ادب تے صحافت دا سردار

لکھت:صدام ساگر

ساڈے آلے دوالے جیہڑی کائنات دور تیکر پھیلی ہوئی اے اینوں ویکھدے اسیں سارے آں پر اک عام بندا تے اک فن کار دی نظر وچ بڑا فرق ہوندا اے۔ ڈاکٹر سنبل نگار ایس فرق نوں کجھ ایس طرح بیان کردیاں نیں کہ عام بندا اینوں سرسری نظر نال ویکھدا ہویا لنگھ جاندا اے پر فن کار حساس دل، گہری نظر تے شدید جذبات دا مالک ہوندا اے۔ ایس وسیع تے عظیم الشان کائنات دا کوئی ننھا جہیا حصہ، کوئی منظر، کوئی واقعہ، کوئی صورت حال اینوں اینا متاثر کر دیندا اے کہ اوہ دوجیاں نوں وی اپنے ایس تجربے وچ شریک کرن دا فیصلہ کر لیندا اے۔ میرے نیڑے اختر سردار چودھری وی اک انج دے ای اک فنکار دی مانند نیں جنہاں دیاں اکھاں دور دور تیکر پھیلی ہوئیاں نیں۔اوہ ویکھن وچ اک عام جہے بندے نظر آندے نیں پر ایہناں دے اندر لُکیا ہویا اک فنکار ایہناں نوں بوہت ای خاص بندا بنا دیندا اے۔
اختر سردار چودھری علمی ، ادبی تے صحافتی حلقیاں وچ پاکستان توں لے کے دنیا جہاں وچ اپنی اک وکھری شناخت تے پہچان رکھدے نیں اوہ کسووال شہر وچ رہندے ہوئے نہ صرف اپنی گل کرنا پسند کردا اے بلکے پوری دنیا دی گل کرنا اپنا نصب العین سمجھدا اے۔ کیوں جے ایس دا دل احساس نال بھریا ہویا اے، اوہ حق سچ تے مبنی گل کردا اے۔ ایس حوالے نال صاحبزادہ میاں محمد اشرف عاصمی لکھدے نیں کہ اختر سردار چودھری دا قلم کلمہ حق کہن دے حوالے توں آزاد اے تے کسے طرح دے وی دبائو دے بغیر لکھنا ایہناں ای دا وصف اے۔ ایہناں دی تحریراں وچ اک پاسے تے علم دا سمندر ٹھاٹھاں مار رہیا ہوندا اے تے دوجے پاسے قاری دے ذہن تے سوار ہو کے ایہناں دا قلم مختلف انداز وچ واقعے بیان کر رہیا ہوندا اے۔
اختر سردار چودھری نال میرا پہلا حوالہ قلم و قرطاس اے۔ ساڈی پہلی ملاقات کسے تیجے فرد دا حوالہ نہیں بنی بلکے روزانہ شائع ہون والے قومی اخبار نیں۔ جنہاں وچ ساڈی اک ساتھ شائع ہون والی تخلیقات نیں۔ جیہڑی سانوں اک دوجے نال ملواندی ہوئی ساڈے وچکار ایس قلمی رشتے نوں مضبوط کردی اے۔ جی ہاں سردار صاحب اک زبردست کالم نگار ہون دے نال نال اک معروف علمی و ادبی شخصیت دے طور تے جانے جاندے نیں۔ ایہناں دے کالماں دی خصوصیت نوں بیان کردے ہوئے سید بدر سعید لکھدے نیں کہ ، اختر سردار چودھری اک متحرک کالم نگار ای نہیں بلکے محبت کرن والے انسان نیں۔ انج لگدا اے کہ ایس بندے وچ خدا نے محبت پان دی بجائے کوٹ کوٹ کے بھر دتی اے کہ جتھے کوئی چوٹ لگدی اے اوتھوں محبت دا چشمہ ابلن لگدا اے۔ ایہناں دے کالماں وچ سب توں وڈی گل ایہہ اے کہ اوہناں نے ’’زندہ کالم‘‘تحریر کیتے نیں جیہڑے قاری نوں معلومات اپڑاندے نیںایہناں دے ایہہ کالم ’’زندہ کالم‘‘ دے نیڑے سدا بہار موسم وانگوں نیں جنہاں نوں کسے وی ویلے پڑھیا جائے تے اوہ بد ذائقہ نہیں ہوندے تے نہ ای پڑھن والا اکتاہٹ محسوس کردا اے بلکے ایہناں نوں پڑھن والا بس پڑھدا ای چلا جاندا اے تے داد دتے بناں رہ نہیں پاندا۔ بقول قبالؒ:
دل سے جو بات نکلتی ہے اثر رکھتی ہے
