کدو دے طبی فائدے

غذائی تے طبی افادیت نال بھرواں سبزی کدوں نوں کئی ناماں نال
پکاریا جاندا اے‘ جنہاں وچ گھیا‘ لوکی‘ دودھی وغیرہ شامل نیں

پروفیسر حکیم عمران فیاض

کدو !
غذائی تے طبی افادیت نال بھرواں سبزی
کدوں نوں کئی ناماں نال پکاریا جاندا اے‘ جنہاں وچ گھیا‘ لوکی‘ دودھی وغیرہ شامل نیں۔ ایہنوں عربی زبان وچ یطقین جد کہ لاطینی زبان وچ Cucurbita Pepo آکھیا جاندا اے۔ کدو ساری سبزیاں وچ نہایت اعلیٰ اہمیت دی حامل ترکاری اے۔ ایہدے اندر اعلیٰ قسم دا پیکٹین موجود ہوندا اے جہڑا کہ ساڈے نظام انہضام یعنی مردہ تے ہاضمہ لئی مفید اے۔ ہور ایہہ کہ ایہدے اندر وٹامن بی تے سی دے علاوہ کیلشیم‘ فاسفورس‘ آئرن‘ پوٹاشیم تے آیوڈین جئی دھاتاں وی پائی جاندیاں نیں۔ ایہدا استعمال صفرا دے زور نوں توڑدا اے کیوں جح ایہدی تاثیر سرد اے۔ ایہہ پیشاب آور اے‘ بے چینی نوں دور کردا اے‘ قبض نوں دور کردا اے۔ یرقان دے مریضاں لئی تحفہ قدرت سمجھیا جاندا اے۔
جے مزاج وچ چڑچڑاپن پیداہو جاوے تے ایہدے استعمال نال اوہ چھیتی ای ختم ہو جاندا اے۔ صحیح بخاری دی اک حدیث وچ حضرت انسؓ توں روایت اے کہ ’’اک درزی نے دعوت وچ حضورﷺ دی خدمت وچ لوکی (الدباء) پکی ہوئی پیش کیتی۔ آپﷺ نے اوہنوں تناول فرمایا۔ اوسے دن توں میں برابر اوہنوں پسند کرنا واں‘‘۔کدو اوہناں ترکاریاںوچوں اک ترکاری اے جہناں نوں انسان نے شروع دے دور وچ کاشت کیتا یعنی ایہدی کاشت صدیاں پہلے توں جاری اے۔
کدو دی افادیت
پیاس دی شدت نوں گھٹ کردا اے‘ بے خوابی دی شکایت نوں دور کردا اے‘ نیند دی کمی نوں دور کردا اے‘ پیشاب آور تے دافع صفرا اے‘ پیشاب دی جلن نوں دور کردا اے‘ بیجاں دا تیل لان نال سردرد ٹھیک ہو جاندا اے‘پیراں دے تلیاں اتے رگڑن نال جلن نوں زائل کردا اے۔ کدوں دا رس چند قطرے گرم کر کے کن وچ پان نال شدید درد وچ فوری آرام آ جاندا اے۔
کدو دا طبی استعمال
کدو اسہال‘ زیادہ مرغن غذاواں دے استعمال‘ خشک پھل کھان تے ذیابطیس توں پیدا ہون والی پیاس دی شدت نوں گھٹ کردا اے۔ اک کلاس کدو دے جوس وچ چٹکی بھر نمک رلا کے پینا انتہائی مفید رہندا اے۔ کدو دا جوس گرمیاں دے موسم وچ بوہتے پسینہ دی وجہ نال ضائع ہون والے نمکیات نوں پورا کرن دا بہترین ذریعہ اے۔ ایہدے توں جسم دی تھکاوٹ دور ہون دے نال پیاس وی دور ہو جاندی اے۔کدو دے جوس نوں تلاں دے تیل وچ شامل کر کے بے خوابی دے مرض وچ سر دے اتے مالش کرن نال ایہہ بیماری چھیتی ای دور ہو جاندی اے۔ کچا کدو معدے تے آنتاں نوں نقصان وی پہنچا سکدا اے ایس لئی ایہنوں کچا استعمال کرن توں پرہیز کرو۔
100گرام کدو دے غذائی اجزاء
رطوبت 96.1% ‘ چکنائی 5.1% ‘کاربوہائیڈریٹس 2.5% ‘پروٹین 0.2% ‘معدنی اجزا 0.5% ‘ریشے 0.6%100 گرام خوردنی حصے وچ معدنیات تے حیاتینی اجزاء دا تناسب
کیلشیم20ملی گرام‘فولاد0.7ملی گرام‘فاسفورس10.0ملی گرام‘کیلوریز16‘وٹامن بی کمپلیکس0.4ملی گرام‘وٹامن سی0.3ملی گرام کدو مقبول عام سبزی اے جہنوں لوک انتہائی پسندیدگی نال کھاندے نیں۔ ایہدا رائتہ تے حلوہ وی تیار کیتا جاندا اے جہڑا زودہضم ہوندا اے۔ ماہرین نے ایہنوں سل و دق دے مریضاں لئی مفید قرار دتا اے۔