عدالتی فیصلہ کسے دی ہار جِت نہیں!

لکھت:تحریر:شاہد ندیم احمد

عدالت عظمیٰ نے جسٹس قاضی فائز عیسیٰ دے خلاف سپریم جوڈیشنل کونسل وچ صدر مملکت دی طرفوں گھلیا جان والا ریفرنس کالعدم قرار دیندے ہوئے فاضل جج دے خلاف جاری کیتے گئے اظہار وجوہ دے نوٹس نوں وی منسوخ کر دتا اے تے انج عملاً جسٹس قاضی فائز عیسیٰ دے بنیادی موقف دا درست ہونا تسلیم کر لیا گیا اے۔ حکومت بظاہر عدالتی فیصلے تے اطمینان دا اظہار کردے ہوئے اینوں کسے ہار جت توں مبرا قرار دے رہی اے، تاں ایس دے نال ایہہ تاثر وی قوی کیتا جا رہیا اے کہ ہن حکومت ایف بی آر توں رپورٹ لے کے جسٹس قاضی فائز عیسیٰ نوں فیر گرفت وچ لیان دی کوشش کرے گی۔ ایہہ پہلا موقع نہیں کہ کسے جج دے خلاف ریفرنس صدر مملکت دی طرفوں دائر کیتا گیا، ایہہ اپنی نوعیت دا دوجا واقعیا سی تاں دونواں دے نتیجے یکساں نکلے نیں تاں ایس فیصلے وچ کس دی جت یا ہار ہوئی، ایہہ آن والا ویلا ای واضح کرے گا۔
ایس سپریم کورٹ دے مختصر فیصلے دے بارے وچ بوہت ساری آرا اگے آ رہیاں نیں، ایہناں وچوں دو انتہائی قابل غور نیں، پہلی رائے وچ ایہہ اک کمزور فیصلہ اے جس وچ عدلیہ نے اپنی جلد بچان دی کوشش کیتی اے تے حکومت نوں اک جج دے خلاف اک نقاص تے بدنیتی تے مبنی ریفرنس دائر کرن دے باوجود باعزت باہر کڈن دا راہ دتا گیا پر ایس دے نال اک انج دا جال وی تیار کیتا گیا کہ جس وچ جسٹس قاضی فائز عیسیٰ نوں دوبارہ پھسایا جا سکدا اے جد کہ دوجی رائے وچ ایہہ اک پکا فیصلا اے جس وچ عدلیہ دی خود مختاری نوں نہ صرف یقینی بنایا گیا اے، بلکے اک جج دے خلاف کیتی جان والی غیر قانونی کاروائی نوں متفقہ طور تے مسترد کر دتا گیا اے۔ سانوں سپریم کورٹ دے فیصلے اتے رائے بناندے ہوئے ملک دے معروضی حالات نوں نظر انداز نہیں کرنا چاہیدا۔ قانونی ماہرین فیصلے دی کمزوریاں تے خامیاں تے گل کردے رہن گے پر ملک دے عمومی سیاسی پس منظر وچ ایہہ اک مثبت فیصلا اے۔ موجودہ حالات وچ حکومت نوں براہ راست شرمندہ کرن والا کوئی فیصلہ نقصان دہ ہو سکدا سی۔ جے حکومت نے فیصلے دے بعد اپنی غلطی دا ادراک کیتا تے متعلقہ اداریاں نے حقائق تے دستاویزی شواہد دی بنیاد تے ایس معاملے نوں دیانت داری نال طے کیتا تے جسٹس قاضی فائز عیسیٰ دے خلاف شبہات ختم ہو جان گے تے ایہہ وی واضح ہو جائے گا کہ حکومت ایس معاملے نوں انا دا معاملہ نہیں بنانا چاہندی۔
