پاک ایران دوستی دے گہرے رشتے

تحریر:شبیر احمد شگری

انقلاب اسلامی ایران دی سالگرہ سارے اہل اسلام نوں بوہت مبارک ہوئے۔ ایران اوہ پہلا ملک اے جس نے سب توں پہلے پاکستان دی جغرافیائی حیثیت نوں بطور مملکت تسلیم کیتا تے سیاسی تعلقات قائم کیتے تے دونویں ملک اآر سی ڈی تے دیگر علاقائی معاہدیاں وچ جڑے۔ پچھلے ورھیاں وچ علاقائی تے بین الاقوامی سطح تے رونما ہون والی تبدیلیاں تے واقعیاں دی روشنی وچ دو طرفہ تعلقات خاص اہمیت دے حامل بنے تے انج باہمی تعلقات دے فروغ وچ مثبت تے قابل ذکر پیشرفت ہوئی۔ علاقائی تے بین الاقوامی سطح تے خاص طور تے او آئی سی، ایکو تے جی ایٹ جہے اداریاں وچ اک دوجے توں مکمل ہم آہنگی، اتفاق تے تعاون رہیا۔ اعلیٰ سطح وفود دے تبادلے، علاقائی تے بین الاقوامی اجلاساں دے موقعے تے ملاقاتاں مطلوبہ باہمی تعلقات دی نشاندہی کردی اے۔ دونویں ملک کوشاں نیں کہ مشترکہ سیاسی ، اقتصادی، سرحدی تے سکیورٹی کمیشن وچ درپیش مشکلاں تے مسئلیاں تے قابو پاندے ہوئے پرانے تعلقات نوں مزید پکا کرن لئی بنیاداں فراہم کرن۔ حقیقت ایہہ اے کہ ایران تے پاکستان نہ صرف خطے وچ بلکے اسلامی دنیا دے اہم ملک ہون دے ناطے اپنے مضبوط رشتیاں نال عالمی امن لئی اہم کردار ادا کر سکدے نیں۔
پاکستان تے ایران دی لمبی مشترکہ سرحد اے۔ اردو زبان وچ 70 توں 80 فی صد فارسی زبان دے الفاظ نیں۔ پاکستان دے قومی ترانے وچ لفظ ،کا، دے علاوہ سارے الفاظ فارسی زبان دے نیں۔ دونواں ملکاں دی عوام دے دل اک ساتھ دھڑکدے نیں۔ ماضی گواہ اے کہ ایران تے پاکستان دے تعلقات ہمیشہ برادرانہ محبت دے آئینہ دار تے عوامی توقعات دے عین مطابق رہے نیں۔ بہترین سیاسی تعلقات دی موجودگی وچ اقتصادی رابطیاں دا گراف مزید اُتے جانا چاہیدا اے۔ ٹھیک اے کہ ایہہ گراف اُتے جا رہیا اے پر رفتار وچ ہور تیزی لیانی ہوئے گی۔ خوش آئند پہلو ایہہ وے کہ جے دونویں ملک پورے عزم دے نال ایس وچ وادھا کرن وچ کوشاں ہون تے ایس دا حصول قطعی مشکل نہیں۔
دونواں ملکاں دی دوستی دشمناں نوں بوہت کھٹکدی اے دونویں ملک تے اسلام دے دشمناں نے ہمیشہ ایہو کوشش کیتی اے کہ ایہناں دونواں ملکاں دے تعلقات کدی مستحکم نہ ہون پر پاکستان تے ایران ایہناں دی پرانی دوستی تے تعلقات نے ہمیشہ ایس طرح دی سازشاں نوں ناکام بنایا اے تے انشااللہ دشمن ایہناں سازشاں وچ کدی وی کامیاب نہیں ہو سکن گے۔ پاکستان تے ایران دے حکام تدبر دے نال صلاح مشورے دے نال انشااللہ ہمیشہ ساری رکاوٹاں تے مشکلاں تے قابو پا لین گے۔
