پِلاک ولوں ’’ طافو کے رنگ صابری کے سنگ‘‘ محفلِ موسیقی

رپورٹ: سید علی قیصر

پنجاب انسٹیٹیوٹ آف لینگوئج، آرٹ اینڈ کلچر (پِلاک)، محکمہ اطلاعات و ثقافت پنجاب دے زیر اہتمام ’’طافو کے رنگ صابری کے سنگ‘‘دے زیر عنوان محفل موسیقی دا انعقاد ہویا۔ جس وچ امجد صابری دے پتر مجدد صابری نے استاد طافو خان دی باقاعدہ شاگردی اختیار کیتی۔ ایس موقعے اُتے فنکاراں تے موسیقاراں دی کثیر تعداد نے شرکت کیتی۔ محفلِ موسیقی وچ استاد طافو خان دے شاگرداں نے پرفارم کیتا جنہاں وچ نوراں لعل، میگھا، گلاب،امِ لیلیٰ، زرقا، ردا شاہ ،ملائکہ،طٰہٰ،صدف، راحت،ناصر بیراج، تے طارق طافو دے علاوہ دیگر وی شامل سن۔

امجد صابری دے پتر مجدد صابری تے برادران نے جدوں نعتِ رسول مقبول ﷺ ’’اے سبز گنبد والے منظور دعا کرنا ۔۔۔‘‘پیش کیتی تے ہر اکھ اشک بار ہو گئی۔ ایس محفل وچ امجد صابری دی پوری فیملی نے خصوصی طور اُتے شرکت کیتی۔ مدثر خان بابا نے امجد صابری دے بلندی درجات لئی دعا کروائی۔

ایس موقعے اُتے ڈائریکٹر جنرل پلاک ڈاکٹر صغرا صدف نے کہیا کہ میں دعا گو آں کہ اللہ تعالیٰ امجد صابری دے پتراں نوں باپ وانگوں عظیم انسان بنائے تے ایہہ وی اپنے فن دے ذریعے ملک و قوم دا ناں روشن کرن۔
طارق طافو تے دیگر فنکاراں نے ڈاکٹر صغرا صدف دا شکریہ ادا کردے ہوئے کہیا کہ اوہ فنکاراں دی فلاح و بہبود لئی گراں قدر خدمات سرانجام دے رہیاں نیں تے پنجاب دی فن و ثقافت دی ترویج و ترقی لئی دن رات محنت کر رہیاں نیں۔ محفل دا آغاز نعت رسول ِﷺ مقبول توں ہویا۔ نظامت دے فرائض شکیل زاہد تے میگا نے سرانجام دتے۔