عالمی فادر ڈے 21جون 2020 ء دے موقعے تے اک خصوصی تحریر

لکھت:اختر سر د ار چودھری

والد اک مقدس محفاظ اے جیہڑا ساری زندگی اپنے خانداناں دی نگرانی تے حفاظت کردا اے اپنی اولاد دا سب توں وڈا خیر خواہ اے۔ سچا یار اے فیر کیہ وجہ اے کہ ایس بارے وچ گھٹ لکھیا جاندا اے۔ سوچن دی گل اے ، سمجھن دی گل اے، ماں لئی تے سارے دعا کردے نیں، ماں دا پیار تے ساریاں نوں نظر آندا اے ، کدی کسے نے باپ دا پیار وی محسوس کیتا والد نوں وی اپنی اولاد نال پیار ہوندا اے۔ والد دی زندگی ساڈے لئی کھلی کتاب اے ایس کتاب دے اک اک صفحے اک اک سطر، اک اک لفظ نال سانوں فائدہ چکنا چاہیدا اے۔ ایس دے الٹ اسیں ویکھنے آں کہ اولاد آپ تجربے کردی اے تے جدوں اوہ اپنے تجربے اپنی اولاد نوں منتقل کردی اے تے بالکل ایہناں دی طرح اولاد وی اپنے تجربے آپ کردی اے ۔ والد دی کمائی اُتے تاں اولاد حق دار بن دی اے پر ایس دے دیگر تجربے، تعلق ایس دی دوستیاں، اصول توں گھٹ ای فائدہ چکدی اے حالاں کے باپ اک کتاب اے جس تے تجربے تحریر ہوندے نیں اپنے والد نوں اپنے آپ نوں دور نہ کرو بلکے ایس دے تجربیاں توں سکھنا چاہیدا اے پر اسیں ویکھدے آں نویں نسل والدین توں اپنے آپ نوں زیادہ عقل مند خیال کردی اے اپنے والد دے تجربیاں توں سکھن دی بجائے نویں تجربے کردی اے۔
اکثر والد انج ویکھدے نیں جنہاں نوں ایہہ گلہ ہوندا اے اولاد نافرمان اے کہنا نہیں من دے جتھوں روکیے اوتھے جاندے نیں مخالفین نال تعلقات رکھدے نیں تے جنہاں نوں اسیں عزیز رکھنے آں ایہناں توں دور رہنے آں ساڈے کہن تے جنہاں نوں ساڈے نال الفت اے ایہناں دا احترام نہیں کردے وغیرہ، والد دا احترام کرو تاکے تہاڈی اولاد وی تہاڈا احترام کرے۔ والد دی عزت کرو تاکے ایس توں فیض یاب ہو سکو۔ والد دیاں گلاں غور نال سنو تاکے دوجیاں دیاں گلاں نہ سننیاں پین۔ اپنے والد دے ساہمنے اُچی اواز نال نہ بولو نہیں تے اللہ پاک تہانوں نیچا وکھا دیوے گا۔ والد دے اتھرو تہاڈے دکھ تے تکلیف نال نہ ڈگن نہیں تے اللہ پاک تہانوں جنت توں ڈیگ دیوے گا۔
ہر ورھے پاکستان سنے پوری دنیا وچ جون دے تیجے اتوار نوں عالمی فا در ڈے منایا جاندااے یعنی ایس ورھے 21 جون 2020 نوں منایا جائے گا۔ ایہہ ساڈے لئی صرف تہوار نہیں بلکے خدمت تے عزت دا ناں اے۔ امریکا وچ 20ویں صدی دے اوائل وچ ماں دے عالمی دن دی کامیابی توں بعد والد دی عظمت نوں خراج تحسین پیش کرن لئی ایس یوم نوں منان دا سلسلا شروع ہویا تاں ایس نوں عالمی سطح تے مقبولیت 1966 وچ ایس ویلے ملنا شروع ہوئی، جدوں امریکی صدر لنڈن جونسن نے جون دے تیجے اتوار نوں فادر ڈے قرار دتا جد کہ 1972 وچ اینوں امریکی قومی چھٹی قرار دتا گیا، جس دے بعد ہر ورھے جون دا تیجا اتوار دنیا دے بوہت سارے ملکاں وچ فادر ڈے دے طور تے منایا جاندا اے۔
