پیٹرول بم تے غریب عوام دی خواری

یقین جانو‘ میں پٹرولیم مصنوعات دی قیمتاں وچ وادھے توں پریشان آں تے نہ ای حیران کیوں جے ملک نوں ممکنہ طور تے دوالیہ ہون توں بچان لئی ایہہ بوہتی قیمت نہیں

ڈاکٹر شبیر اعوان

یقین جانو‘ میں پٹرولیم مصنوعات دی قیمتاں وچ وادھے توں پریشان آں تے نہ ای حیران کیوں جے ملک نوں ممکنہ طور تے دوالیہ ہون توں بچان لئی ایہہ بوہتی قیمت نہیں۔ تسیں مگر ایہہ سوال پچھن وچ حق بجانب او کہ جناب تسیں رئیس زادے ہوو گے (ایہدے وچ کوئی حقیقت نہیں) جہڑے ایسا سوچدے نیں مگر عوام تے پریشان نیں یا اوہ وی تہاڈے وانگوں بے فکرے نیں؟میرے خیال وچ ایس سوال دا جواب دینا کجھ اوکھا اے۔
واٹس ایپ سٹیٹس توں ایہہ انکشاف ہویا کہ پیٹرولیم مصنوعات دی قیمتاں وچ وادھا ہو گیا اے۔ سوچیا پنج‘ ست لیٹر پیٹرول تے موٹرسائیکل دی فیول ٹینکی وچ آ ای جاوے گا‘ کیوں نہ ٹینکی فل کروا لیتی جاوے۔ پیٹرول ختم ہون نال سڑکاں اتے پیدل خوار نہیں ہونا پووے گا۔ چنانچہ درویش نے موٹرسائیکل کڈی تے پیٹرول دے حصول دی جستجو شروع کردتی۔
مسلم ٹائون وچ گھر دے کول پہلا پیٹرول پمپ بند سی۔ فیروز پور روڈ دا رخ کیتا تے ایم اے او کالج توں ہوندا ہویا سیکرٹریٹ دے یوٹرن توں واپس چوبرجی دے رستے گھر پہنچیا تے انج100روپے بچان دی خواہش وچ 150 روپے دا فیول خرچ کر دتا۔ پیٹرول پمپ تے کھلے سن مگر شہریاں دے حملیاں دی زد تے سن تے میں ٹھہریا اک امن پسند شہری۔ پیٹرول پمپاں اتے شہریاں دے بے پناہ رش تے اوہانں دی اک دوجے نال بے وجہ تکرار تے دھکم پیل نے ذہن وچ بہت سارے سوال پیدا کر دتے۔
سونے اتے سہاگہ ایہہ کہ بعض پیٹرول پمپاں اتے اک کلومیٹر توں وی لمی گڈیاں دی لیناں نے حیران کر دتا۔ میں سوچیا ہو سکدا اے ایہہ میرا فریب نظر ہووے مگر انج نہیں سی تے پلس اہلکار ٹریفک نوں چالوں رکھن لئی پوری طرح چوکس تے اپنے فرائض دی انجام دہی وچ مصروف۔ ایہہ سب کار سوار پیٹرول پوان لئی اپنی واری دے منتظر سن۔ درویش جہڑا ہر ویلے مختلف فکراں وچ‘ غلطاں رہندا اے جہدے ذمہ وار استاد محترم وجاہت مسعود نیں جہناں توں درویش دی تقریباً دو دہائیاں پہلاں اک تربیتی نشست وچ ملاقات ہوئی تے اوہناں نے میرے وچ تنقیدی شعور دی اک ایسی لو روشن کیتی جہدے مگروں زندگی وچ ہمیشہ ہر سوال داجواب منطقی تے تریخی حوالیاں نال پان دی جستجو پیدا ہوئی جہدے وچ ہر لنگھدے دن دے نال وادھا ای ہویا اے۔درویش ایہہ نہیں چاہوے گا کہ موضوع توں ہٹیا جاوے تے ممنک اے مینوں ناچیز نوں اپنے استدلال نوں پیش کرن لئی استاذی منیر نیازی دے ضرب المثل بن چکے۔ ایس مصرعے دا سہارا لینا پووے۔