ایس ویلے ملکی حالات باہمی تصادم لئی ساز گار نہیں، حکومت تے عدلیہ نوں ماضی دیاں غلطیاں بھلا کے اداریاں دے وچکار تصادم دی نویں صورت حال توں بچن دی کوشش کرنی چاہیدی اے پر سیاسی قائدین قانونی مسئلے تے وی سیاست چمکان توں باز نہیں آ رہے ۔ ایہہ کنج دا المیہ اے کہ اپوزیشن جماعتاں جسٹس قاضی فائز عیسیٰ کیس نوں وی اداریاں دے وچکار تصادم ودھان لئی استعمال کر رہیاں نیں۔ خاص طور تے مسلم لیگ ن اینوں عدلیہ تے حملے دا منصوبہ قرار دین دا تاثر بنا رہی اے حالاں کے ایسے مسلم لیگ ن نے ماضی وچ نہ صرف عدلیہ تے حملا کیتا، بلکے ججاں تے بھار پا کے مرضی دے فیصلے وی کرواندے رہے نیں، ہجے تن ورھے پہلے دی گل اے جدوں ایس معزز سپریم کورٹ نے پانامہ لیکس دی سماعت کیتی سی۔قانونی عمل دا سامنا کرن دی بجائے شریف خاندان دے کجھ بندے تے ایہناں دے ساتھی عدالتی جے آئی ٹی آفس دے باہر دن وچ کئی وار اداریاں دے خلاف پریس کانفرنس کردے نہیں تھکدے سن، اپنے اُتے الزاماں دا جواب دین دی بجائے عمران خان تے دیگر شخصیات دی آمدنی تے جائیداداں متعلق سوال چکدے سن تے اپنے خلاف فیصلے تے سراپا احتجاج سن کہ مینوں کیوں کڈیا گیا؟ مسلم لیگ ن نوں موجودہ حکومت تے عدلیہ دے حوالے نال الزام تراشی کردے ویلے اپنے گریباناں وچ وی ضرور ویکھنا چاہیدا اے۔
ایہہ بدقسمتی دی گل اے کہ معاشرے وچ بلاامتیاز احتساب تے قانونی دی حکمرانی دے ضمن وچ کیتی گئی کوششاں نوں کسے نہ کسے وجہ نال متنازع بنا کے ایہناں دا مذاق اڑایا جاندا اے۔ کجھ حلقے جسٹس قاضی فائز عیسیٰ کیس تے وی ایسے انداز وچ تبصرے کر رہے نیں۔ ایہہ نامناسب طرز عمل اے تے ساڈے رویاں وچ اصلاح دا تقاضا کردا اے، ایس رویاں نال اداریاں دے مابین کشیدگی پیدا ہون دے خطرے ہوندے نیں، ایس لئی سانوں انج دیاں شیواں توں گریز کرنا چہایدا اے۔ اپوزیشن جماعتاں دا ایس موقعے تے ذمے داری دا مظاہرہ نہ کرنا افسوس دا کارن اے۔ جسٹس قاضی فائز عیسیٰ دے خلاف ریفرنس وچ سپریم کورٹ دا فیصلا ایس لحاظ نال لائق احترام اے کہ معزز عدالت نے معاملے دے ایہناں گوشیاں نوں اجاگر کرن دی گل کیتی اے جیہڑا اک معزز جج تے الزاماتں دی بنیاد بنے۔ ایس وچ کسے دی ہار جت نہیں بلکے بلاامتیاز قانون تے انصاف واضح کرن دی کاوش اے۔امکان غالب اے کہ ایف بی آر ایس سلسلے وچ دتے گئے ویلے دے اندر اپنی تحقیقات مکمل کر کے رجسٹرار سپریم کورٹ نوں رپورٹ جمع کرا دیوے گا۔ ایس رپورٹ دی روشنی وچ سپریم جوڈیشنل کونسل معاملے دی سماعت کرے گی۔ ساڈے سامنے اک قانونی طریقہ کار آ گیا اے کہ ججاں دے خلاف مس کنڈکٹ الزام تے سماعت تے فیصلے لئی کیہڑا پلیٹ فارم ہوئے گا۔ ایہہ فیصلہ بجا طور تے ایہناں لوکاں لئی جت اے جیہڑے اداریاں دے وچکار ہم آہنگی دے خواہاں نیں تے ایہناں لئی ہار جیہڑا اپنے ذاتی سیاسی مقصد دے حصول ناکام ہوئے نیں۔