اسیں ویکھنے آں جنے جوش و خروش نال پوری دنیا وچ مدر ڈے منایا جاندا اے، ایس جوش و خروش نال فادر ڈے نہیں منایا جاندا، مغربی دنیا وچ تے انج کیوں اے دی وجہ سمجھ وچ آندی اے کہ اوتھے اکثریت نوں ایس دا علم ای نہیں ہوندا کہ ایہناں دا باپ کون اے ایہہ ای وجہ اے کہ جس شدت نال بچے ماں دے دن دا انتظار کردے نیں تے جویں دے تحفے ایس دن اولاد دی طرفوں والد نوں ملدے نیں اوہ انتظار، اونج ای جوش و خروش تے ایس طرح دے تحفے بوہت گھٹ والد دے حصے وچ آندے نیں، ایس وچ وی پتراں دے مقابلے وچ دھیاں زیادہ اپنے والد نال اپنی محبت دا اظہار کر کے ایہہ دن مناندیاں نیں۔ پر اسیں مشرق وچ ، اپنے پاکستان وچ وی ویکھنے آں کہ والد دی نسبت ماں دی زیادہ عزت کیتی جاندی اے، تے ایہہ وی کہ والد نال زیادہ محبت ایہناں دیاں دھیاں ای کردیاں نیں۔ اسیں ایتھے والد دی شان وچ کجھ اقوال دی روشنی وچ بیان کرن دی سعادت حاصل کر رہے نیں والد جیہڑا کہ جنت دا دروازہ اے ایس بارے وچ گھٹ لکھیا جاندا اے۔
میں ایس تے جنی وی تحریراں دیکھاں ایہناں وچوں اکثر دھیاں دی طرفوں لکھیاں ہوئیاں سن۔ میں ایہہ نہیں کہندا کہ پتر والد نال محبت نہیں کردے میں ایہہ کہہ رہیا واں والد دے بارے وچ پتراں نے گھٹ لکھیا اے۔ایسے طرح جدوں اسلامی تعلیمات دا ذکر ہوندا اے تے وی زیادہ والد دی خدمت تے زور دتا جاندا اے حالاں قرآن پاک سورۃ بنی اسرائیل دی آیات دا مفہوم (فرمان اے کہ اللہ دے سوا کسے دی عبادت نہ کرو تے ماں پیو دے نال بھلائی کرو جے ایہناں دونواں وچوں اک یادونویں بڑھاپے نوں اپڑجائے تے ایہناں نوں اف تیکر نہ کہو تے نہ ایہناں نوں جھڑکو بلکے ایہناں نال نرمی نال گل کرو تے اپنی باہنواں نوں نرمی تے عاجزی نال ایہناں دے اگے ودھائو تے ایہناں لئی انج دعا کرو۔
اے میرے رب تے ایہناں تے ایس طرح رحم فرما جس طرح ایہناں دونواں نے بچپن وچ میرے تے رحمت تے شفقت دی (مفہوم سورۃ بنی اسرائیل آیت 32 تا42) تے بوہت ساریاں حدیثاں وچ زیادہ تر والدین دا ذکر آیا اے یعنی ماں تے پیو دونواں دا۔ (صرف ماں داذکر نہیں)۔
اسلام وچ والد دے حقوق تے احترام تے بوہت زیادہ زور دتا گیا اے۔ ایس لئی سانوں چاہیدا اے کہ ایس تہوار عالمی فادر ڈے نوں صرف تہوار نہ سمجھو ، بلکے اسلام دے سنہرے اصولاں دے مطابق والدین دے حقوق پورے کریے۔ ایہناں دے ادب و خدمت وچ کوئی کمی نہ آن دین۔ بچیاں نوں والد دی قدر ایس ویلے محسوس ہوندی اے جدوں اوہ ایس دنیا توں پردہ کر جاندا اے۔
ہمارے آقا حضرت محمد ﷺ نے فرمایا، جیہڑا اپنے والد دی عزت نہیں کردا اوہ میرا اُمتی نہیں ہو سکدا۔جے اسیں اج اپنے والد دی عزت و احترام نہیں کرن گے ، تے کل آن والی نسل سانوں وی عزت توں محروم رکھے گی۔جس گھر وچ والدین ہون ، اوہ گھر رحمت خداوندی دا آستانہ ہوندا اے ماں پیو دیاں دعاواں نال بلاواں ٹلدیاں نیں مسلماناں دا ہر لمحہ ماں پیو لئی وقف کیتا گیا اے حتیٰ کہ پوری عمر دی عبادت تے ریاضت تے نیکیاں والدین دی رضا توں منسوب نیں۔موجودہ دور نفسانفسی دا اے ایس وچ ہن اسیں سب اپنی روایات توں دور ہوندے جا رہے نیں تے افسوس دا مقام اے اسیں دین اسلام دے فرائض توں وی دور ہوندے جا رہے نیں ایہناں وچوں اک والدین نال حسن سلوک وی اے کہ مغرب دی اندھا دھند تقلید وچ ساڈے کول وی اولڈ ہائوس بن رہے نیں، والدین نوں اولاد ایہناں دے گھر توں ای کڈ رہی اے یا آپ ایہناں نوں چھڈ کے وکھری ہو جاندی اے تے ایس بے حسی ، ظلم تے ذرا وی شرمسار نہیں موجودہ عہد وچ والدین نال بدسلوکیتی، بدزبانی، طعنے دل دکھان والیاں گلاں تے اک معمول بن چکیا اے۔ اولاد اینی مصروف ہو گئی اے ایہناں دے کول ماں پیو دے کول بیٹھن، گلاں کرن دا ویلا نہیں ۔
