قتلاں دے وَدھ ہُندے واقعے تے لاپتہ پلس

آئے دن بے گناہ بے موت مارے جا رہے لیکن پلس دے معمولات وچ کوئی فرق نہیں آیا

حمیداللہ بھٹی

اک واری فیر گجرات وچ قتلاں دے واقعیاں وچ خوفناک حد تک وادھا ویکھن وچ آ رہیا اے جہدی اہم وجہ بے جا سیاسی مداخلت تے پلس دا پیشہ وارانہ سرگرمیاں دے منافی مصروفیات نیں۔ آئے دن بے گناہ بے موت مارے جا رہے لیکن پلس دے معمولات وچ کوئی فرق نہیں آیا۔ ویر تے غیرت دے نام اتے مارے جان والیاں دے علاوہ چوریاں تے ڈکیتیاں دی وارداتاں وچ وی غیر معمولی وادھا ہو چکیا اے۔ حالات ایس حد تک پہنچ چکے نیں کہ اکثر واقعیاںوچ مرن والے نوں ایہہ پتہ نہیں ہوندا کہ اوہنوں کون تے کیوں مار رہیا اے جد کہ مارن والے نوں ایہہ پتہ نہیں ہوندا کہ اوہ کیوں مار رہیا اے۔ بدامنی دی ایس لہر وچ شدت پچھلے کئی مہینیاں توں اے۔ خوف و ہراس دی فضا توں لوک ایس حد تک عدم تحفظ دا شکار ہو چکے نیں جیویں گجرات کوئی علاقہ غیر ہووے کیوں جے ایتھے قنون نام نوں نہیں شہر دی کچہری جتھے انصاف لئی عدالتاں تے انتظامیہ دے اعلیٰ افسراں دے دفتر نیں ایتھے وی چوریاں معمول نیں لیکن کیہ امن وامان یقینی بنان لئی پلس متحرک اے؟ جدوں ایس پاسے نظر پاندے نیں تے مایوسی ہوندی اے انج لگدا اے پلس ای لاپتہ اے۔خطہ یونان کہلان والے ضلع گجرات وچ جنگل دا قنون رائج اے۔ گجرات دے شہری افراتفری‘ بے یقینی تے خوف و ہراس دی فضا وچ زندگی گزارن تے مجبور نیں ماضی وچ ایسے ابتر حالات کدی نہیں ویکھے گئے۔
عید توں پہلاں اک 17 سالہ نوجوان معاذ قاتل ڈور دا نشانہ بن کے اوس ویلے جان توں ہتھ دھو بیٹھیا جدوں اوہ اپنی ہمشیرہ نوں موٹرسائیکل اتے کالج چھڈن جا رہیا سی ایس واقعہ دی خاص گل ایہہ کہ مقتول چار بھیناں دا اکلوتا بھراں سی۔ چاہیداتے ایہہ سی کہ پلس پیشہ وارانہ صلاحیتاں توں کم لے کے تفتیش کردی تے والدین نوں واحد سہارے توں محروم کرن دے ذمہ واراں دا کھوج لگا کے اوہناں نوں کیفر کردار تک پہنچاندی مگر ایسا کجھ نہیں ہویا بلکہ روایتی بے حسی دا مظاہرہ کردے ہوئے پلس نے وقوعہ نوں روزمرہ دا معمول جان کے داخل دفتر کردتا اے حالانکہ میاں شہباز شریف جدوں وزیراعلیٰ پنجاب سن تے اوہناں نے ایہہ اصول بنا رکھیا سی کہ جہڑے تھانے دی حدود وچ ڈور پھرن دا واقعہ ہووے۔ اوس تھانہ انچارج نوں نہ صرف معطل کیتا جاوے بلکہ اوہدے اتے ایف آئی آر وی درج ہووے ہن جد کہ اوہ وزیراعظم جئے منصب اتے فائز نیں۔ پنجاب وچ ایہناں دے بنائے اصول نوں پامال کیتا جان لگیا اے۔ انج لگدا اے پلس کسی دے ماتحت نہیں بلکہ مادر پدر آزاد اے۔ کاش وزیراعظم ایس پاسے دھیان دین کہ کیسے عام تے بے گناہ لوک سرراہ مارے جا رہے نیں تے پلس کارروائی کرن دے بجائے روایتی بے حسی دا مظاہرہ کردی دوجے غیر ضروری کماں وچ مصروف اے۔
چار بھیناں دا کلا بھراں تے والدین دا واحد سہارا دن دہاڑے بے موت ماریا گیا اے۔ عید جئے خوشی دے تہوار تے بھیناں تے والدین دا رو رو کے بھیرا حال رہیا لیکن قنون نافذ کرن والا ادارہ انج خموش اے جیویں کجھ ہویا ای نہ ہووے۔ ایس ایچ او سنے سارے افسراں نے شاید ایس لئی وقوعہ فراموش کردتا اے کہ مرن وچ مقتول دا اپنا قصور اے۔ جے سڑک اتے نہ آنداتے ہر گز جان توں نہ جاندا۔ منصف نے قاتل دی ایہہ دلیل من لیتی۔ مقتول خود گراتھا خنجر دی دھار تے۔ مگر ایہہ لوک کیوں بھل جاندے نیں کہ دنیاوی عدالتاں توں کوئی گناہگار جے اثرو رسوخ توں بچ وی جاوے تے اک عدالت روز محشر لگے گی جتھے فرائض توں کوتاہی دے مرتکب کسی صورت سزا توں بچ نہیں سکن گے۔ اللہ تے بہترین انصاف کرن والا اے۔ قاتلاں توں چشم پوشی کرن والیاں توں جدوں حساب کتاب ہووے گا تے کوئی دنیاوی طاقت طرفداری نہ کر سکے گی۔ ایہہ سنگدل تے سفاک لوک ہن تے فرائض دی ادائیگی دے بجائے جی حضوری تے چاپلوسی توں سب چنگا اے دی رپورٹاں لکھوا کے عہدے بچا لیندے نیں مگر کیہ قیامت دے دن وی روز وی ایہہ ایسا کوئی بندوبست کر سکن گے؟ ہر گز نہیں اوتھے تے مظلوم دی فریاد دی مکمل دادرسی ہووے گی۔ کاش عہدیاں تے دولت دی ہوس وچ مبتلا ایہہ لوک ایس بارے کدی سوچن جے انج ہو جاوے تے آئے دن لاقانونیت دا ایسا مظاہرہ ہرگز نہ ہووے۔
عید دے دناں وچ ای اک نوجوان نوں اوسے تھانے دی حدود وچ گولیاں نال بھن دتا گیا مگر پلس توںکارروائی دے متعلق کوئی دریافت کرن دی کوشش کرے تے اک روایتی جیا جواب ملدا اے کہ اسیں کیہ کریے لوک اپنی دشمنیاں دی وجہ نال قتل ہو رہے نیں۔ بھراواں تسیں بھاری بھرکم تنخواہ لیندے نیں ۔ کیہ گشت تہاڈی ذمہ واری نہیں؟ جے ہے تے کیہ ایہہ ذمہ واری پوری کیتی جا رہی اے؟ ایسا بالکل نہیں بلکہ یا تے تھانہ جات وچ کوئی اہلکار ہوندا ای نہیں۔ جے کسی سائل نوں خوش قسمتی نال کوئی اہلکار مل جاوے تے اوہ رسمی کارروائی تے اپنی بے اختیاری دا رونا رو کے مطمئن کرن دی کوشش کردا اے انج کیوں اے؟ وجہ صاف ظاہر اے کہ نااہل تے نالائق اہم عہدیاں اتے فائز نیں جہندا معمول فرائض دی ادائیگی نہیں بلکہ حاکمان وقت دی چاکری اے جتھے ایسا طرز عمل ہووے کیہ اوتھے قنون دی عملداری ممکن اے؟ ظاہر اے ایسا کسی صورت ممکن نہیں مگر گجرات وچ ایسا ای ہو رہیا اے۔ روزانہ بے گناہواں دا ناحق خون بہایا جا رہیا اے ۔ ودھدے خونی واقعات دے باوجود پلس ایسے لاپتہ اے جیویں کھوتے دے سر اتے سینگ۔
ودھدے خونریز واقعیاں دا تقاضا اے کہ پلس معمول دے گشت وچ وادھا کرے تاں جے عام لوکاں وچ پیدا ہون والے عدم تحفظ دے احساس دا خاتمہ ہووے مگر گجرات شہر دے ایسے اہم ترین پلس سٹیشن (جہدی حدود وچ کچہری تے عدالتاں وے آندیاں نیں) وچ تعینات ایس ایچ او جو حاکمان وقت دی چاکری وچ اپنے عہدہ دے فرائض وی یکسر فراموش کر بیٹھے نیں اک تاجر رہنما نوں ایہہ دس کے حیران کردتا کہ میں تے بظاہر ایس ایچ او ہون مگر ایس ایچ او دے اصل اختیارات میرے پاس نہیں بلکہ فلاں اک سویلین دے کول نیں تے اوتھے تھانہ چلا رہے نیں۔
وہ اک ایسا سویلین اے جہدے متعلق گجرات شہر وچ کرپشن دی ایسی ایسی ہوش ربا داستاں گردش کر رہیاں نیں جہدے سامنے چنگے جنگے پلس افسر ہتھ بنھے کھڑے رہندے نیں اوہ ایسایچ او لگوان توں پہلاں باقاعدہ وصول کردا اے گل ایتھے تک ای محدود نہیں بلکہ ڈی پی او دفتر توں کسی نوں گناہگار یا بے گناہ لکھوان توں پہلاں وصولی ڈی پی او دفتر وچ بنی مسجد وچ کردا اے۔ ذرا دل اتے ہتھ رکھ کے دسو جتھے حالات ایس حد تک خراب تے ایس ایچ او بے بس ہون اوتھے امن وامان دی امید کیتی جا سکدی اے؟ ایس شائبہ نہیں کہ پنجاب وچ اک سیاسی جماعت دے خلاف کارروائیاں عروج اتے نیں مگر ڈی پی او دفتر وچ بیٹھ کے مذکورہ بالا سویلین حکومت دے حامی سیاسی کارکناں دی نشاندہی تے فیر اوہناں نوں گرفتار کرن دی ہدایات دیندا اے۔ شاید ایسے لئی پلس لاپتہ اے تے قتلاں دے واقعے ودھدے جا رہے نیں مگر یاد رکھن والی گل ایہہ اے کہ بدامنی نال کسی جماعت دی نیک نامی وچ وادھا نہیں ہوندا بلکہ مقبولیت گھٹ ہوندی اے۔ لوڑ ایس امر دی اے کہ پلس سیاسی ڈیراں اتے حاضرین لان‘ سیاستداناں دی ایما اتے بے گناہ دی پکڑ دھکڑ چھڈ کے اپنے اصل فرائض امن وامان بحال کرن اتے توجہ دیوے تاں جے ضلع گجرات دوبارہ امن دا گہوارہ بنے۔