باورچی خانہ

جھینگا چکن چٹ پٹے چاول

شیواں: چکن ادھا کلو‘قیمہ200گرام‘ جھینگے ادھا کلو‘ چاول ادھا کلو‘ نمک حسب ذائقہ‘ لہسن ڈیرھ کھانے دا چمچ‘ پیاز اک عدد‘ کٹی ہوئی لال مرچ ڈیڑھ کھانے دا چمچ‘ لیمون دو عدد‘ لال تے زرد شملہ مرچ اک عدد‘ یخنی تن پیالی‘ کالی مرچ کٹی ہوئی ادھا چاہ دا چمچ‘ اجوائن اک چاہ دا چمچ‘ پارسلے دو کھانے دے چمچ‘ زعفران اک چٹکی‘ کوکنگ آئل حسب ضرورت۔
ترکیب: پیاز نوں بریک چوپ کر لوو‘ چکن دی چھوٹی بوٹیاں کر لوو تے جھگینیاں نوں صاف کر کے دھو کے رکھ لوو۔ چاولاں نوں دھو کے پندرہ توں 20منٹ بھگو کے رکھو۔ اک لیموں دا رس کڈ لوو تے اک لیموں دے چھلکے نوں کھرچ کے کڈ لوو۔ اک پیالے وچ نمک‘ اک کھانے دا چمچ‘ لہسن ‘ جوائن ‘ اک کھانے دا چمچ کٹی ہوئی لال مرچ تے دو توں تن کھانے دے چمچ کوکنگ آئل پا کے رلائو تے اوہدے وچ چکن دی بوٹیاں نوں میرینٹ کر کے ادھے گھنٹے لئی فریج وچ رکھ دیو۔ پھیلے ہوئے پین وچ دو توں تن کھانے دے چمچ کوکنگ آئل وچ لہسن تے لال مرچ پا کے ہلکا فرائی کرو۔ فیر اوہدے وچ چاولاں نوں پانی توں کڈ کے پائو تے نمک پا کے چنگی طرح بھنو۔یخنی وچ زعفران تے لیموں دا چھلکا پا کے دو توں تین منٹ گرم کرو تے چاولاں اتے پادیو۔ نال ای بریک کٹیا ہویا پارسلے وی شامل کر دیو۔ وکھرے پین وچ اک کھانے دے چمچ کوکنگ آئل وچ میرینیٹ کیتی ہوئی چکن نوں تیز آنچ اتے سنہری فرائی کرو۔ فیر اوہدے وچ قیمہ پا کے درمیانی آنچ اتے ڈھک دیو۔ تن توں چار منٹ مگروں آنچ تیز کر کے بھنو۔ جدوں قیمے دا اپنا پانی خشک ہو جاوے تے اوہدے وچ جھینکے پائو تے لیموں دا رس تے چھوٹے ٹکڑے کیتی ہوئی شملہ مرچ پا کے بھن کے چولہے توں اتار لوو۔ چاولاں دا پانی خشک ہون تے اوہدے وچ چکن تے جھینگیاں دا مکسچر پا کے ہلکی آنچ اتے دم تے رکھ دیو۔
بادامی مرغ
شیواں:چکن اک کلو‘ بادام اک پیالی‘ نمک حسب ذائقہ‘ ادرک لہسن پسیا ہویا اک کھانے دا چمچ‘ پیا زاک عدد‘ ٹماٹر دو عدد‘ دہی اک پیالی‘ لال مرچ پسی ہوئی اک کھانے دا چمچ‘ پسیا ہویا دھنیا اک کھانے دا چمچ‘ ہلدی اک چاہ دا چمچ‘ سفید زیرہ اک کھانے دا چمچ‘ گرم مصالحہ پسیا ہویا اک چاہ دا چمچ‘ کوکنگ آئل ادھی پیالی۔