مغرب وچ اولاد اپنے ماں پیو نوں اولڈ ہومز وچ داخل کروا دیندے نیں، مغرب دی پیروی وچ انج ہن پاکستان وچ وی کیتا جا رہیا اے، پاکستان جیہڑے کہ اک اسلامی ملک اے ایس وچ وی اولڈ ہوم بن چکے نیں، جتھے بڈھے اپنے دکھ درد، داستان حیات سنا کے ویلا گزاری کردے نیں۔ہالینڈ توں اک خبر ٹھنڈی ہوا دے جھونکے وانگوں آئی، جس وچ دسیا گیا اے کہ ہالینڈ دے اک اولڈ ہوم دی انتظامیہ نے اوتھے مقیم بڈھیاں دی تنہائی دور کرن لئی کالج تے یونیورسٹی دے طالب علماں نوں منفرد پیش کش کیتی اے کہ اوہ روزانہ جے اک گھنٹہ اولڈ ہوم وچ رہن والے بڈھیاں دے نال لنگھایئے تتے ایہناں نوں بلا معاوضہ رہائش فراہم کیتی جائے گی۔ ہن تیکر کافی طالب علم اوتھے رہائش پذیر ہو چکے نیں۔
لوڑ ایس امر دی اے کہ ساڈے علماء استاد تے پرنٹ تے الیکٹرانک میڈیا دے نال نال سوشل میڈیا وغیرہ تے حقوق العباد تے زیادہ توں زیادہ کم کیتا جانا چاہیدا اے تاکے نویں نسل اپنے اسلامی فرائض نوں جان سکے۔ سب توں اہم ایہہ اے کہ آخرت دے حساب کتاب دا احساب دلوایا جائے ایہہ ای دانائی اے کہ آخرت دا ڈر ہوئے۔ اسیں سیکھنے آں کہ والدین نال بدسلوکی گناہ کبیرہ اے تے شرک دے بعد سب توں وڈا گناہ اے۔
اسیں ویکھنے آں کہ ماں وانگوں پیو وی اک ذمے دار انسان اے جیہڑا اپنے خون پسینے دی کمائی نال اولاد دی پرورش کردا اے اکثر والد دن رات اپنی اولاد دی پرورش لئی محنت کردے نیں لوکاں دی غلامی کردے نیں گلاں سن دے نیں تے سارا دن جیہڑا کما کے لیاندے نیں اوہ اپنے بچیاں تے خرچ کردے نیں۔ جدوں اولاد والدین دی بخشش لئی دعا کرنی چھڈ دیوے تے ایس دا رزق روک لیا جاندا اے۔ مطلب ایہہ کہ رزق وچ برکت نہیں رہندی رزق ہوندا اے پر کمی دا رونا روندے رہندے نیں۔ ایس وچ برکت نہیں ہوندی، ہوس ودھ جاندی اے،اوہ جیہڑے والدین نوں ستاندے نیں تے والدین ایہناں لئی دعا کرنی چھڈ دیندے نیں۔ بدنصیب اے اوہ بندا جیہڑا اپنے والدین دی خدمت کر کے ایہناں دی دعا نہیں لیندا تے دوجے لوکاں نوں کہندا پھردا اے میرے لئی دعا کرنا۔ پیو اک رحمت خداوندی اے جیہڑا سدا اک چادر وانگوں سر تے تنی رہندی اے۔ جدوں تسیں اپنے والدین نال سختی نال گل کردے او اُچی اواز نال ایہناں نوں جھڑکدے او تے ایس ویلے اللہ تے ایس دے فرشتے تہاڈے تے لعنت کردے نیں۔ تے آخر وچ اک قوم اے کہ ایس ویلے تہاڈی نماز، روزہ، حج، زکوۃ، کسے کم دا جدوں تہاڈوں توں تہاڈے والدین ای خوش نہ ہون۔ آپ ﷺ نے فرمایا کہ ’’ایس دی نک خاک آلود ہوئی (ذلیل ہویا) ایہہ گل تسیں تن وار فرمائی، لوکاں نے پچھیا اے رسول اللہ ﷺ کون ذلیل ہویا؟ آپ نے فرمایا، اوہ بندا جس نے اپنے والدین نوں بڑھاپے دی حالت وچ پایا تے ایہناں دونواں وچوں اک یا دونواں دی خدمت کر کے جنت وچ داخل نہ ہویا۔‘‘ (مسلم)