پَر نہیں، طاقتِ پرواز مگر رکھتی ہے
اختر سردار چودھری صاحب اپنی تحریراں تے کالماں وچ جو وی گل لکھدے نیں اوہ دل نال لکھدے نیں۔ ایہناں دے لکھے ہوئے اک اک لفظ حقیقت تے مبنی حالات تے واقعات دی بھرپور عکاسی کردے نیں۔ ایہناں دی کتاب ’’ پاکستان سے دنیا تک‘‘ وچ ماضی ، حال تے مستقبل دے تناظر وچ معاشرے دے سارے پہلوواں نوں دست اصلاح دے طور تے دستک دتی اے۔ کہندے نیں کہ ہر سچی گل کوڑی ہوندی اے۔ سانوں سردار صاحب دیاں تحریراں دے رنگ کوڑے محسوس ہوندے نیں پر ایہناں نوں ہر پڑھن والا ہر قاری ایس گل دا دل نال اقرار کردا اے کہ اختر سردار چودھری نے اپنی کتاب ’’پاکستان سے دنیا تک‘‘ وچ جو وی گل کہی اے اوہ سچی اے تے ایہو سچائی کسے کتاب دی مقبولیت دا پیشگی ثبوت ہوندا اے کیوں جے اک سچے تے کھرے قلم کار دا ناں ای کافی ہوندا اے۔
ایس حوالے نال حافظ مظفر حسن دی مستند رائے ایہہ اے کہ اختر سردار چودھری خوب توں خوب تر لکھدے نیں تے محبت تے دل دی لگن نال لکھدے ن یں۔ فری لانسر لکھدے نیں تے عجب سادہ متنازعہ، مشکل تے خشک موضوعات تے وی قلم چکدے نیں پر تحریر وچ جان پا کے اینوں جاذب نظر بنا دیندے نیں تے پڑھن والیاں نوں اپنی تحریر دے لکھے لفظاں دے زور تے اپنے ول کھچ لیندے نیں۔
اختر سردارچودھری دے کول کوئی وی موضوع انج دا نہیں جیہڑا ایہناں دی فکر تے قلم دی بصیرت تیکر رسائی نہ حاصل کر پایا ہوئے۔ دنیا داری وچ ڈبے ہوئے لوکاں دا ہر عمل جیہڑا کسے نہ کسے مفاد دی بھیڑ چڑھدا ہویا اختر سردار چودھری نوں دکھی کردا اے ۔ انج دے ای گھمبیر حالات وچ اوہ اپنے قلم نوں تلوار وانگوں ورتنا خوب جان دے نیں۔ ایہناں دے ادبی، سیاسی، سماجی، دینی تے تعلیمی موضوعات تے مبنی تحریراں وچ سلاست تے روانی اک ساتھ پائی جاندی اے تے میں آپ ایہناں دی تحریراں نوں بڑے ذوق تے شوق نال پڑھنا واں۔
اختر سردار چودھری اک باخبر ادیب تے نامور صحافی اے۔ جیہڑا اج دے سماجی تے سیاسی منظر نامے وچ اپنے حصے دا سچ بلا خوف و خطر لکھ رہے نیںَ اوہ قلم دی حرمت تے مٹنا وی جان دے نیں تے کلمہ، حق دی صدانوں اُچا کرنا وی خوب جان دے نیں ایہناں دے دشمن وی اکثر ایہناں توں خوف کھاندے نیں، بقول شاعر:
صداقت کا سبق میری زباںپر ہے
مرے دشمن بھی مجھ سے خوف کھاتے ہیں
اختر سردار چودھری صاحب نال اپنی رفاقت دا کجھ ذکر کر دا چلاں تے ایہناں نال میری روبرو پہلی ملاقات بچیاں دی پہلی عالمی ادبی کانفرنس وچ ہوئی۔ جس توں بعد ساڈے وچکار ملاقاتاں دا اک لمبا سلسلا چل پیا۔ اوہ اک سادگی پسند، صاف گو بندے نیں اوہ جویں اُتوں وکھائی دیندا اے اونج ای اوہ اندروں صاف وکھائی دیندا اے اوہ اک علم دوست، محبت پرور انسان اے۔ جس دا دل اپنے لئی نہیں بلکے دوجیاں لئی دھڑکدا اے۔ اوہ ناں دا اختر ادب تے صحافت دا سردار تے بے ضمیر لوکاں لئی چودھری اے تے عہد موجودہ وچ سب توں زیادہ لکھن والا نسل نو دا ترجمان لکھاری اے۔ جیہڑا بیک وقت قومی اخبار، ویکلی تے ماہنامہ میگزیناں وچ شائع ہو رہیا اے۔