ترکیب:چکن نوں صاف دھو کے رکھ لوو‘ بادام نوں تن توں چار منٹ ابال کے ٹھنڈے پانی وچ پائو تے چھل کے خشک کرن رکھ دیو۔ پیاز نوں بریک وڈ کے رکھ لوو۔ پین وچ کوکنگ آئل نوں درمیانی آنچ اتے گرم کر کے اوہدے وچ پیاز نوں سنہرا فرائی کر کے کڈو تے چورا کر کے رکھ لوو۔ اوسے کوکنگ آئل وچ اٹھ توں دس باداماں نوں سنہری فرائی کر کے رکھ لوو۔ فیر اوسے پین وچ ادرک‘ لہسن تے زیرہ پا کے اک منٹ فرائی کرو۔ اوہدے وچ لال مرچ‘ ہلدی‘ دھنیا پا کے ہلکا جیا بھنو۔ نمک تے موٹے کٹے ہوئے ٹماٹر پا کے ہلکی آنچ اتے ڈھک دیو۔ جدوں ٹماٹر گلن تے آ جان تے چکن پا کے چنگی طرح ملائو تے ڈھک کے درمیانی آنچ اتے پکن رکھ دیو۔ بادام چنگی طرح خشک ہو جاوے تے گرائنڈر وچ بریک پیس کے رکھ لوو تے دہی نوں پھینٹ لوو۔ 20توں 25 منٹ مگروں چکن جدوں گلن تے آ جاوے تے اوہدے وچ پسے ہوئے بادام تے دہی پا کے ملائو تے اوہنوں ہلکی آنچ اتے دم رکھ دیو۔
ملائی چکن مصالحہ
شیواں:چکن اک کلو‘ نمک حسب ذائقہ‘ ادرک لہسن پسیا ہویا اک کھانے دا چمچ‘ کالی مرچ گدری پسی ہوئی اک چاہ دا چمچ‘ سفید زیرہ اک کھانے دا چمچ‘ ہری مرچاں چار توں چھ عدد‘ دہی اک پیالی‘ خشک ددھ دا پائوڈر کھانے دے چمچ‘ کوکنگ آئل تن توں چار کھانے دے چمچ
ترکیب:چکن نوں صاف دھو کے چھلنی وچ رکھ کے خشک کر لوو۔ زیرہ تے ہری مرچاں نوں موٹا موٹا کٹ لوو۔ دہی نوں پھینٹ کے اوہدے وچ نمک‘ ادرک‘ لہسن‘ کالی مرچ تے کٹیا ہویا مصالحہ ملا لوو۔ چکن نوں مصالحے توں میرینیٹ کر کے کم از کم تن توں چار گھنٹے لئی فریچ وچ رکھ دیو۔ چکن نوں پین وچ پا کے پکن رکھ دیو‘ شروع وچ تن توں چار منٹ آنچ تیز رکھو فیر درمیانی آنچ اتے بارہ توں پندرہ منٹ پکا لوو۔ وکھرے پین وچ کوکنگ آئل پا کے درمیانی آنچ اتے دو توں تن منٹ گرم کرو تی چکن نوں اوہدے وچ پا کے بھنو‘ نال ای ددھ دا پائوڈر چھڑکدے جائو۔ جدوں ددھ دا پائوڈر سارا پا دتا جاوے تے ڈھک کے ہلکی آنچ اتے پنج توں ست منٹ لئی دم اتے رکھ دیو۔
لیمن چلی چکن
شیواں:چکن ادھا کلو‘ سفید سرکہ ادھی پیالی‘ پسیا ادرک اک کھانے دا چمچ‘ نمک حسب ذائقہ‘ کوکنگ آئل ادھی پیالی‘ پانی اک پیالی‘ چکن کیوب دو عدد‘ لیموں چار عدد‘ لال مرچ اٹھ عدد‘ ہری مرچ اٹھ عدد‘ کارن فلور اک کھانے دا چمچ‘ کالی مرچ اک کھانے دا چمچ
ترکیب:چکن دی بوٹیاں بنا لوو۔ ہن اوہناں نوں چنگی طرح دھو کے سفید سرکہ‘ ادرک تے نمک لا کے پندرہ منٹ لئی رکھ دیو۔ اک برتن وچ تیل گرم کر کے اوہدے وچ چکن پا دیو تے پانی خشک کر لوو۔ ہن اک پیالی پانی وچ چکن کیوب پا کے یخنی بنا لوو تے اوہدے وچ لیموں دا رس ملا دیو۔ جدوں پانی خشک ہو جاوے تے وکھرے برتن وچ لال مرچ تے بریک کٹی ہری مرچ پا کے ہلکا جیا بھن لوو تے چکن وچ پا دیو۔ اخیر وچ تیار یخنی وچ کارن فلور رلا کے چکن وچ شامل کر کے ہلکا جیا پکائو۔ جدون یخنی گاڑھی ہو جاوے تے اوہدے وچ کٹی کالی مرچ پا کے گرم گرم پیش کرو۔