سوال سارے غلط تھے جواب کیا دیتے۔چنانچہ جدوں سوال ای غلط سن تے جواب درست ہون دی امید رکھنا ای عبث سی۔ موضوع چونکہ حالات حاضری اتے اے۔ خیال رہوے کہ پچھلی حکومت نے جدوں آخری پیٹرول دی قیمتاں وچ وادھا کیتا تے اوہناں دناں پچھلے وزیراعظم نے گھٹ آمدن والے طبقے لئی ہدفی رعایت (ٹارگٹڈ سبسڈی) دا علان وی کیتا ۔ موجودہ حکومت نے وی کجھ اشیائے خورونوش اتے ہدفی رعایت دین دا فیصلہ کیتا اے تاں جے پیٹرولیم مصنوعات دی قیمتاں وچ وادھے دے اثرات نوں محدود کیتا جا سکے۔
میری گل وچ ای کدھرے رہ گئی۔ حیران نہ ہوو‘ زندگی وچ اکثر تسیں ویلے اتے اپنی منزل تے نہ پہنچن دا خمیازہ بھگدے نیں جہدے لئی ضروری اے کہ گڈی دی ٹینکی فل ہووے تاں جے تسیں ویلے تے اپنی منزل اتے پہنچ سکو۔ ہو سکدا اے تسیں اک ہزار سی سی کار دے مالک او‘ 13 سو‘15سو یا18سو سی سی ہارس پاور گڈی تہاڈی ملکیت ہووے‘ گڈی وچ پیٹرول دا ہر ویلے موجود رہنا ضروری اے کیوں جے پاکستان دے دیوالیہ ہون دے خدشات ظاہر کیتے جا رہے نیں تے پاکستان وچ پیٹرول دے ذخائر ختم ہو گئے تاں؟
وطن عزیز دے متحرک وزیر خزانہ مفتاح اسماعیل آئی ایم ایف کولوں قرضے دی قسط دے حصول لئی سرگرم نیں کہ پاکستان دیوالیہ ہو کے سری لنکا نہ بن جاوے تے ایس لئی عوام دی جلی کٹی وی سن رہے نیں مگر اوہناں دی کوششاں نال پاکستان جے مالی بحران اتے قابو پان وچ کامیاب رہیا تے ایہہ حقیقت وچ اوہناں دی بہت وڈی کامیابی ہووے گی۔
میں وثوق نال تے نہیں آکھ سکدا لیکن ہر گڈی دی فیول ٹینکی دی گنجائش چونکہ وکھری ہوندی اے ایس لئی فرض کر لینے آں کہ تہاڈی ٹینکی وچ جے 50توں 70لیٹر پیٹرول اوسطاً آندا اے تے مطلب تسیں لمی لین وچ گھنٹاں انتظار کر کے 15سوں یا ودھ توں ودھ 21سو روپے بچا لیتے لیکن حقیقت ایہہ اے کہ ایس رقم اتے غریب تے گھٹ آمدن والے طبقے دا استحقاق سی۔ تسیں ایہہ پچھ سکدے او کہ ایہہ کس طرح ممکن اے؟ جواب سادہ جیا اے۔ پیٹرولیم مصنوعات وچ وادھے والے دیہاڑ موٹرسائیکلاں‘ موٹر رکشے‘ مسافر ویگناں تے مقامی طور تے تیار کردہ 800 سو سی سی دی گڈیاں دے علاوہ دوجی ساری گڈیاں دے پیٹرول پوان اتے پابندی عائد کردتی جاندی تے براہ راست اوہ طبقہ مستفید ہو سکدا سی جہڑا رش دی وجہ نال شاید پیٹرول وی نہ پوا سکیا تے ایس رعایت دا حقیقی معنیاں وچ سب توں ودھ مستحق سی تے دلچسپ طور تے حکومت نوں اپنی جیب توں اک روپیہ وی خرچ نہیں کرنا پیندا سی تے کجھ دن ای سہی سفید پوش طبقے دی سفید پوشی دا بھرم قائم رہ جاندا۔ ملک نوں دیوالیہ ہون توں بچان لئی پیٹرولیم صنوعات دی قیمتاں وچ وادھا کرنا ناگزیر اے تے ضرور کرو مگر غریب تے گھٹ آمدن والے طبقے دی قیمت اتے نہیں۔