عثمان بزدار حکومت دا اک ہور کارنامہ

لکھت:بلال مدثر بٹ

عقیدہ ختم نبوت ایہناں بنیادی عقیدیاں وچوں اک اے جنہاں تے گوں نا گوں اختلافات دے باوجود تیرہ صدیاں تیکر امت دا کلی اتفاق تے قطعی اجماع رہیا اے۔جس طرح اک مسلمان لئی اللہ تعالیٰ دی توحید، قیامت، حضور دی رسالت کسے دلیل دی محتاج نہیں ، ایسے طرح ختم نبوت دے مسئلے تے وی کوئی بحث نہیں رہی تے ایس دے ثبوت لئی کدی کسے مسلمان نوں دلیل یا بحث و تمحیص دی لوڑ محسوس نہیں ہوئی پر مرزا قیادیانی نے اوہ کم کر وکھایا جس دی جرات اج تیکر شیطان نوں وی نہیں ہوئی سی۔ ایس لافانی حقیقت دے باوجود کہ خاتم النبین ؐ دی ذات اقدس کسے دلیل دی محتاج نہیں، ختم نبوت دے عقیدہ تے اہل ایمان نوں اکثر ایہناں لا یعنی مباحث وچ الجھان دی کوشش دا سلسلا انج ای سر چکدا رہیا اے جس دا مقصد محض لوکاں وچ بے چینی پیدا کرنا ہوندا اے۔ جس لئی ہمیشہ حکومت ویلے نوں وی اپنے ایفائے عہد دے فرض دی ادائیگی لئی عملی تقاضے پورا کرنے پیندے نیں۔ ختم نبوت دا عقیدہ محض اک عقیدہ نہیں بلکے اسیں سب دے ایمان دا جزو اے۔ ایس لئی ضروری اے کہ ایس مسئلے دے متعلق امت دی حساسیت دا پورا خیال رکھیا جائے تاکے حضور ؐ دا امتی کسے غلط فہمی پاروں اپنے آقا کریم ؐ توں کٹ کے نہ رہ جائے
ایس وچ کوئی دوجی رائے نہیں کہ مرزا قادیانی انگریز دا خود کاشتہ پودا سی جیہڑا ایس نے مسلماناں وچ تفریق پیدا کرن لئی لایا سی پر ایس دا ایہہ وار ایس لئی ناکام گیا کہ ایس مسئلے تے علمائے کرام ہمیشہ بلا تفریق مسلک اک پلیٹ فارم تے جمع رہے تے اوہناں نے ہر محاذ تے ایس نوں شکست فاش دتی 1953ء دی تحریک ختم نبوت ہوئے یا فیر 1974ء وچ قادیانیاں نوں غیر مسلم قرار دتے جان دا واقعہ پاکستان توں میوس ہون دے بعد قادیانیاں نے بین الاقوامی فورمز تے پاکستان نوں بدنام کرن دی کوشش کیتی پر ایہناں دی ایس کوشش نوں ناکام بنان وچ ہمیشہ ایس دا سہرا وی ساڈے بزرگاں دے سر رہیا۔
2018 دے انتخابات توں بعد توں ملک قادیانیت دے ودھدے ہوئے اثر نفوذ توں خاص طور تے مذہبی تے بالعموم سیاسی حلقیاں وچ اک بے چینی رہی اے۔ اہم عہدیاں تے قادیانیاں دی تعنیاتی پاروں شبہات دی فضا ایس ویلے مزید گہری ہو گئی جدوں پہلے حج فارم دا معاملا ساہمنے آیا فیر اقلیتی کمیشن وچ ایہناں دی رکنیت دا معاملا چکیا تے بڑی چابکدستی نال قادیانیاں نوں ایس کمیشن کارکن بنان دی کوشش کیتی گئی۔ ایہہ صورت حال موجودہ حکومت لئی اہمیت دی حامل سی۔ پنجاب وچ وزیراعلیٰ پنجاب عثمان بزدار دے نال نال پاکستان دے سب توں تجربہ کار سیاستدان چوہدری پرویز الٰہی بطور سپیکر پنجاب اسمبلی جس طرح مل کے کم کر رہے نیں۔ اپنے اقدامات نال اوہناں نے ثابت کیتا کہ اوہ اک بااختیار ، سمجھدار تے انتظامی امور تے گہری اکھ رکھن والے بندے نیں۔ مئی 2020وچ ہون والے پنجاب اسمبلی دے اجلاس وچ بلاشبہ ایس مسئلے تے ہر پاسے صوبائی حکومت نوں اپنی پوزیشن واضح کرن لئی کہیا جا رہیا سی۔ چناں چے ایس اہم فریضے دی ادائیگی لئی حکومت دے وزیر تے چوہدری برادران دے قریبی ساتھی حافظ عمار یاسر نے حضور خاتم النبین ؐ دی عظمت تے شان دے تحفظ لئی ایوان وچ قرار داد پیش کر کے ایہہ سعادت حاصل کیتی۔ قیام پاکستان دے بعد 1953 دی تحریک ختم نبوت دے دوران ایس مسئلے نے شدت اختیار کیتی۔ ایس دے پس منظر وچ دنیا اسلام دے معروف مفسر تے سیرت نگار سپریم کورٹ آف پاکستان دے سابق جج حضرت جسٹس پیر محمد کرم شاہ الازہری عقیدہ ختم نبوت دی تعریف ایہناں لفظاں وچ کردے نیں، حضور سرور عالم سیدنا محمد رسول اللہ ؐ سب توں آخری نبی نیں۔ حضور ؐدی تشریف آوری دے بعد نبوت دا سلسلا ختم ہو گیا۔ حضور ؐ دے بعد کوئی نواں نبی نہیں آ سکدا۔ تے جیہڑا بندا اپنے نبی ہون دا دعویٰ کردا اے تے جیہڑا بدبخت ایس دے دعویٰ نوں سچا تسلیم کردا اے اوہ دائرہ اسلام توں خارج تے مرتد اے تے ایسے سزا دامستحق اے جیہڑی اسلام نے مرتد لئی مقرر فرمائی اے۔ (ضیاء القرآن ۔ جلد چہارم ) 1953 دی تحریک ختم نبوت وچ حضرت مولانا عبدالستار خان نیازی تے مولانا مودودی نوں سزائے موت سنائی گئی۔ کئی دیگر علمائے کرام وی پابند سلاسل رہے۔ ویلا لنگھن دے نال نال قادیانیاں دا ملک وچ اپنا اثر نفوذ ودھدا رہیا۔ کلیدی عہدیاں تیے ایہناں دے لوک اپڑن وچ کامیاب ہو گئے۔ 1974ء وچ پیپلز پارٹی دے دور حکومت وچ ایس تحریک نے اک وار فیر زور پھڑیا جدوں ربوہ وچ کجھ طلبا جیہڑے اک تفریحی دورے توں واپس آ رہے سن ، قادیانیاں نے ایہناں تے حملا کر دتا۔ طلباء نو تشدد دا نشانہ بنایا گیا۔ ایہناں معصوم طلباء دا لہو ربوہ دی سرزمین تے ڈگن دی دیر سی کہ اک ملک گیر تحریک نے جنم لیا۔ 1974 دی تحریک ختم نبوت وچ علماء تے عوام نے مل کے انج دا کردار ادا کیتا جیہڑا رہندی دنیا تیکر یاد رکھیا جائے گا۔ 1974 دی تحریک ختم نبوت وچ شیخ الاسلام خواجہ قمر الدین سیالوی، مفتی محمود ااحمد رضوی ، ضیاء الامت حضرت پیر محمد کرم شاہ الازہری، مولانا منظور احمد چنیوٹی، مولانا اللہ وسایا، شورش کاشمیری، چوہدری ظہور الٰہی جہے اکابر علماء صف اول وچ شامل سن۔ ختم نبوت دے تحفظ لئی علماء تے مشائخ تے عوام نے اپنے جان و مال دی قربانی پیش کیتی۔ ایواناں توں باہر پاکستان دے گلی کوچیاں وچ ختم نبوت دے شیدائیاں نے اپنے لہو نال وطن عزیز دیاں گلیاں نوں رنگ دتا۔ ایس تحریک نے ملک نوں عملی طور تے مفلوج کر دتا۔ پاکستان دے کئی شہراں وچ کرفیو دی نوبت آ گئی۔ کاروبار حکومت رک کے رہ گیا۔ عوام تے تشدد، گرفتاریاں، لاٹھی چارج، آنسو گیس نے ہر اوہ حربہ استعمال کیتا گیا جیہڑا ممکن سی پر ایہہ ساری ریاستی ہتھکنڈے عشاقان رسالت دی جذبیاں نوں سرد نہ کر سکے۔ خوش قسمتی نال ایس ویلے ذوالفقار علی بھٹو جہیا جہاں دیدہ سیاستدان ملک دا حکمران سی۔ اوہناں نے حالات نوں بھانپ لیا تے ایس اہم مسئلے نوں قومی اسمبلی وچ لیا کے ای معاملا طے پا سکیا۔ پاکستان دی قومی اسمبلی نے متفقہ طور تے قادیانیاں نوں کافر قرار دے دتا جد کہ ملک دی ساری سیاسی قیادت نے اپنی اجتماعی دانش دا مظاہرہ کردے ہوئے ایہہ عظیم سعادت اپنے ناں کر لئی۔ مولانا شاہ احمد نورانی، مولانا مفتی محمود خان عبدالولی خان، چوہدری ظہور الٰہی، پروفیسر غفور احمد سارے اکابرین نے ایس قانون سازی وچ نمایاں کردار ادا کیتا۔ ذوالفقار علی بھٹو نوں ایہہ سعادت نصیب ہوئی کہ اوہناں نے اپنے دستخط نال ایس ترمیم نوں دستور پاکستان دا حصہ بنایا پر قادیانی لابی دے اثر و رسوخ نوں محسوس کردے ہوئے اوہ ایہہ کہے بغیر نہ رہ سکے کہ میں ایس مسودے دے ذریعے اپنی موت دے پروانے تے دستخط کیتے نیں۔ پاکستان دی قومی اسمبلی دی طرفوں ترمیم منظور کیتے جان دے بعد قادیانیاں دی سرگرمیاں تے قانونی طور تے پابندی عائد کیتی گئی۔ اوہناں نے پاکستان دی مختلف عدالتاں وچ جا کے اپنا موقف بیان کیتا پر ہائی کورٹس ، وفاقی شرعی عدالت، سپریم کورٹ آف پاکستان نے وی ایہناں دے موقف نوں غلط قرار دیندے ہوئے قومی اسمبلی وچ بنائے گئے قانون دی توثیق کیتی۔
حالیہ دناں وچ بے پناہ ع وامی رد عمل سامنے آن تے ایس لابی دی ایہہ کوششاں ناکام تے بنا دتیاں گئیاں پر شکوک تے شبہات دی فضا قائم رہی۔ وفاقی وزیر مذہبی امور دی بار بار وضاحت توں بعد اک گونہ اطمینان نصیب ہویا۔ وزیراعظم پاکستان نے وی اپنے اک پیغام وچ ایس عزم دا اظہار کیتا کہ اوہ ختم نبوت تے کامل یقین رکھدے نیں تے کسے انج دی سرگرمی دی پشت پناہی نہیں کیتی جائے گی جیہڑی قادیانیت دی تقویت دین دا کارن بنے۔ ایہناں ای خطاں تے وزیراعلیٰ پنجاب عثمان بزدار دی کابینہ دے اک وزیر نے ختم نبوت دے حوالے نال ایہہ قرار داد پیش کر کے دونواں جہاناں دی سعادتاں اپنے ناں کر لیاں۔ پیش کیتی جان والی قرار داد وچ ایہناں دے عمل نوں نظر انداز نہیں کیتا جا سکدا۔ عام طور تے ایس طرح دی قرار داداں اپوزیشن دی طرفوں پیش کیتیاں جاندیاں نیں پر قانون ختم نبوت دے نال چوہدری ظہور الٰہی فیملی دا اک خاص تعلق وی اے۔ چناں چے اک وار فیر پاکستان دے سارے سیاستداناں دی طرفوں فرض کفایہ ادا کردے ہوئے چوہدری پرویزالٰہی نے اک اہم قدم چکن دا فیصلا کیتا۔ یقینا ایس فیصلے وچ ایہناں نوں وزیراعلیٰ پنجاب عثمان بزدار دی مکمل رضا مندی تے تائید حاصل رہی۔ چوہدری برادران دے قریبی ساتھی حافظ عمار یاسر نے حضور خاتم النبین ؐ دی عظمت تے شان دے تحفظ لئی پنجاب اسمبلی وچ قرار داد پیش کیتی تے ایس توں پہلے اسپیکر پنجاب اسمبلی چوہدری پرویز الٰہی نے ایوان نال مخاطب ہوندے ہوئے کہیا کہ ختم نبوت ساڈے ایمان دا بنیادی حصہ اے۔ نبی اکرم ؐ دی ذات اقدس تے ساڈی جان وی قربان اے جدوں تیکر قادیانی اپنے آپ نوں غیر مسلم تسلیم نہیں کردے اودوں تیکر ایہناں نوں اقلیت تسلیم نہیں کیتا جا سکدا۔ پنجاب دے وزیرمعدنیات دی طرفوں پیش کیتی گئی قرار داد وچ کہیا گیا کہ ارشاد باری تعالیٰ اے ، اے مسلمانوں، حضرت محمد رسول اللہ ؐ ، تہاڈے وچوں کسے مرد دے پیو نہیں پر اوہ اللہ دے رسول نیں۔ تے خاتم النبین ؐ نیں۔ قرآن وچ واضح طور تے بیان ہو گیا کہ نبوت دا راہ ہمیشاں لئی بند ہو گیا اے۔ ہن کسے ہور نبوت دے اجراء دا سوال ای پیدا نہیں ہوندا۔
پنجاب اسمبلی وچ پیش کیتی گئی قرار داد وچ جامع ترمذی تے سنن ابی دائود وچ حضرت ثوبان ؓ توں مروی اک روایت وی بیان کیتی گئی جس وچ حضور اکرم ؐ نے فرمایا امت وچوں 30 بندے انج دے اٹھن گے جیہڑے کذاب یعنی جھوٹے ہون گے ایہناں وچوں ہر بندا اپنے بارے وچ ایہہ گمان کردا ہوئے گا کہ اوہ نبی اے حالاں کے میں خاتم النبینؐ آں میرے بعد کوئی نبی نہیں آئے گا۔ قرار داد وچ مزید کہیا گیا کہ حضرت محمد رسول اللہ دی عظمت تے فضیلت دا پہلو ایس اعتبار نال کہ نبوت آپ ؐ تے کامل ہو گئی اے رسالت دی آپ ؐ تے تکمیل ہو گئی اے۔ ایہو وجہ اے کہ قرآن و حدیث شریف وچ حضورؐ دے ضمن وچ خاص طور تے تکمیل اکمل جہے الفاظ بکثرت استعمال ہوئے۔ قرار داد وچ وفاقی کابینہ نوں خراج تحسین پیش کردے ہوئے واضح کیتا گیا قادیانی آئین پاکستان نوں من دے نیں نہ اپنے آپ نوں غیر مسلم اقلیت تسلیم کردے نیں جس اُتے ایہناں نوں اقلیتی کمیشن وچ شامل نہ کرنا ٹھیک فیصلا اے۔ ایہہ ایوان اعادہ کردا اے کہ آئے دن ناموس رسالتؐ تے کوئی نہ کوئی مسئلا کھڑا کر دتا جاندا اے، کدی حج فارم وچ تبدیلی کر دتی جاندی اے تے کدی کتاباں وچوں خاتم النبینؐ دا لفظ کڈ دتا جاندا اے پر اج تیکر ایہناں سازشیاں دے خلاف کوئی کاروائی نہیں کیتی گئی۔ چناں چے ایہہ ایوان وفاقی حکومت نال مطالبہ کردا اے کہ ایہہ سلسلا بند ہونا چاہیدا اے۔
قرار داد وچ مزید کہیا گیا کہ جیہڑیے لوک ایہناں سازشاں وچ رلت نیں ایہناں نوں بے نقاب کر کے سخت توں سخت سزا دتی جائے۔ اقلیتی کمیشن وچ ہندو سکھ تے مسیحی بیٹھ دے نیں جس تے کدی اعتراض نہیں کیتا گیا، کیوں جے اوہ اپنے آپ نوں مسلمان نہیں کہندے۔ اسیں اقلیتیاں نوں آئین وچ دتے گئے حقاں لئی آواز اُچی کردے آں ایہہ ایوان مطالبہ کردا اے کہ جے قادیانیاں دا سربراہ ایہہ لکھ کے گھل دیوے کہ اوہ آئین پاکستان نوں من دے نیں تے اپنے آپ نوں غیر مسلم اقلیت تسلیم کردے نیں تے سانوں ایہناں دے کمیشن وچ بیٹھن تے کوئی اعتراض نہیں ہوئے گا۔ قرار داد دے متن وچ مزید کہیا گیا کہ ختم نبوت دا معاملہ ساڈے لئی ریڈ لائن اے۔تحفظ ختم نبوت تحفظ ناموس رسالت، تحفظ ناموس اصحاب رسول، تحفظ ناموس اہل بیت اطہار تے تحفظ ناموس امہات المومنین رضوان اللہ علہیم اجمعین توں ودھ کے ساڈے لئی کوئی شے نہیں۔ ایہہ قرار داد موجودہ پنجاب حکومت تے پنجاب اسمبلی دے متھے دا جھومر اے۔ ایس دی منظوری اُتے پنجاب اسمبلی وچ قائد ایوان عثمان بزدار تے اپوزیشن لیڈر حمزہ شہباز شریف مبارکباد دے مستحق نیں۔ ایہہ اوہ سعادت اے جیہڑی ایہناں دے لئی دنیا تے آخرت دی کامرانی دا کارن بنے گی۔ عثمان بزدار دی حکومت بجا طور تے ایس کارنامے تے فخر کر سکے گی۔ سپیکر پنجاب اسمبلی چوہدری پرویز الٰہی نے اپنے طرز عمل نال ثابت کیتا اے کہ اوہ نہ صرف اک پر عزم، جہاندیدہ سیاستدان نیں بلکے اوہ اپنے سینے وچ محبت رسول ؐ نال بھرپور اک دل وی رکھدے نیں۔ حکومتی ایواناں وچ بیٹھے لوکاں وانگوں ایہہ مسئلا امت لئی وی ریڈ لائن دی حیثیت رکھدا اے۔ ایہناں حالات وچ میں جے کوئی انج دا قدم چکیا جس نال لوکاں نوں ایہہ محسوس ہویا کہ حکومت قادیانیاں دی طرف داری یا سرپرستی کر رہی اے تے بے روزگاری، غربت تے بھکھ افلاس دی ستائی قوم پھٹ پئے گی۔ اللہ پاک وزیراعلیٰ پنجاب عثمان بزدار ، قائد حزب اختلاف حمزہ شہباز، تے سپیکر پنجاب اسمبلی چوہدری پرویز الٰہی تے سارے اراکین اسمبلی نوں ایہہ قرار داد منظور کرن تے اجر عظیم عطا فرمائے۔