سانوں ایہہ امید وی رکھنی چاہیدی اے کہ آن والے دناں وچ موجود تجارتی تعلقات وچ خاطر خواہ وادھا تے فروغ حاصل ہوئے گا۔ ایتھے ایہناں ثقافتی رشتیاں تے وی روشنی پانا ضروری اے جیہڑی دونویں ملک دے عوام وچ محبت تے یگانگت دا اہم ستون نیں۔ بوہت گھٹ ملک انج دے ہون گے جیہڑے ایران تے پاکستان دی طرح بوہت سارے رشتیاں وچ جڑے ہون۔ اسیں انج دی گراں قدر مشترک میراث دے مالک نیں جیہڑی ساڈی شناخت دا جزو نیں۔فارسی زبان وچ علما حکما، شعر تے بزرگان دین دے پرانے آثار تے مکتوب، پاکستان دی لائبریریاں وچ موجود فارسی زبان وچ تحریر ہزار ہا قلمی نسخے، فارسی زبان دا اردو زبان دی تشکیل وچ خاص کردار ، دونواں ملکاں دے شعرا، مثال دے طور تے حافظ، سعدی ، مولانا رومی، علامہ اقبال دے علاوہ ثقافت تے ادب نال وابستہ دیگر نامور شخصیات دی دو طرفہ مقبولیت، ایہہ اوہ بنیاداں نیں جنہاں نے دونواں ملکاں دے عوام نوں برادرانہ مضبوط رشتیاں نال جوڑ دتا اے سانوں چاہیدا اے کہ ایس مشترک میراث دی قدر کریے تے آئندہ دی نسلاں تیکر اپڑان لئی ایس دی حفاظت کریے۔ ایہناں رشتیاں نوں توانا بنان لئی اساتذہ ، طلبہ، اہل علم تے دانش تے ہنر منداں دے وفود دے تبادلے اک دوجے توں آشنائی دا کارن بنن گے جس تے سانوں توجہ دین دی لوڑ اے۔ایران تے پاکستان دے وچکار قرار داداں تے معاہدیاں دی کمی نہیں جس شے دی لوڑ اے اوہ مصم عزم تے ارادہ اے جیہڑا ایہناں معاہدیاں وچ روح پا سکے۔
پاکستان تے ایران گہرے مذہبی، تاریخی، تہذیبی تے علمی رشتیاں وچ جڑے نیں ایہناں رشتیاں دا تقاضا اے کہ علمی تے ادب دے شعبیاں وچ باہمی تعاون نوں فروغ دتا جائے۔ ایران وچ حضرت علامہ اقبال نوں بوہت قدر دی اکھ نال ویکھیا جاندا اے تے ایسے طرح پاکستان وچ وی شاید کوئی انج دا گھر نہیں جس وچ حافظ شیرازی تے ایہناں دے مجموعہ اشعار دا ذکر نہ ہوئے۔
خاص طور تے حکایات سعدی نوں پاکستان وچ بوہت مقبولیت حاصل اے۔ اک ویلا سی کہ فارسی زبان ساڈے تعلیمی نظام دا حصہ سی۔ اردو زبان تے ادب تے فارسی زبان دی گہری چھاپ وکھائی دیندی اے۔ دونواں ملکاں دے عوام دے وچکار علمی تے ادبی رشتیاں نوں مزید پروان چڑھان لئی خطاطی، اردو تے فارسی کتاباں دے دونواں زباناں وچ تراجم تے اہل علم و ادب دے وفود دے تبادلیاں دا سلسلا وی ودھایا جانا چاہیدا اے۔
جنگاں ہون، قدرتی آفات ہون یا اقوام متحدہ دے فورم ایران نے ہمیشہ پاکستان دا ساتھ دتا۔ بنگلہ دیش نوں وی ایران نے ایس ویلا تسلیم کیتا جدوں پاکستان نے اینوں تسلیم کیتا، ایس دے علاوہ کشمیر دا مسئلہ جدوں وی اقوام متحدہ وچ پیش ہویا اے ایران نے ہمیشہ پاکستان دے موقف دی حمایت کیتی اے۔
امید اے کہ دونویں ملکاں دے حکام تے عوام دی جاری کوششاں ماضی دی کمی نوں پورا کرن تے اپنے بلند مقصد نوں حاصل کرن وچ مزید کامیابی نال ہمکنار ہون گے۔ انشا اللہ