گیا۔ اوہناں دے نال ایرانی پولیس نے جو کجھ کیتا ایہ وکھری دردناک داستان اے پر ایس بچے دی نعش دے حصول لئی جو مشکلات پیش آئیاں اوہدے وچ ایران وچ پاکستان دے سفارتکار وی بے بس پائے گئے۔
دو ہفتے دی جدوجہد دے بعد بالآخر بچے دی لاش تافتان بارڈر توں وصول کیتی گئی۔ ایس موقعے تے ایہ گل ہضم کرنی اوکھی سی کہ ایہ بچہ جے پنجی لکھ اک انسانی سمگلر نوں دے کے انھے راہواں تے چلا گیا اے تے اوہنوں کسے عزیز نے ایہ مشورہ کیوں نہ دتا کہ اینی رقم وچ اک مناسب کاروبار وی کیتا جا سکدا سی؟ ایہدے بعد وی ان گنت نوجوان میرے کول آندے رہے‘ کدی ترکی جان تے کدی ایران جان دے بارے تفصیل پچھدے رہے۔ میں اوہناں دی حوصلہ شکنی کیتی اوہناں نوجواناں دا کہنا سی کہ ساڈے واسطے ایتھے کوئی روزگار ہے نہ کوئی سفارش‘ نہ کاروبار دے مواقعے‘ کئی بچیاں توں اوہناں دی ذاتی تفصیلاں وی پتہ کیتیاں۔ سچی گل ایہہ وے کہ اوہناں وچوں بڑے گھٹ ایسے سن جہناں دے بارے ایہ کہیا جا سکدا اے کہ جے اوہ ملک توں باہر جان تے اوہناں دے مسئلے واقعی حل ہو سکدے نیں۔ میں اوہناں نوں یاد دوایا کہ جو سہولتاں اج اوہناں نوں حاصل نیں اسیں اپنی جوانی تک ایہناں دا کدی تصور وی نہیں سی کیتا۔ میں ملک توں باہر جان والیاں دی دوڑ وچ شامل اپنے علاقیاں دے بچیاں نوں ہمیشہ یاد دواندا رہیا کہ تسیں غریب نہیں‘ تہاڈے کول زمین اے‘ دو ویلے دی روٹی مل جاندی اے یورپ اک سہانا خواب اے‘ ایس خواب دی تعبیر وچ میرے اوہناں بچیاں دا حصہ اے جو آپ جیویں تیویں اوتھے اپڑ گئے تے اوہناں دے نال جو اصل واردات ہوئی اوہدا تذکرہ نہیں کر پاندے۔ اوتھے اپڑ جان والے مہینوں کیمپاں وچ خوار ہوندے ہے۔ بھکھ پیاس برداشت کردے رہے۔ مینوں یقین اے کہ جے میری وادی دی کوئی ماں اپنے بچے دی ایہ خستہ حالی ویکھ لیندی تے قیامت تک یورپ دا ناں نہ لیندی۔
الحمد للہ پاکستان دے حالات اینے برے نہیں جنے سوشل میڈیا تے برے نیں۔ پچھلے کئی ورھیاں توں ایہناں بچیاں نوں کروڑاں نوکریاں تے سہانے مستقبل دے خواب وکھائے گئے۔ ایہناں دیاں امیداں جوان رہیاں پر جدوں خواب بکھرنے لگے ایہ اک ان جانی منزل ول ٹر پئے۔ خاص کر آزاد جموں و کشمیر دی پچھتر لکھ آبادی وچ اک فیصد لوک وی اجہے نہیں جو بناں چھت دے سوندے ہون یاں کسے دی رات بھکھے پیٹ گزری ہووے۔ آزاد کشمیر دے زیادہ تر لوک یوکے‘ امریکہ تے اندرون یورپ رہندے نیں تے اوہناں دی چمک دمک ایس علاقے وچ ویکھی جا سکدی اے۔ اوہ آزادکشمیر آندے نیں تے کئی کئی کروڑ دیاں کوٹھیاں بنا کے وڈیاں وڈیاں گڈیاں خرید کے پورچ وچ بند کرکے آ پواپس جا کے دو بیڈ دے مکاناں وچ رہ کے جاب وچ جٹ جاندے نیں۔ دوجے پاسے ساڈے سیاستدان نیں جہناں دے بچے ہمیشہ توں محفوظ تے پرتعیش حیاتی گزاردے نیں۔ اقتدار کرنا صرف ایہناں دا کم اے غریب یاں ماڑے طبقے دے بچے بے شک اعلیٰ تعلیم یافتہ کیوں نہ ہون ایہناں تے روزگار دے مواقعے بند نیں۔ ایہناں نوں ملازمت ایسے صورت مل سکدی اے کہ اوہ صاحب اقتدار قبیلے نال تعلق رکھدے ہون۔ آزاد کشمیر جہدی کل آبادی دنیا دی سب توں وڈی فلاحی ریاست ناروے توں وی گھٹ اے ایہدے وسیلے ناروے توں ودھ نیں جتھوں دے لوک پاکستان بھر توں تعلیم وچ اگے نیں۔ ایہناں دی بے بسی سیاستکاراں دی وجہ نال اے جو پونی صدی گزرن دے بعد وی نسل نو نوں سمت نہیں دے سکے۔ اعلیٰ تعلیم یافتہ بچے ڈگریاں پھڑے سفارشاں کراندے تے سیاستداناں دے پچھے نسدے نظر آندے نیں۔ آزادکشمیر دیاں زرخیز زمیناں کاشتکاری لئی ترس رہیاں نیں ریاستی معدنیات‘ جنگلات تے پانی دے ذخائر کسے ویژنری قیادت دے منتظر نیں۔
کاش! ساڈے وچوں کوئی اوہناں والدین نوں روک پاندا اک پاسے اوہناں والدین دی بے بسی تے دوجے پاسے ساڈیاں حکومتاں دی بے حسی اے کہ ایس مافیا نوں پھڑ کے سزا دے سکن۔ جدوں ساڈے ایئرپورٹاں توں اکٹھے ویہہ تریہہ بچے لیبیا جاندے نیں تے اوہناں نوں پچھن والا کوئی نہیں ہوندا‘ کون لے کے جا رہیا اے؟ کیوں جا رہے نیں؟ ایہدا مطلب شاید ایہہ وے کہ ایس مافیا دے ہتھ بڑے لمے نیں ڈر اے کہ ہن اک ہور المیہ ہووے گا کہ ایہ مافیا قنون دی گرفت چوں بچ نکلے گا۔٭