ماڑا بکرا

احمدوقاص ریاض

عیدالاضحی دی آمد توں کجھ دیہاڑ پہلاں اک دوست نے بڑی فیاضانہ آفر کیتی اوہناں دا مزارع اوکاڑہ توں اوہناں لئی بکرے لے کے آندا اے تہانوں وی مناسب قیمت تے منگوا دینا واں۔ میں فوراً راضی ہو گیا۔ عید توں اک دن پہلاں آ جاوے گا۔ شام گئے بکرا نہ آیا تے میں دوست نوں فون کیتا اوہنے کہیا کہ اوہ وپاری بکرے تے لے کے آیا اے پر اوہناں دی قیمت کافی زیادہ سی ایس لئی اوہنے دو قیمتی بکرے منڈی وچ ویچ دتے۔ پریشانی دے عالم وچ گڈی کڈھی تے مضافات ول چل پیا جتھے امید سی بکرے تھوڑی گھٹ قیمت وچ مل جان گے۔ کافی تھاواں تے قیمتاں پتہ کیتیاں تے اسمان نوں چھو رہیاں سن۔ اک تھاں سڑک کنڈھے کافی بکرے تے خریدار نظر آئے۔ ہیڈلائٹ دی روشنی وچ سامنے نظر پئی تے پرانے کپڑیاں وچ اک بندہ اپنے دو چھوٹے بچیاں دے نال اک ماڑے جہے بکرے دی رسی پھڑے امید بھری نگاہواں نال گاہکاں ول ویکھ رہیا سی جو اوہدے کمزور بکرے تے تردی تردی نظر پا کے اگے ودھ جاندے سن۔ صاف نظر آ رہیا سی اوہناں کمسن بچیاں تے دوجے گھر والیاں دی عید دیاں خوشیاں تے لوڑ ایس بکرے دی وکری تے منحصر سی جہنوں کوئی خریدن تے تیار نہیں سی۔ میرا ملازم ایس دوران دو تن بکرے چھانٹی کرکے گڈی دے نیڑے لے آیا پر میں اوہناں نوں ویکھے بناں کہیا کہ سامنے کھڑے بندے تے بچیاں توں اوہناں دی قیمت دے بدلے بکرا خرید لوو‘ اسیں اوہ بکرا مارکیٹ دی قیمت توں خاصے گھٹ ریٹ وچ خرید لیا۔ ایس کمزور چھوٹے بکرے نوں گڈی وچ پا کے ٹرے جد کہ باپ بچے تیزی نال اپنے گھر نوں ٹر گئے۔ اوہناں دے چہرے تے خوشی دیدنی سی۔ ایس بکرے دی خریداری توں بڑا تگڑا بکرا لین دا پلان چوپٹ ہو گیا۔ ایس لئی فیصلہ کیتا گیا کہ باقی رقم نال گاں دی قربانی وچ حصہ پا دتا جاوے۔
رات دے انھیرے وچ گھر اپڑ کے ملازم نوں ہدایت کیتی کہ بکرے نوں کسے پوشیدہ مقام تے بنھ دیو پر ایہدی میں میں دی آواز گوانڈھیاں دے گھراں تک اپڑنی چاہیدی اے جو بڑی بے چینی نال ساڈے بکرے د اانتظار کر رہے سن۔ سامنے والے گھر دا مکین اپنے موٹے تازے بکریاں دی جوڑی دی رسی پھڑے ساڈے گیٹ تے آیا تے صبح نماز عید دا وقت پچھن لگا جد کہ اصل مقصد ساڈے بکرے دا جائزہ لینا سی جہدے وچ اوہ نکام ہو گیا۔ کیوں جے ساڈا بکرا غریب گھر وچ پلیا سی ایس لئی اوس گھر دے وسنیکاں وانگوں بکرے دی آواز وی کمزو رتے دھیمی سی۔ عید دی صبح نماز دے فوراً بعد ملازم اپنے تعلقات استعمال کردے ہوئے قصائی لے کے آ گیا تے سٹریٹ وچ چہل پہل ہون توں پہلاں ساڈے بکرے دی قربانی ہو چکی سی جہدی بڑیاں نیڑیوں ہو کے کجھ سیلفیاں وی بنائیاں جہناں وچ بکرا واہوا قدآور نظر آ رہیا سی تاں جے سوشل میڈیا تے لوکاں دی قربانی دے جانوراں د ینال فوٹواں دا بھرواں مقابلہ کیتا جا سکے۔ پچھلی عید تے وڈے انکل دے گھر سارے عزیز رشتے دار اکٹھے سن تے آنٹی ن ے ساڈی پرانی شلوار قمیض نوں ویکھ کے نک منہ چڑھایا سی ایس واری اسیں نویں شلوار قمیض پا کے اوہناں دے گھر اپڑے تے قصائی اوہناں دے بکرے بچھڑے وغیرہ دا گوشت بنان وچ مصروف سن جد کہ انکل آنٹی وڈے مرتبے دے لوکاں دے گھر بکریاں دیاں سالم راناں گھلن لئی ڈرائیور نوں ہدایتاں دے رہے سن۔ مینوں امید سی اوہ میرے نویں سوٹ دی تعریف کرن گئیاں پر آنٹی نے ملدے ای غصے وچ کہیا ایس واری صرف اک بکرے دی قربانی کیتی اے تے اوہ وی بڑا ماڑا تے کمزور بکرا‘ تہانوں اگے دی فکر نہیں۔
اپنے گھر توں بکرے دے سائز دے بارے مخبری توں میں حیران رہ گیا۔ دل کیتا میں آنٹی نوں کہواں انکل جدوں تک اعلیٰ سرکاری عہدے تے فائز رہے‘ اوہناں دے ماتحت یاں اوہناں توں کم کڈھوان والے ہر عید تے مفت قربانی دے جانور عید توں پہلاں اوہناں دے گھر اپڑاندے سن سگوں چارہ وی نال لے کے آندے سن اوہناں دا ثواب کنہوں ملے گا؟ عید دے دن تلخ پر سچیاں گلاں کرن نال ماحول وچ کشیدگی پیدا ہو جانید تے عید دے پرمسرت موقعے تے سارے خاندان دی رنجگی مول لینا کسے طرح وی مناسب نہیں سی ایس لئی میں خاموشی نال اپنے نویں سوٹ دا کالر ٹھیک کرنا شروع ہو گیا تے سجرے گوشت نال بنن والے بار بی کیوں دی مہک توں لطف اندوز ہون لگا۔ کوٹھی دے گیٹ توں باہر قربانی دا گوشت لین والے غریباں دی لمی قطار سی جہناں دی اکثریت موٹرسائیکل تے آٹو رکشیاں تے گوشت اکٹھا کرن دے مشن تے نکلی سی جد کہ اصل مستحق غریب اپنیاں بستیاں تے پنڈاں وچ دال سبزی تے سستا موسمی فروٹ کھا کے قربانی دی عید منا رہے سن۔٭