فیر چھیڑ لیا پیو نوں۔۔

لکھت:ایثار رانا

ظالمو ثنا مکی کلونجی وی جعلی بنا لئی، اوہ کون لوک اولسی پلازما وی ویچن لگے چکر بازو سانوں تے چکر دے دیو گے اللہ نوں چکر کنج دیو گے۔ گھن چکرو، کدوں تیکر نوٹاں دیاں ڈھیریاں دے دوالے چکراندے ہوئے بھائی بھائی زور دی کہندے رہو گے۔ کاکا بلی اسیں قیامت صغری توں لنگھ رہے آں جنہاں لوکاں دے اگے ایہناں دے پیارے مر رہے نیں تے اوہ ایہناں نوں دفنا وی نہیں پا رہے۔ ایہناں نوں پچھو قیامت کنج ہوندی اے۔ منیا اک سروے دے مطابق پاکستان وچ کھوتیاں دی تعداد ودھ رہی اے پر ایس دا مطلب ایہہ تے نہیں کہ ایہہ حرس و ہوس دی ڈھینچوں ڈھینچوں کرن والے ہن سانوں ذخیرہ اندوزی تے ملاوٹ دیاں دولتیاں وی مارو۔ حیرت اے چکدی میتاں توں وی تسیں نہیں ڈرتے۔ رہے ایہہ پرائیویٹ ہسپتال والے تے شاید اوہناں نے بے شرمی تے خود غرضی دی انج دی ویکسین لئی اے کہ اپنے اگے سٹریچر تے ایڑیاں رگڑدے لوک وی ایہناں دے دل وچ رحم پیدا نہیں کر پاندے۔
حیرت اے تسیں بجٹ تے تنقید کر رہے او، بھیا اوہ جیہڑا تریخی جملہ سی کہ ’’دتا کی سی جیدا حساب منگدے او‘‘۔ عمران خان تے تنقید کرن ضرور کرن پر ویکھو کلا پاکستان نہیں پوری دنیا دا سوا ستیاناس ہو گیا اے۔ کیہ سمجھدے او مہنگے ماسک، جعلی ثنا مکی ویچ کے سمجھدے او گھر خوش ہوئے گا، ساباس دے گا۔
اج ریکارڈ کہنا واں گج وج کے کہنا واں، ڈنکے دی چوٹ تے کہنا واں سرکاری ملازماں دی تنخواہ نہ ودھن تے خوشی ہوئی، موگمبو بوہت خوش ہویا، ایہہ کیہ گل ہوئی پورے پاکستان وچ کم کرن والے پرائیویٹ ملازماں دی کھٹیا کھڑی ہو جائے تے سرکاری ملازم تن مہینے بغیر کام کیتے سرکاری تنخواہواں لین تے مزید ودھن دیاں امیداں رکھن۔ واہ جی واہ یعنی ’’نالے کھائو خوبانیاں تے نالے بھنو بادام‘‘۔ میں تے کہنا واں کہ کرونا آفت دے پیش نظر سارے اراکین قومی تے صوبائی اسمبلی و سینٹ دی تنخواہواں روک لیاں جان تے ایہہ پیسے کرونا فنڈ وچ دے دتے جان۔ سنتا سنگھ دی بیگم نال لڑائی ہو گئی ایس نے ہتھ جوڑ دے ہوئے کہیا کہ جا میری ماں مینوں معاف کر دے۔ سنتا سنگھ دے گوانڈھی بنتا سنگھ نے ایہہ جملے پنڈ دے مکھیا نوں دس دتے۔ ایس نے فیصلا دتا کہ میاں بیوی دا رشتہ ٹٹ گیا۔ ہن سنتا سنگھ چالی دن غریباں نوں کھانا کھلان فیر رشتہ بحال ہوئے گا۔ گھر دا سارا سامان وک گیا چالہویں دن سنتا سنگھ تے ایس دی بیوی ٹٹی منجی تے بیٹھے سن۔ بیوی بولی سردار جی ایہہ سب تہاڈاقصور اے۔ سنتا سنگھ نے گھور کے بیگم نوں ویکھیا جملہ بولدے بولدے کجھ سوچیا تے بولیا فیر چھیڑ لیا اپنے پیو نو۔ بھیا میرے کرونا پورے گھر دا سامان وکا دیوگا پر جے اوہ قوم دے ہمدرد نیں تے فیر ذرا انچ دو انچ اگے آن تے اپنے آپ نوں قوم دا لیڈر ثابت کرن نہیں تے کوئی گل نہیں ساڈے مقدر وچ تے مرنا لکھیا ای اے جلدی یا دیر نال، گل ہو رہی سی کہ کرونا بجٹ دی۔ تے میرے بھرا ئو میرے ماسک شدہ پاکستانی میں اپنی زندگی وچ اج تیکر انج دا بجٹ نہیں تکیا جنہوں عوامی تے عوام دی فلاح دا ضامن قرار دتا جا سکے۔ ہندسیاں دے گورکھ دھندے نیں اوہ مخدوم شہاب پیش کرن اسحاق ڈار یا حماد اظہر۔
ہم نے سارے چراغ دیکھے ہیں
سب چراغوں تلے اندھیرا ہے
ایہہ بجٹ وجٹ آئی ایم ایف ورلڈ بینک دے چونچلے وچ، نہیں تے ساڈے نصیب وچ تے بس ٹکر ٹکر اسمبلی اجلاس ویکھنا اے۔ پیپلز پارٹی پیش کرے تے ن لیگ نے اسمبلی وچ شور شرابہ کرنا اے۔ اج پی ٹی آئی سس بن کے اسمبلی وچ بونگیاں مار رہی اے کل اک لڑاکا نوہ وانگوں اسحاق ڈار تے کاغذ اچھال رہی سی۔ ایہناں ای فلاحی تعمیری کماں دے تے ارکان نوں پیسے ملدے نیں۔ بنتا سنگھ دے گھر مہمان آ گیا۔ رات نوں مہمان بولیا بنتا سنگھ رضائی نکی اے۔ سر لُکانا واں تے پیر ننگے ہوندے نیں پیرلُکانا واں تے سر ۔ بنتا سنگھ بولیا تسیں پہلے سر لُکائو۔ ایس نے سر تے رضا لئی۔ بنتا سنگھ نے ایس دے کھلے پیراں تے کس کے اٹ ماری ایس نے پیر رضائی دے اندر کر لئے۔ بنتا سنگھ بولیا لو جی میں سر تے پیر دونویں لُکا دتے نیں۔ ہن تسی جانو تے رضائی۔ میرے پیارے عمران خان نے لہوریاں نوں دس دتا اے جس نے ماسک نال اپنے ڈھڈے نما مونہہ باہر کڈیا تے بنتا سنگھ وانگوں وٹا مونہہ تے پئے گا۔ تاں عزت تے بہتری ایسے وچ اے کہ رضا لینا سکھ لوئو۔ مڑ کے کردے پھرو ٹکور تے فائدہ کی۔