بارشاں تے ساڈی بے حسی

ایس واری تاں ساون دیاں منہ زور بارشاں نے
پورے ملک وچ ات مچا دتی ہوئی اے

ڈاکٹر سعادت علی ثاقب

ایس واری تاں ساون دیاں منہ زور مینہاں نے پورے ملک وچ ات مچا دتی ہوئی اے۔ کراچی تے کوئٹہ ورگے وڈے شہر انج سمجھو جیویں وڈے وڈے تالاب تے چھپڑ بن چکے نیں۔ ایس توں وکھ پہاڑاں تے ہون والیاں مینہاں تے گلیشیئردے پگھلن نال اوتھوں دے ندی نالیاں وچ جیہڑے ہڑھ لیاندے نیں اوہناں منہ زور پانیاں نے کنیاں ای غریب بستیاں نوں اجاڑ کے رکھ دتا اے۔
پنڈاں دے پنڈ برباد ہوگئے، گھراں دے گھر اُجڑ گئے۔ جھگیاں وچ رہن والے اوہناں مسکیناں دے ڈنگر جیہڑے اوہناں دے کھان پین دا سہارا ہوندے نیں۔ پانیاں وچ رُڑھ پُڑھ گئے۔ بلوچستان تے KPK دے غریب لوکاں دے گھر جیویں ڈھے رہے نیں اوہناں دیاں ویڈو وی وائرل ہو رہیاں نیں۔ سکھر بیراج کول جیویں لاشاں نکلدیاں پئیاں نیں اوہناں نوں ویکھ کے دل ہل جاندا اے۔ پانی دے اُترن تے مٹی گارے اُتے معصوم بالاں دیاں لاشاں ویکھ کے تے کلیجا پاٹ جاندا اے۔ ہن تے ہڑھ نے پنجاب تے سندھ ول نوں وی مُنہ کر لیا اے۔ ہر پاسے تباہی نے ڈیرے جمائے ہوئے نیں۔ ایہ تباہی اجے وی جاری اے تے اسیں اجے میں اکھاں میچ کے سُتے ہوئے آں۔
دوجے پاسے دا سیاسی منظر نامہ ایہ اے کہ تن مہینے پہلوں توں جدوں توں ایہ حکومت آئی اے۔ اک پاسے مہنگائی نے غریباں دا دو ویلے دا کھانا پینا مشکل کیتا ہویا اے تے دوجے پاسے سیاست داناں دیاں آپس دیاں لڑائیاں تے آئے دن حکومتاں دیاں تبدیلیاں نے عجیب تماشا لایا ہویا اے۔ ہُنے ہُنے پاکستان دے سب توں وڈے صوبے پنجاب وچ تیسری واری حکومت تبدیل ہوکے تحریک انصاف دے ہتھ وچ آگئی اے پر ن لیگ تے اتحادی ایس نویں حکومت نوں فوری طور تے اتار کے اپنی حکومت بنان لئی جدوجہد دا مُڈھ بنھن لگے نیں۔ دوجے پاسے تحریک انصاف نے وی مرکزی حکومت گران دی منصوبہ بندی شروع کر دتی اے۔
کاش ملک دیاں تِنے وڈیاں جماعتاں تحریک انصاف، مسلم لیگ ن تے پاکستان پیپلز پارٹی ایس نازک ویلے تے کجھ دناں لئی اپنے جھگڑے اک پاسے کر دیندے تے اوہناں پاکستانیاں دے دُکھاں درداں دا کجھ دارو کردے جیہڑے اپنے پیاریاں دیاں لاشاں تے اپنے زخمیاں دے زخم اپنے کلیجے تے لے کے تڑفدے پئے نیں۔ جیہناں دے گھراں دے سارے سامان پانی بہا کے لے جا چکیا اے، ہن اوہناں کول پانی پین لئی پیالہ تک نہیں بچیا۔ جے ایہناں مظلوماں ول اج دھیان نہ دین تے ایہ حکومت تے اپوزیشن لئی شرم دا مقام ہووے گا۔ ایہ دوویں پارٹیاںکجھ دن پہلاں اپنی اپنی جت دا جشن منان دی تھاں تے اوہو پیسہ جیہڑا آتش بازی تے مٹھائیاں کھان تے لا دتا اوہدے وچ ہور پیسے رلا کے ہڑھ دے مارے لوکاں نوں گھل سکدے سن۔ ن لیگ دی حکومت بنی تے لاہور سمیت پنجاب وچ جشن منان دا آہر کیتا گیا۔ فیر تحریک انصاف دی حکومت بنی تے لوکاں نے اوسے رات ای جشن منانا شروع کر دتا۔ کاش اوس رات ایہ آکھ دیندے کہ قوم نے اج ای جشن منا لیا اے ، ایس لئی کل جشن نہ منایا جاوے سگوں اوہ پیسے ہڑھ دے مارے لوکاں نوں دے دتے جان۔ دوجے پاسے اسیں اپنے بھین بھراواں اگے بینتی کراں گے کہ خدا دا واسطہ تسیں پاکستانی اپنیاں سوہنیاں قدراں نوں چیتے رکھو۔ حکومتاں دے کم اوہناں نال نیں پر سانوں وی ایس دُکھ دی گھڑی وچ اپنی ذمے واری پوری کرنی چاہیدی اے۔ ساڈیاں فلاحی تنظیماں نوں میدان وچ آنا چاہیدا اے تے پانی وچ گھرے ہوئے اپنے مظلوم بھین بھراواں دی ہر طرح نال مدد کرنی چاہیدی اے۔ ظاہر اے اوہ اُچے اُچے ٹیلیاں تے بیٹھے ہون گے، اوہناں نوں چھیتی توں چھیتی خیمیاں دی لوڑ وی ہووے گی۔ فیر اوہناں لئی بستر، کھاون پیون توں لے کے دوا دارو وی چاہیدا ہووے گا۔ ساڈی لوکائی اپنی پدھر اُتے ہمیش ای مشکلاں وچ پھسے بھین بھراواں دی مدد لئی تیار رہندی اے۔ اج وی اوسے جذبے نوں جگاون دی لوڑ اے۔ دوجے بنے حکومت اگے وی عرضوئی اے کہ حکومتی پدھر اُتے وی شمالی علاقیاں تے بلوچستان دے ہڑھ وچ پھسے غریب لوکاں دی مدد ہنگامی بنیاداں اُتے کیتی جاوے۔ کیوں جے موسمیات والیاں نے حالی ہور بارشاں دی پیش گوئی وی کیتی ہوئی اے۔ رب سوہنے اگے دعا اے کہ اوہناں غریب پاکستانیاں نوں اپنی خاص حفاظت وچ رکھے تے سانوں ساریاں نوں اوہناں دا دُکھ درد ونڈان دی توفیق دیوے۔