مایوس نہ ہونا

زندگی وچ کجھ وی ہو جاوے زندگی کنی ای اوکھی کیوں نہ ہو جاوے مایوس کدی نہیں ہونا چاہیدا’ منفی سوچ نہ رکھنا جدوں ہر بوہا بند ہو جاوے اودوں وی اوہ ذات اپنے بندے لئی کوئی نہ کوئی راہ کڈھ دیندی اے۔ ہر حال وچ شکر ادا کیتا کرو۔ عطا ہووے یاں انتظار ہر حال وچ شکر کرنا ساڈے تے لازم اے۔ ایہدے وچ برکت اے اوہ ذات وگڑے ہوئے کماں نوں سنوار دیندی اے۔ ایہ پیاریاں گلاں شاہ شمس تبریز دیاں نیں۔ بڑے گھٹ لوک جان دے نیں حضرت اقبال دے روحانی مرشد مولانا جلال الدین رومی نیں تے مولانا روم دے مرشد شاہ شمس تبریزی نیں۔ مینوں ایہ جانکاری معروف قانون دان سید قمرحسین سبزواری توں ملی تے ہن تہاڈی نذر کر رہیا واں۔ایہدے وچ کوئی شک نہیں موجودہ حالات وچ مایوسی بہت زیادہ پھیل چکی اے ایہنوں روکنا ساڈا سب دا فرض اے۔ لوکاں تے پٹرول دے بھاری بمب سٹن دا سلسلہ جاری اے بمب دے ڈگن نال ہر چیز دیاں قیمتاں وچ ان گنت وادھا ہو رہیا اے جہدے توں ہر کوئی پریشان اے۔ ہر کوئی حکمراناں توں امید لائی بیٹھا اے کہ اوہ کجھ آسانیاں پیدا کرن گے جد کہ انج ممکن نہیں حکمراناں دی تھاں آپ اپنے واسطے تے دوجیاں لئی آسانیاں پیدا کرنا شروع کرن۔ لگدا اے قدرت حکمراناں دا امتحان لے رہی اے جیویں پہلیاں دا لے چکی اے ساڈا یقین اے اوہ ذات کدی کسے نوں دے کے ازماندی اے تے کسے نوں لے کے ازماندی اے۔ ہو سکدا اے اوہ ذات حکمراناں دے نال سانوں کسے نہ کسے شکل وچ ازما رہی ہووے۔ یاد رکھو رزق تے موت دا ذمہ اوہنے اپنے ذمے لے رکھیا اے۔ اوہنے ہر جاندار دس رکھیا اے کہ جدوں تیرا رزق پورا ہو جاوے گا میں تیری موت دا بندوبست کراں گا۔ ایہو وجہ اے کہ تسیں موت نوں اکثر نیڑیوں ویکھیا وی ہووے گا گزر جاندی اے آندی نہیں۔
تسیں اوس ذات دی مرضی دے بناں کجھ نہیں کر سکدے۔ کھانا نہیں کھلا سکدے۔ کسے نوں خیرات نہیں کر سکدے’ دو دن پہلاں سپریم کورٹ توں واپسی تے بیٹی کوشفا نوں نال لیا۔ بیٹی نے مینوں خوبصورت سینڈونچ کھانے نوں پیش کیتا میں شکریہ دے نال اوہنوں دسیا کہ اج سپریم کورٹ بار وچ پکوڑا روٹی دوستاں دے نال کھادی اے ایس لئی ہور کھانے دی گنجائش نہیں۔ کہیا اچھا راہ وچ کوئی ضرورت مند ملیا تے اوہنوں ایہ دے دیواں گے۔ آئی ایٹ توں گزرے اوتھے وی کوئی نہ ملیا فیر ایس امید نال کہ گلبرگ گرین دے برج دے نیڑے مل جان گے پر اوتھے وی اوس دن کوئی نہ ملیا۔ فیر سواں گارڈن دے یوٹرن تے اکثر اک خواجہ سرا کھڑا ملدا اے سوچیا اوہنوں دے دیاں گے پر اوس دن اوہ وی نہ ملیا۔ گھر دے راہواں وچ کوئی ماسی کوئی ضرورت مند نہ ملیا۔ میں سوچ رہیا سی تے دھی دے ذہن وچ وی ایہو آیا کہ اللہ ساڈے نال رنج اے نہیں تے ضرورت منداں دی کمی تے نہیں سی۔ اج اوس ذات نے سانوں اینی توفیق نہیں دتی سی کہ اسیں اوہدی مخلوق نوں ایہ کھان لئی دے سکدے۔ ایہ تے ساڈی اوقات اے۔ میں کہیا لگدا اے اللہ ساڈے توں اج ناراض اے اوہنوں منایا جاوے۔ فیر انج کیتا وی ویکھیا جاوے تے ہر کم وچ خدا نظر آندا اے۔ بس کوئی ویکھن والا اوہنوں ہووے۔ ججز تے وکیلاں دے بارے مشہور اے کہ ایہ اپنے راہ وچ ہر کھڑی کندھ نوں ہٹان دی طاقت رکھدے نیں جد کہ انج نہیں وکیل ہون یاں سپریم کورٹ دے ججز’ سارے بے بس نیں’ چیف جسٹس آف پاکستان دے اسلام آباد سیکٹر وچ کمپیوٹر دی قرعہ اندازی وچ سارے چنگے تے کارنر پلاٹ ججاں دے ناں نکلے۔ ایہدے تے ساریاں نوں کمپیوٹر تے غصہ سی پتہ لگا اوہنوں چلان والا انسان سی جہنوں اپنی نوکری پیاری سی۔ کمپیوٹر دی ایس حرکت تے کجھ لوک اوہناں دے خلاف اٹھ کھڑے ہوئے۔ اسلام آباد ہائیکورٹ اپڑ گئے جہدے توں ہن اوہناں دے پلاٹ وی کھٹائی وچ نیں کیوں جے جج جج دے سامنے آ گیا سی ایہ پلاٹ وی بڑی چیز نیں۔ دو گز زمین ملے نہ ملے پلاٹ وڈا ضرور ملے۔ سنیا اے کہ ماضی وچ اک چیف جسٹس صاحب اسلام آبا دتوں کراچی رجسٹری وچ کیس سنن جا رہے سی جہاز وچ اوہناں دی سیٹ دے نال چیف منسٹر سندھ جام صاحب سن۔ سلام دعا دے بعد چیف صاحب نے کہیا سائیں تہاڈے ہوندے میرے کول کراچی وچ پلاٹ نہیں۔ جام صاحب نے کہیا سر کل ای تہانوں پلاٹ الاٹ کر دینا واں۔ فیر پلاٹ باقاعدہ الاٹ وی ہویا۔ چیف صاحب اوس پلاٹ دی وجہ نال چار دن تک کراچی رجسٹری وچ بہہ کے کیس چلاندے رہے۔ جدوں اوس پلاٹ دا سودا ہو گیا تے واپس سپریم کورٹ اسلام آباد تشریف لے گئے۔
سابق چیف جسٹس گلزار نے کراچی وچ لوکاں نوں بے گھر کیتا پر شاہراہ دستور تے بی بلڈنگ غیرقنونی کھڑی دکھائی نہ دتی۔ بناں سنے کیس خارج کردا رہیا اے پر ہن کہیا جاندا اے ملک چوں باہر دوجے ملک دی سٹیزن پراپرٹی لین دی قطار وچ کھڑے نیں۔ انج ای حال ایتھے سپریم کورٹ وکیلاں دا اے۔٭
ست ورھے دے بعد وی سپریم کورٹ وکیلاں دی سوسائٹی آباد نہیں ہو سکی۔ کجھ وکیل گل کردے نیں اسمان توں تارے توڑ لیان دی۔ ایسے ہفتے دی خبر گرم سی کہ کندھ کردے ہوئے لینڈ آنر تے سکیورٹی ایجنسی دی فائرنگ نال اک نوجوان دی زندگی دا چراغ گل ہو گیا گل تے کئی چراغ سینئر وکیلاں دے وی ہو چکے نیں تے تھک کے ابدی نیند سوں چکے نیں تے کجھ سون جا رہے نیں پر اجے تک سوسائٹی وچ اپنا گھر بنان دا خواب پورا نہیں ہویا۔ کہیا جاندا اے کہ جے ایس سوسائٹی دے کرتا دھرتا وکیل ای ہوندے تے لینڈ مافیا نوں شامل نہ کردے تے کدوں دا ایہ مسئلہ حل ہو چکیا ہوندا۔