طبلِ جنگ وج چکیا اے

لکھت:عتیق انور راجا

چین دے ہتھوں بھارتی فوجیاں دی موت تے قید دے بعد بھارتی سیاسی پارٹیاں دے نال ہون والی میٹنگ دے بعد لنگھے جمعے نوں بھارتی وزیراعظم نریندر مودی نے لداخ وچ پیش آن والے واقعے متعلق وضاحتی بیان جاری کیتا کہ چین گلوان وادی وچ وڑ یا ای نہیں تے نہ چین دی فوج نے بھارت دی کسے چوکی تے قبضہ کیتا اے۔ نریندر مودی دے ایس بیان توں بعد ٹوئٹر تے (مودی نے گلوان وادی وچ ہار من لئی ) دا ہیش ٹیگ نال ٹینڈ چلایا گیا جیہڑا ٹوئٹر دا ٹاپ ٹرینڈ بن گیا۔ ٹوئٹر تے ای بھارتی فوج دے بوہت سارے سابق اعلیٰ افسراں نے گلوان وادی وچ بھارت نوں ہون والی ہزیمت اُتے غصے تے مایوسی دا اظہار کیتا۔ مقبوضہ کشمیر وچ کور کمانڈر تے بھارت دی جنوبی کمانڈ دے کمانڈر رہن والے لیفٹیننٹ جنرل رامشیور رائے نے نریندر مودی دے بیان اتے رد عمل ظاہر کردے ہوئے اپے ٹوئٹ وچ کہیا کہ ’’اج انتہائی بدقسمت دن اے، میں شکر ادا کرنا واں کہ ریٹائرڈ ہو گیا تے میرا پتر فوج وچ نہیں۔ ‘‘ رامیشورائے دا کہنا سی کہ بھارت نے چین دی طرفوں مشرقی لداخ وچ کیتی گئی تبدیلیاں تسلیم کر لیاں نیں۔ اج دا دن ہر بھارتی فوج لئی افسوس دا دن اے۔ بھارت دے ریٹائرڈ فوجی افسراں دی تنظیم دے چیئر مین میجر جنرل ستہیر سنگھ نے جنرل رامیشور دی ٹوئٹ تے تبصرہ کردے ہوئے کہیا کہ جنرل رائے نے فیر وی نرم الفاظ استعمال کیتے نیں ۔ حزب اختلاف دی سب توں وڈی جماعت کانگریس دے رہنما راہول گاندھی نے اپنے اک ٹوئٹ وچ کہیا کہ وزیراعظم چینی جارحیت دے خلاف اپنے علاقیاں توں آپ ای دست بردار ہو چکے نیں۔ ایہناں دا کہنا سی کہ جے چین بھارتی علاقیاں وچ داخل نہیں ہویا۔ تے فیر بھارتی فوجی کیوں تے کنج مارے گئے؟ سونیا گاندھی نے کہیا کہ اوہ بھارتی وزیر اعظم توں پورا سچ سنن دی خواہش رکھدیاں نیں۔ بھارتی تربیتی اداریاں نال جڑے فوج دے سابق مشیر لیفٹیننٹ جنرل پرکاش مینن نے مودی دے بیان متعلق سوال چکیا کہ وزیراعظم دے بیان توں تے ایہو لگدا اے کہ بھارت وادی تے چین دا دعویٰ تسلیم کر چکیا اے۔ اک ہور سابق بھارتی کرنل تے موجودہ صحافی اجے شکلا دا کہنا سی کہ وزیراعظم نریندر مودی دیاںپالیسیاں دی وجہ نال چین بھارت دے نال سرحداں اپنی مرضی نال کھچ رہیا اے۔ اک صاحب نے ٹوئیٹ کیتا کہ حکومت دی بھل اے کہ اپنے فنڈڈمیڈیا دے ذریعے اوہ کجھ وی کہہ کے بچ نکلے گی۔ زمینی حقائق بوہت جلدی بھارتی عوام دے ساہمنے ہون گے۔ حقیقت ایس گل دی نشاندہی کر رہی اے کہ اج دا بھارتی نریندر مودی دی وجہ نال بوہت حد تیکر کمزور ہو چکیا اے۔ بھارت نے افغانستان وچ بھاری سرمایہ کاری کیتی پر امریکہ دے بعد بھارت وی افغانستان وچ رسوا ہو چکیا اے۔
اج دا پاکستان تاریخ دے سب توں مضبوط مقام تے کھلوتا اے جد کہ بھارتی حکومت نے مسلماناں دے نال نال ہندو ذات دے لوکاں نوں وی اپنے خلاف کیتا ہویا اے۔ جے پاک بھارت جنگ ہوندی اے تے بھارت وچ مقیم 25کروڑ مسلمان اپنے نال ہون والی زیادتیاں نوں ویکھ کے اپنے لئی کسے وکھرے وطن دی کوشش کر سکدے نیں تے بھارت دی دوجی ریاستاں وچ چلن والی علیحدگی دی تحریکاں پہلے توں زیادہ سرگرم ہو جان گیاں۔ پاک بھارت یا بھارت چین تصادم دے ویلے بوہت ساریاں ریاستاں بھارت توں آزادی دا اعلان کر سکدیاں نیں۔ مسلمان، عیسائی، سکھ تے اک پاسے بھارتی ہندو دلت وی اپنی حکومت توں خوش نہیں کیوں جے ایہہ بھارتی حکومت میڈیا تے ایہناں نوں دلت کہن تے پابندی لائی جا چکی اے۔ ایس لئی اوہ وی کسے جنگ دی صورت اپنے حقاں دی بحالی لئی کوئی سائبان لبھن دی کوشش کر سکدے نیں۔ بھارتی سکھ وی خالصتان بنان لئی پرجوش نیں۔ چین دی حمایت تے نکے جہے ملک نیپال نے بھارتی علاقیاں نوں اپنے نقشے وچ شامل کر کے ایہناں دی واپسی دی کوشش شروع کر دتی اے۔ انج پاکستان نوں مستقبل وچ کسے وی صورتحال وچ امریکی ثالثی قبول کرن دی بجائے چین دے نال مشورے کر کے بھارت نوں سبق سکھان دی کوشش کرنی ہوئے گی۔ دسیا جاندا اے کہ 1962ء وچ چین بھارت جنگ دے ویلے چین نے پاکستان نوں پیشکش کیتی سی کہ اک پاسے اسی بھارت نوں دبانے آں دوجے پاسے تسیں کشمیر دی آزادی لئی ہمت کرو پر صدر ایوب خاں نے انج نہ کیتا تے بھارت دے نال چنگے تعلقات دی آس وچ اوہ موقع گما دتا اج فیر اک موقع بنیا ہویا اے تے قدرت قوماں نوں تقدیر بدلن دے موقعے بار بار نہیں دیندی۔