اوہ کدی وی ایناں برا نہیں سی

امرجلیل

بڑھاپے وچ بہت سارے روگ سانوں بناں منگے ملدے رہندے نیں۔ اوہناں تے تہاڈا وَس نہیں چلدا۔ روگ بھاویں کناں ای مارو کیوں نہ ہووے‘ تہانوں قبول کرنا پیندا اے‘ تسیں انکار نہیں کر سکدے۔ حال ای وچ دنیا دے سب توں وڈے‘ سب توں نامور فٹ بال ایڈسن آرنٹس نسیمینٹو دا انتقال ہویا اے۔ ایہ دنیا بھر وچ پیلے دے ناں توں مشہور سن۔ اٹھاسی رس دے پیلے آندراں دے کینسر وچ مبتلا سن۔ ورھیاں توں کینسر نال لڑدے رہے۔ آخر کار ہار گئے‘ اسیں وی بن مانگے بڑھاپے دے بہت سارے روگ پال رکھے نیں۔ اک روگ جو ساڈے بڈھے لوکاں وچ عام ہوندا اے اوہ اے بھُل جان دا مرض‘ اسیں راہ بھُل جانے آں۔ گلیاں تے محلیاں دے ناں بھُل جانے آں‘ وکھووکھ شیواں دے ناں آپس وچ گڈمڈ ہو جاندے نیں۔
دماغی امراض دے ڈاکٹر فرماندے نیں کہ ودھدی ہوئی عمر دے نال نال ساڈے اعضا دل‘ دماغ‘ گردے وغیرہ کمزور پے جاندے نیں۔ ڈاکٹر صاحبان فرماندے نیں کہ دماغی کم کرن نال‘ یعنی دماغ نوں مشغول رکھن نال دماغ بڑی حد تک کارآمد تے تخلیقی کم کرن دے قابل رہندا اے۔ میں ڈاکٹراں دی ہدایتاں تے اپنے ولوں پورا عمل کرن دی کوشش کیتی اے میں اپنے لیپ ٹاپ نال شطرنج کھیڈنا واں۔ اخباراں توں معمہ حل کرنا واں۔ جسوسی ناول تے کہانیاں پڑھنا واں۔ ریموٹ کنٹرول نال چلن والے کھڈونے گڈیاں تے ہیلی کاپٹراں نال کھیڈنا واں۔ سیاست دیاں گتھیاں سلجھانا واں‘ میرا مطلب اے گتھیاں سلجھان دی کوشش کرنا واں۔ مینوں نہیں پتہ کہ ایہناں ساریاں مشقاں تے ریاضتاں دا مینوں کناں فائدہ ہویا اے۔ بس ایناں کہہ سکنا واں کہ میں گلی کوچیاں تے راہواں دے نہیں بھُلیا۔
اک محاورے نوں لے کے میں اپنی کتھا بیان کرنی اے محاورے دے مفہوم توں میں واقف آں‘ پر محاورہ بذات خود مینوں ٹھیک طرح یاد نہیں۔ محاورہ سنو‘ جس کا کام اسی کو ساجھے۔ مطلب اے کہ جو جہدا کم اے اوہنوں ای کرن دیو۔ اوس بندے نوں دوجے کسے کم وچ نہ سٹو‘ سنیا نہیں تسیں کہ سو نار کی‘ ایک لوہار کی۔ تسیں لوہار توں سونے دے زیورات بنان دا کم نہیں لے سکدے۔ سونے نال زیورات بنان دا کم باریک بینی نال ہوندا اے‘ مار تول تے ہتھوڑے مارن نال نہیں ہوندا۔ تسیں الیکٹریکل انجینئرنگ دا کم مکینیکل یاں سول انجینئر توں نہیں لے سکدے۔ ایہ اسباق نیں جو سانوں تجربے سکھاندے نیں۔ تسیں تجربہ کر کے ویکھ لیا تسیں اک نامور کھڈاری‘ سپرسٹار نوں سیاحت دے ڈھائے چڑھا دتا۔ تسیں چیئرمین پی ٹی آئی دی اجہی پذیرائی کیتی ایناں ودھا چڑھا کے اوہدی پبلسٹی کیتی کہ کروڑاں پاکستانی ایس خوش فہمی دا شکار ہو گئے کہ چیئرمین پی ٹی آئی پاکستان دی ہچکولے کھاندی ہوئی سیاست نوں سانبھ لین گے۔ چلو من لینے آں کہ تسیں اوہنوں سیاسی گُر تے دائو پیچ سکھائے سن پر نتیجہ کیہ نکلیا؟گندی مچھیاں دے تالاب وچ اک چنگی مچھی پان نال کجھ نہیں ہوندا۔
ڈیگومیرا ڈونا نوں کیوں کسے نے ارجنٹائن دی حکومت جھولی وچ پان دی پیش کش نہیں سی کیتی؟ کیوں محمدعلی کلے نوں امریکہ دا صدر بنان دی کوشش نہیں کیتی ؟ کیوں کسے سیانے نے پہلے سنیل گواسکر تے بعد وچ سچن ٹنڈولر نوں ہندوستان دا وزیراعظم بنان دی کوشش نہیں کیتی؟ جو جہدا کم اوہنوں ساجھے۔ چیئرمین پی ٹی آئی کھیتی باڑی نہیں کر سکدا‘ امپورٹ ایکسپورٹ نہیں کر سکدا‘ ملک وچ بند پئی تے بیمار صنعتاں چلا نہیں سکدا‘ ملک نوں اقتصادی تے معاشی بھنور چوں کڈھ نہیں سکدا‘ ایہ اوہدے وَس دا کم نہیں اک عام جہی گل سانوں یاد رکھنی چاہیدی اے۔ ہر بندہ ہر فن مولا نہیں ہوندا۔ اوہ پینٹر اے‘ سنگر اے‘ رائٹر اے‘ باکسر اے‘ ٹیچر اے‘ سیاح اے‘ معلم اے‘ ایکٹر اے‘ مسخرا اے‘ ایہ ہو نہیں سکدا۔ اک بندہ سارے کم کرن دے گُر نہیں جان دا۔ میں اج تک ایسا بندہ نہیں ویکھیا جو ڈاکٹر ہووے تے پلمبنگ دا کم وی جان دا ہووے‘ عمران خان نوں جدوں وی میں تقریر کردے ہوئے سننا واں تے اوہدے لہجے‘ باڈی لینگوئج نوں ویکھنا واں‘ الفاظ دی چون دا جائزہ لینا واں اودوں مینوں لگدا اے اوہ تقریر نہیں سگوں فاسٹ بالنگ‘ اوہ وی شارٹ پج تے بائونسر بیٹس مین دے سر نوں تک کے سٹ رہیا ہووے ‘اجہے بندے توں تسیں سیاست دی امید کیویں رکھ سکدے او؟۔
تسیں سیاست دی خاطر اک سپرسٹار دی بلی چڑھا دتی اے۔ دکھ ہوندا اے جدوں نامور کھڈاری تے چوری‘ ہیراپھیری‘ غبن‘ ارباں روپیے دے گھپلے‘ فساد‘ بغاوت‘ تخریب کاری تے قتل و غارت گری دے الزام لگدے نیں۔ چیئرمین پی ٹی آئی دی ذاتی تے نجی زندگی وی سیاست دے ڈھائے چڑھا دتی گئی۔ جس طرح سونے دیاں کاناں ساڈے توں نہیں سانبھیاں جاندیاں‘ اوسے طرح اک کھڈاری وی ساڈے توں نہیں سانبھیا گیا۔٭