لوک دانش

ڈاکٹر صغرا صدف

عید توں اک دن پہلاں جدوں ڈرائیور عید منان چھٹی تے جا چکیا سی عطاء الحق قاسمی صاحب دے دفتر وچ صوفی بزرگ‘ منفرد مصنف تے سماج سیوک بابا محمد یحییٰ خان دے نال بیٹھک دا سندیسہ ذہن وچ جگمگایا۔ اجہی روحانی تے شگفتہ محفل وچ نہ جان دا تے سوال ای پیدا نہیں سی ہو سکدا کہ میزبان تے مہمان اعزاز دوویں نابغہ روزگار شخصیات نیں۔ نجی ٹیکسی تے سفر دا آغاز ہویا جو میرے گھر توں تقریباً چالھی پنتالی منٹ دا سی پر ڈرائیور دا کہنا سی کہ اج شہر وچ رش بالکل نہیں ہووے گا ایس لئی ادھے گھنٹے وچ پہنچا دیواں گا۔ اوہدے شارٹ کٹ راہ تے واقعی انساناں دا رش گھٹ سی تے بکریاں دا زیادہ۔ صاحب ثروت خریدار وڈیاں وڈیاں گڈیاں سڑک کنڈھے کھڑی کرکے بھائو تائو تے بکریاں دی صحت و سیرت دا اندازہ لان وچ مصروف سن۔ سفر کرن والے کئی کلومیٹر تک رک رک تے رینگ رینگ کے اگے ودھ رہے سن۔
اوتھوں گل بات دا آغاز ہویا کہن لگا دیکھو ایس ملک نوں قائم ہوئے 75 ورھے ہو گئے نیں اج تک کسے کم وچ ڈسپلن قائم نہیں ہو سکیا۔ اینیاں تھاواں خالی پئیاں نیں بھلا اوتھے عارضی منڈیاں بنا دیو۔ سڑک تے قبضہ کرکے بیٹھے نیں وقت تے پٹرول دے دشمن‘ میں کہیا لوک مہنگائی دا رونا وی روندے نیں تے مہنگے جانور خریدن والیاں دا رش ویکھ کے حیرانی وی ہوندی اے۔ کہن لگا مہنگائی صرف تنخواہ دار طبقے لئی اے جہناں نے ہر چیز تے 20فیصد منافع لینا اے اوہناں نوں کوئی فرق نہیں پیندا ایس لئی اوہ ایس واری ڈبل قربانی دے رہے نیں۔
اچھا ایہ دسو تہاڈا ایس گڈی دی آمدن نال گزارا ہو جاندا اے۔ کہن لگا پہلے بڑا چنگا بھلا گزر ہو جاندا سی پر ہن دو ویلے دی روٹی کھانی اوکھی ہو گئی اے۔ حالاں کہ خاندان وی بڑا چھوٹا جیہا اے میریاں دو دھیاں نیں دوویں یونیورسٹی وچ پڑھدیاں نیں۔ پچھلے دیہاڑیاں تے سوچیا اوہناں دی تعلیم ختم کرا کے واپس پنڈ چلا جاواں۔ فیساں پوریاں کراں یاں کچن چلاواں‘ اچھا پنڈ توں آئے ہو۔ جی دھیاں نوں پڑھان لئی جو جمع پونجی سی ویچ کے ایہ گڈی لے کے آ گئے سی۔ میرے رشتے دار میرے شہر آن تے دھیاں نوں پڑھان تے پہلے ای بڑے رِنج نیں میرے نال تے میری بیوی نال‘ ہن ایس مہینے توں وڈی دھی نے پارٹ ٹائم جاب شروع کر دتی اے۔ کہندی اے ابا میرے صرف دو سمیسٹر رہ گئے نیں فیر مسئلے حل ہو جان گے۔ میں حوصلہ دتا تے شاباش وی کہ مشکل حالات وچ وی دھیاں نوں پڑھا رہے او بڑا چنگا کم اے۔ انشاء اللہ کجھ عرصے بعد مہنگائی گھٹ جاوے گی تے ساڈا ملک معاشی طور تے مستحکم ہو جاوے گا۔ کہن لگا امید تے نہیں پر ویکھو کیہ بن دا اے۔ میں پچھیا مایوسی دی وجہ‘ کہن لگا خانص احب تے شہباز صاحب‘ مطلب‘ دوہاں نے بڑا مایوس کیتا اے جی‘ خان صاحب توں غریب لوکاں نوں بڑیاں امیداں سن کیوں جے اوہ گلاں بڑیاں چنگیاں کردے سن پر ہن پتہ چلا بس گلاں ای کردے سن حکومت چلانا اوہناں دے وس وچ نہیں سی۔ نہ آپ کم کیتا تے دوجیاں نوں کرن دتا۔ کیویں؟ دیکھو ناں جی اوہناں دی وڈی حکومت گئی تے صوبیاں دی چلدی اسمبلیاں توڑ دتیاں بھلا کوئی سیاستدان انج کردا اے۔ خان صاحب نوں کرکٹ اکیڈمی شیڈمنی بنانی چاہیدی سی سیاست وچ نہیں سی آنا چاہیدا۔ اچھا شہباز صاحب نال کیہ گلہ اے‘ جی اوہ وزیراعلیٰ بڑے چنگے سن بڑے کم کیتے اوہناں نے‘ پر وزیراعظم بن کے تے اوہ گم سم ای ہو گئے نیں۔ شاید پندراں سولاں پارٹیاں نے اوہناں نوں دبایا ہویا اے پر مسئلے تے ساڈے لوکاں لئی نیں۔ ساڈے پیراں دے تھلیوں زمین سرک رہی اے اوہ تے ہر ویلے جہازاں وچ ای اڈدے رہندے نیں۔
ایہ سیاستدان ملک دے سکّے بن دے نیں پر ملک دی خاطر اکٹھے بیٹھن نوں تیار نہیں۔ ایس ویلے اوہناں نوں اکمٹھ ہو کے ملک سانبھنا چاہیدا اے پر ایہ تے ہر ویلے اک دوجے نوں نیواں وکھان وچ کوشاں رہندے نیں اوہناں نوں کوئی فکر ای نہیں جدوں جہاز ڈبن دا خطرہ ہووے تے سامان گھٹ کیتا جاندا اے ایہ ہور لد رہے نیں۔ ملک لئی اک کمرے وچ نہیں بہہ سکدے پر اپنے مفاد لئی اکٹھے ہو جاندے نیں یاں چپ رہندے نیں۔ میں کہیا انج ساڈا سب توں وڈا مسئلہ کیہ اے‘ کہن لگا اسیں غریب لوک وی تے اکٹھے نہیں ہوندے۔ نہ حقوق دی گل کرنے آں نہ احتساب دی۔ ایہدی وجہ کیہ اے‘ اصل وچ اسیں سارے وی چھوٹے چھوٹے چور ای آں ایس لئی اندروں اسیں سارے وی بڑے ڈرے آں۔ ساڈے وی سمجھوتے چل رہے نیں۔ اچھا ایہ دسو اگوں کس پارٹی دی حکومت بن ے گی۔ اوس ڈرائیور نے جو جواب دتا اوہ بڑا عجیب سی ایس لئی لکھیا نہیں جا سکدا… پر سوچنی آں اوہدیاں بہت ساریاں گلاں ٹھیک سن ہو سکدا اے ایہ وی سچ ہو جاوے… لکھن والیاں اگے گزارش اے کہ کدی کدی اپنے حلقیاں چوں نکل کے دھرتی دے اصل وارثاں نال مکالمہ کرو تے دیکھو اوہ کیہ سوچ رہے نیں تے اسیں اوہناں دی سوچ دے کس رخ تے کھڑے آں۔٭