عوام نوں ٹیکس فری بجٹ دا لالی پاپ

تحریر :شاہد ندیم احمد

پوری دنیا نوں پیش آئے بدترین معاشی حالات وچ تحریک انصاف حکومت نے اپنا دوجا قومی بجٹ پیش کر دتا اے۔ ایس دور وچ شروع ای توں قومی معیشت سنگین چیلنجاں نال نبر آزما چلی آ رہی اے، پر پچھلے کجھ مہینے دے دوران کورونا دی عالمی وبا دے مقامی تے بین الاقوامی سطح تے سخت منفی اثرات پاروں ایس دا گراف جس تیزی نال تھلے آیا، ایس دی کوئی مثال ملک دی تریخ وچ نہیں ملدی۔ ایس صورت حال دا بھرپور اظہار ایس حقیقت نال ہوندا اے کہ ایہہ تریخی خسارے دا بجٹ اے جس دی مالیت 3437 ارب روپئے ظاہر کیتی گئی اے، جد کہ وفاقی میزانیے دا کل مالیت 71 کھرب 37 ارب روپئے اے۔ اک ٹریلین یعنی اک ہزار ارب روپئے دے اضافی ٹیکساں دی وصولی دا ہدف مقرر کیتے جان دے باوجود کوئی نواں ٹیکس نہ لان دا اعلان کیتا گیا، پر اک پاسے ٹیکس فری بجٹ دی دہائی تے دوجے پاسے ٹیکساں دی وصولی دے اہداف، حکومت کنہوں بے وقوف بنا رہی اے۔ پچھلے 72ورھیاں دی تریخ ایہو دسی اے کہ اک گھڑی گھڑائی بجٹ تقریر وچ ڈیلٹیشن دے نویں اعداد و شمار فٹ کر دتے جاندے نیں۔ ایس دے بعد اوہ مشکلاں دا رونا، اوہ فلاحی بجٹ دا دعویٰ، اوہ عوام دوست بجٹ پیش کرن دیاں گلاں تے ایہناں دی آڑ وچ غریباں تے ٹیکساں دے بوجھ وچ وادھا، مراعات یافتہ طبقیاں لئی مزید مراعات تے معیشت نوں بہتری دے دعویاں توں علاوہ کجھ نواں نہیں ہویا۔ البتہ ٹیکس فری بجٹ دی دہائی پا کے عوام نوں لالی پاپ نال خوش کرن دی ناکام کوشش ضروری کیتی جا رہی اے۔
حسب سابق حکومت بجٹ دے حوالے نال دعوئیدار اے کہ ٹیکس فری اے ایہہ ٹیکس فری کنی خوش کن اصطلاح اے کہ جس قوم توں بجلی تے پٹرول تے درجناں قسماں دے ٹیکس وصول کیتے جاندے ہون، اینوں ایہہ خوشخبری سنائی جاندی اے کہ ٹیکس فری بجٹ آ گیا اے۔ حکومت اک پاسے ٹیکساں توں اپنی آمد نی ودھان دا دعویٰ کردی اے تے دوجے پاسے نواں ٹیکس نہ لان دی نوید سناندی اے۔گویا پرانے ٹیکساں وچ ای انج دی مہارت وکھائی گئی اے کہ عوام دیاں جیباں توں مزید بچیا کھچیا مال وی کڈ لیا جائے تے ایہہ احسان وی جتایا جائے کہ اسیں تے کوئی نواں ٹیکس نہیں لایا ۔ تحریک انصاف دی حکومت دا ایہہ باقاعدہ دوجا بجٹ اے، حالاں کے اوہ تکنیکی طور تے چار بجٹ پیش کر چکی اے، پچھلے ورھے ایس نے تن بجٹ پیش کیتے سن تے ہن ویکھنے آں کہ ایہہ بجٹ کنے ورھے تیکر چلدا اے تے کدوں نواں بجٹ پیش کرن دی لوڑ پیش آ جاندی اے۔ تحریک انصاف والے تے ایس گل دا کریڈٹ وی لے رہے نیں کہ کرونا بحران دے دناں وچ جدوں معیشت دا بیڑہ غرق ہو چکیا اے، تحریک انصاف نے اک بوہت چنگا بجٹ پیش کیتا اے، نہیں تے حالات کسے قسم دے بجٹ دی اجازت ای نہیں دے رہے سن۔
ایس مشکل صورت حال وچ وی حکومت آئندہ مالی ورھے دے بجٹ وچ غریب عوام نوں ریلیف دین دی دعویدار اے جد کہ دوجے پاسے قائد حزب اختلاف میاں شہباز شریف تے اپوزیشن دی دوجی وڈی جماعت پاکستان پیپلز پارٹی دے سربراہ بلاول بھٹو نے بجٹ نوں عوام دشمن تے میوس کن قرار دیندے ہوئے مسترد کر دتا اے۔ کاروباری برادری تے ماہرین نے بجٹ اہداف دے قابل حصول ہون تے بالعموم تحفظات تے ایس خدشے دا اظہار کیتا اے کہ کرونا دی صورت حال تے ہمالیائی خسارہ پورا کرن لئی کجھ مہینے دے اندر حکومت منی بجٹ لیان تے مجبور ہو جائے گی تے کسے نہ کسے شکل وچ بھاری ٹیکس عائد کیتے جان گے جنہاں نال عام بندا تے کاروباری برادری دی مشکلاں ک ئی گنا ودھ جان گیاں۔ ایس بجٹ تے تاجر برادری تے دیگر رہنمائواں دا ملیا جلیا رد عمل سامنے آیا اے، تاجر برادری دا کہنا اے کہ کسٹم ڈیوٹی وچ کمی چنگا فیصلا اے، پر بیروزگاری دے خاتمے لئی بجٹ چپ اے جد کہ فری بجٹ وچ انج دے مطالبے نہیں منے گئے جنہاں توں نکے تاجراں نوں وی ریلیف مل سکدا سی۔سینٹر شبلی فراز بجٹ نوں عوام دی ہمدردی دا آئندہ دار قرار دے رہے نیں جد کہ سرکاری ملازماں دا کہنا اے کہ بجٹ وچ مہنگائی دا ذکر عوام دے زخماں تے نمک چھڑک دین دے مترادف اے۔
وزیراعظم عمران خان اپنی 22 سالہ جدوجہد وچ بار بار ایہہ اعلان کر چکے نیں کہ اوہ کسے توں ڈکٹیشن نہیں لین گے پر حالیہ بجٹ وچ سرکاری ملازمین تے بے سہارا پنشنر دے نال حکومت نے جیہڑا سلوک کیتا اوہ ناقابل فہم اے۔ عام بندے دی گھٹو گھٹ اجرت وچ وادھا نہ کرنا ایس حوالے نال قابل تشویش اے کہ مزدور طبقے لئی پہلے ای جان لیوا مہنگائی وچ جسم و جان دا رشتہ برقرار رکھنا اوکھا ہو چکیا اے۔ حکومت نوں ساڑھے 17ہزار روپئے وچ اک مہینے دا گھریلو بجٹ بنا کے پیش کرنا چاہیدا سی، جد کہ حکومتی رٹ دا ایہہ حال اے کہ ہجے تیکر پٹرولیم مصنوعات دیاں قیمتاں وچ کمی دے ثمرات عوام تیکر نہیں اپڑ سکے حکومت نے قائد حزب اختلاف دے اخراجات دی مد وچ 37 لکھ 32 ہزار روپئے وادھا کیتا اے، قائد حزب اختلاف نوں جرات دا مظاہرہ کردے ہوئے کہنا چاہیدا سی کہ میں وی غریب سرکاری ملازماں تے دیہاڑی دار طبقے دے نال کھلوتا واں، جدوں تیکر ایہناں دیاں تنخواہواں وچ وادھا نہیں ہوندا، اودوں تیکر بطور احتجاج ایہہ وادھا قبول نہیں کرے گا، پر ایتھے تے ہر کوئی ھل من مزید دی امید لائے بیٹھا اے۔ حکومت تے اپوزیشن دے باہمی رویاں وچ کھلا تضاد عوام دے اگے اے، اک پاسے حکومت، اپوزیشن تے قومی خزانہ لٹن دے الزامات لاندے نہیں تھکدی تے دوجے پاسے بجٹ وچ قائد حزب اختلاف نوں نوازیا جا رہیا اے۔
عوام حکومت تے اپوزیشن دے ٹوپی ڈرامے توں تنگ آ چکے نیں، حکومت عوام دے صبر دا مزید امتحان نہ لوے، عوام دے صبر دا پیمانہ لبریز ہو چکیا اے۔ حکومت ٹیکس فری بجٹ دی دہائی پا کے عوام بے وقوف بنانا چھڈ دیوے، کیوں جے عوام جان دے نیں کہ حکومتی اہداف عوام دا لہو چوس کے ای پورے کیتے جان گے۔ ایس لئی وزیراعظم عمران خان سرکاری ملازم تے بڈھے پنشنراں دیاں تنخواہواں وچ سالانہ وادھے دا اعلان کرن یا فیر مہنگائی نوں پچھلے اک ورھے والی تھاں تے واپس لے جان، ایہناں دونواں کماں وچ کوئی اک کم ضرور کرنا ہوئے گا جے اوہ ایس معاملے تے اپنا قائدانہ کردار ادا نہیں کردے تے عوام دے نال نال حکومت تے بیوروکریسی وچ وی دوریاں پیدا ہونا شروع ہو جان گیاں۔ سرکاری ملازم اک وار فیر حکومتی کماں وچ روڑے اٹکان گے، جس دا مشیر خزانہ نوں شاید کوئی نقصان نہیں ہوئے گا کیوں جے اوہ مشکل ویلا آن تے بوریا بستر چک کے باہر چلے جان گے جد کہ تحریک انصاف نوں مستقبل وچ ایس دا بوہت نقصان چکنا پئے گا جیہڑا ناقابل تلافی ہوئے گا، ایس لئی ایہناں نوں ایس غلطی دا ازالہ ویلے تے کر لینا چاہیدا اے کیوں جے عوام ہن ٹیکس فری بجٹ دے لالی پاپ توں بہلن والی نہیں ۔