ادبی ڈنکی روٹ

اقتدارجاوید

پنجاب‘ پنجابی زبان تے پنجابی ادب لازم و ملزوم نیں۔ اقوام متحدہ نے بہت ساریاں زباناں دا ایس صدی وچ ختم ہون دا دس ہویا اے۔ ساڈے ملک وچ ستتر زباناں بولیاں جاندیاں نیں جہناں وچ 68 مقامی تے اٹھ غیرملکی نیں۔ حیرت اے کہ اسیں بدیسی زباناں دے مقابلے وچ اپنی زمین توں اٹھن والی زباناں نوں ایناں اہم نہیں سمجھدے۔ پنجابی نوں لوو کہ ایہدے بولن والیاں نے ای ایہدی دشمنی دا حق ادا کیتا اے۔ اقوام متحدہ نے پرائمری لیول دی تعلیم ماں بولی وچ دین دا کہیا ہویا اے۔ پر برا ہویا ایس سسٹم دا جہدے وچ ساڈی دھرتی دے بچیاں نوں ماں بولی وچ تعلیم نہ دے کے اوہناں دیاں صلاحیتاں نوں زنگ آلود کیتا جا رہیا اے سگوں اوہناں دے دل وچ ایس ماں بولی نال محبت نوں وی ختم کیتا جا رہیا اے۔ ایہ سلسلہ بڑا لماں اے تے کئی حیلے بہانیاں نال ملک دشمنی وی کیتی جا رہی اے۔ ملک دی 48 فیصد آبادی دی ماں بولی پنجابی اے پر ایہدے نال دشمنی وی ایسے تناسب نال کیتی جاندی اے۔ پنجابی زبان دے راہیں ای پنجابیاں دا استحصال کیتا جا رہیا اے۔ ایہدے لئی غیرملکی فنڈڈ پروگرام چلائے جاندے نیں۔ اک تے ادب دے ناں تے قائم ادارے کجھ کم کر رہے نیں‘ کم گھٹ کر رہے نیں کھا زیادہ رہے نیں پر کجھ لوک تے کجھ تنظیماں نیں جو ادب دے ناں تے پیسے وٹن دے کم تے لگے ہوئے نیں۔ ایہ اوہ لوک نیں جہڑے ایجنٹ دے طور تے کم کردے نیں۔ ایہناں دا ایہو رول اے تے ایہو اوہناں دی ادبی اخلاقیت اے۔
ڈنکی روٹ اوہ غیرقنونی رستہ اے جہدے راہیں ایجنٹس تے آلہ کار لوکاں نوں وکھوووکھ جھانسیاں وچ پھسا کے مغربی ملکاں دے سمندراں تے ایہناں بیروزگاراں نوں بے یارومددگار چھڈ دیندے نیں۔ ہن ایہ سلسلہ ایران تے ترکی نوں چھڈ کے ہن براہ راست یورپ اپڑان دا طریقہ اختیار کیتا جا رہیا اے۔ ہن اک ہور مافیا وی سرگرم عمل ہو گیا اے ایہ گروہ ادب دے ناں تے سب کجھ کر رہیا اے۔ ڈنکی روٹ گجرات تے ایہدے جڑے ضلعیاں دی پچھان اے۔ ایتھوں غیرقنونی طریقیاں نال نوجوان بیروزگاراں نوں یورپ اپڑایا جاندا اے۔ ایس انسانی سمگلنگ وچ ملوث وی اوتھوں دے تے موت دے رستے تے مرن والے وی اوتھے دے۔ ہن ایہ سلسلہ پ نجابی زبان دے ناں تے وی جاری اے۔ ادب دے ناں تے ادب دے پردے وچ گھس بیٹھیے اپنیاں جڑاں وڈھن وچ مصروف نیں۔ بھارت ساڈا ازلی دشمن وی اے۔ بھائی نوں بھائی نال لڑا کے اوہنے اوہ مقصد حاصل کیتا جو قائداعظم دی فراست دے سامنے نہ کر سکیا۔ قائداعظم نے اج توں اک صدی پہلاں ایس ملک دی اصلیت نوں سمجھ لیا سی۔ میثاق لکھنو 1916ء وچ ہویا سی۔ ایہو اوہ آغاز سی جدوں مسلماناں دے وکھرے انتخاب دے حق نوں پہلے من کے ایہدے توں روگردانی کیتی۔ ایسے معاہدے نوں ہندو نے کنڈ پچھے سٹیا تے تحریک خلافت تے پہلی جنگ عظیم دے بعد ایہنے مسلماناں نوں انگریز دے سامنے لا کھڑا کر دتا۔ ہن ایہنوں میثاق لکھنو یاں مسلماناں دی لوڑ نہیں سی ایس لئی اوہناں نے ایس معاہدے نوں ختم کر دتا۔ اوہ دن تے اج دا دن اوہ ہر طریقے نال ایس مملکت خداداد دیاں جڑاں وڈھن وچ مصروف اے۔ اوہ مغربی ملکاں وچ کانفرنساں راہیں ایتھوں گماشتیاں نوں خریدا اے تے مملکت خدادا دی اساس تے حملے کردا اے۔ ایس سلسلے وچ وکھووکھ پاکستان دشمن تنظیماں سرگرم عمل نیں تے ہر ممکن اپنی کاروائیاں جاری رکھے ہوئے نیں۔ ایتھے اوہناں نوں اپنی پسند دے لوکاں دی خدمات حاصل نیں جہناں دے راہیں اوہ اپنے گھٹیا مقصد نوں پورا کرن دی بھج نس وچ مصروف نیں۔ ایہ اوہ ادبی ڈنکی روٹ دے ایجنٹ جو پیسے دے ناں تے ادبی سیاست کردے نیں تے نامعلوم تے خفیہ مقصداں دی تکمیل وچ ملک دشمناں دا ساتھ دین توں وی نہیں کتراندے۔
دہلی وچ ایسے قسم دی اک کانفرنس وچ اک پاکستانی نوں سرعام ڈالراں دا تحفہ دتا گیا۔ ایس ادیب نما صحافی نے اوتھے بھارت وچ جا کے کہیا سی کہ پاکستان نوں مشرقی پاکستان دے لوکاں توں معافی منگنی چاہیدی اے۔ اوہنوں بھارت جا کے ایہ کہن دی توفیق نہ ہوئی کہ اوہدا مربی ملک کشمیر وچ کیہ ظلم ڈھا رہیا اے اوہنوں اپنے ملک دی بدخوئی کرنا تے یاد سی بھارت دے کشمیر وچ ظلم دے بارے اک لفظ وی کہن دی ہمت نہ ہوئی۔ ہن وی ایہ سلسلہ جاری اے ہن بھارت وچ جانا بند ہویا اے تے یورپ وچ کھائو پیو پروگرام دا ڈول سٹیا گیا اے۔ ایسے انسانی سمگلنگ دی وجہ نال بدنام علاقیاں توں ایجنٹ یاں سہولت کار چنے جاندے نیں۔ اوہناں نوں اک اک مہینے تک اوتھے غیرملکی خرچے تے رکھیا جاندا اے تے اپنے خفیہ مقصداں نوں پورا کیتا جاندا اے۔ ایہناں وچ اک تنظیم کینیڈا دے شہر وچ کانفرنساں دے ناں تے ملک دشمن ایجنڈے تے عمل پیرا اے۔ ایہدے وچ ایہ وی ویکھن وچ آیا اے کہ محب وطن تے مملکت خدادا دی نظریاتی سرحداں دے محافظ ادیباں نوں روکن دی ہر ممکن کوشش کیتی جاندی اے۔ حکومت پاکستان نوں ایس نام نہاد ادبی کانفرنساں دے ایجنٹاں دے خلاف گھیرا تنگ کرنا چاہیدا اے۔ کسے نوں وی بھاویں اوہ سیاست دا میدان ہووے‘ کھیڈ دا میدان ہووے یاں ادب تے ثقافت دا سب توں پہلاں پاکستان اے۔ جو ساڈے ملک دے خلاف کسے قسم دا ایجنڈا رکھدا اے اوہناں نوں پھڑ کے قرار واقعی سزا دینی چاہیدی اے۔
حکومت پاکستان نوں ایس سلسلے وچ اقدامات اٹھانے ہون گے تاں جے ایس فتنے دا خاتمہ کیتا جا سکے تے مملکت خدادا دی نظریاتی سرحداں محفوظ ہون۔ پنجابی زبان دے لکھاریاں نوں کوشش جاری رکھنی چاہیدی اے کہ پنجابی زبان دے فروغ لئی ایتھوں دے نونہالاں نوں اوہناں دی مادری زبان وچ تعلیم دتی جاوے ایہ کم صوبہ سندھ وچ بخیروخوبی انجام پا سکدا اے تے ملک دے دوجے حصیاں دے بچیاں نال امتیازی سلوک کیتا جاوے۔ جے ایہ انتظام نہ ہو سکیا تے غیرملکی پیسے نوں ایتھے اپنے آلہ کار لبھن وچ کھلی چھٹی ہووے گی۔٭