بے لگام سیاسی کارکن

سیاست وچ کوئی چیز حرف آخر نہیں ہوندی’کل دے حریف سیاستدان مفادات لئی حلیف بن جاندے نیں تے حلیف حریف۔ جہدی واضح مثال تقریباً چار سال پہلاں بنن والا پی ڈی ایم دا اتحاد اے۔ عرصہ پہلاں تک اک دوجے نوں برا بھلا آکھن تے گالھاں دین والے مسلم لیگ (ن) ‘ پیپلز پارٹی’ جمعیت علماء اسلام تے دوجی اتحادی جماعتاں دے سیاستدان اکٹھے ہوئے تے عمران خان دے مخالف پی ڈی ایم اتحاد بنیا۔ پی ڈی ایم دے پلیٹ فارم توں تحریک چلائی گئی۔ حالانکہ ماضی دی تریخ ویکھی جاوے تے ن لیگ دے شہباز شریف’ نواز شریف’ آصف زرداری بارے’ مولانا فضل الرحمن’ آصف علی زرداری تے بے نظیر بھٹو بارے جد کہ آصف علی زرداری شریف برادران بارے ایسے سنگین الزامات عائد کردے رہے کہ محسوس ہون لگیا کہ ایہہ سیاستدان مستقبل وچ کدی اکٹھے نہیں ہون گے۔ 2018 وچ پی ٹی آئی دی حکومت بنی تے متذکرہ جماعتاں پی ڈی ایم دے اتحاد دی صورت وچ اک پلیٹ فارم اتے جمع ہو گئیاں۔ ہن کئی سال توں ایہو سیاستدان جہڑے ماضی وچ اک دوجے دے دشمن نظر آندے نیں’ اک پلیٹ وچ کھاندے نظر آرہے نیں کیوں جے ایہناں سیاستداناں دا مشن اقتدار حاصل کرنا سی جہدے وچ اوہ کامیاب وی ٹھہرے تے پی ٹی آئی دے کپتان عمران خان نوں حکومت توں اتارن وچ کامیاب وی ہو گئے۔
ساڈی قوم دا ایہہ المیہ اے کہ اسیں جہڑی جماعت دے کارکن ہونے آں اوہدے قائدین نوں ملک لئی مسیحا قرار دینے آں تے اپنی سیاسی جماعت دے دفاع وچ کارکنان دوجی جماعت دے کارکناں نوں برا بھلا آکھدے نظر آنے آں’ کئی واقعات وچ تے سیاسی جھگڑے مخالفت وچ ایس حد تک ودھ چکے نیں کہ اوہ دشمنیاں وچ تبدیل ہو گئے۔ گل ایتھے ختم نہیں ہوندی بلکہ ایہناں دشمناں نے کئی انسانی جاناں وی لے لئیاں نیں۔گل ایس حد تک ودھ چکی اے کہ کجھ سالاں توں کئی ایسے واقعات رپورٹ ہوئے نیں کہ سیاسی جماعتاں دے قائدین نوں ویکھدے ای مخالف سیاسی جماعتاں دے کارکنان اپنے مخالف سیاسی جماعت دی شخصیات دے خلاف نعرہ بازی’ ایسے کئی واقعات ائیرپورٹس’ پبلک مقامات اتے رونما ہوئے حتیٰ کہ ن لیگ دے قائدین اقتدار سنبھال کے عمرہ لئی سعودی عرب گئے تے اوتھے وی اک ایسا ای افسوسناک واقعہ پیش آیا جہنے دنیا وچ پوری قوم دا سر جھکا کے رکھ دتا۔ ایس واقعہ نوں یورپی بالخصوص ہندوستان دے میڈیا نے اپنے مقصد لئی خوب اچھالیا’ سو انج دے کئی ہور واقعات وی رونما ہوئے لیکن کسے وی سیاسی جماعت دی قیادت نے اج تک اپنے کارکناں دی ایس حوالے نال تربیت کرن دی زحمت نہیں کیتی جہڑا کہ جمہوری ملک لئی المیہ توں گھٹ نہیں اے۔
ایسے نوعیت دا اک واقعہ وفاقی وزیر برائے منصوبہ بندی احسن اقبال دے نال بھیرہ انٹرچینج اتے ویکھن وچ آیا جدوں احسن اقبال برگر کھان لئی اترے ای سن کہ اک فیملی نے اوہناں دی حکومت تے اوہناں دے خلاف غلیظ قسم دی نعرہ بازی کیتی تے ایہہ ویڈیو سوشل میڈیا اتے وائرل کر دتی۔ سو کہ احسن اقبال نے اوس فیملی دے خلاف کارروائی نہ کرن دا فیصلہ کیتا جہڑا کہ اوہناں دا وڈا پن سی کیوں جے اوہ پڑھے لکھے انسان نیں ۔ جہدے اتے نعرہ بازی کرن والی فیملی نوں وی ندامت ہوئی تے اوہ معذرت کرن لئی نارووال احسن اقبال دے گھر پہنچ گئی تے احسن اقبال نے اوہناں نوں کھلے دل نال عزت دتی۔ راقم ویڈیو ویکھ کے پریشان تے حیران اے کہ ساڈا معاشرہ کہڑے پاسے جا رہیا اے۔ احسن اقبال ہارورڈ یونیورسٹی دے فارغ التحصیل سکالر نیں تے استاد نوں پیو دا درجہ دتا گیا اے تے معاشرہ اتے اوہناں دا احترام فرض قرار دتا گیا اے مگر ایتھے تے معاملہ ای الٹا چل رہیا اے۔مرد تے زنانیاں دے نال 10سال دی بچی وی نعرے بازی کر رہی سی۔ سوچن دی گل ایہہ اے کہ اوہ بچی کہڑے فہم تے شعور دی بنیاد اتے اپنی پیو دی عمر دے فاضل ترین انسان نوں برا بھلا آکھ رہی سی۔ جہڑی بچی نوں شاید ایہہ وی پتہ نہیں ہووے گا کہ پچھلے الیکشن کہڑے سن وچ ہوئے سن ‘ ایہہ اے اوہ المناک چہرہ کہ قوم جہڑی سیاسی جماعت نال وابستگی رکھدی اے بغیر سوچے سمجھے اوہدے مخالف سیاسی جماعت دے قائدین نوں برا بھلا آکھ دیندی اے۔ایہہ وگاڑ معاشرے وچ ودھدا جا رہیا اے۔ ایسے واقعات دنیا وچ ملک لئی جگ ہنسائی دا کارن بن رہے نیں۔
سیاست سماج دی اک سانجھی نینہہ دا نام اے جتھے مختلف خیال دی جماعتاں اپنے اپنے منشور’ فہم تے سوچ دے مطابق اگے ودھدیاں نیں۔ مگر ساڈے ملک وچ معاملہ اوہدے الٹ اے۔ اسیں جہڑی جماعت نال جڑے آںاوہدی قیادت نوں پارسا آکھنے آں تے مخالف جماعت دے قائدین نوں چور’ ڈاکو تے لٹیرا سمجھدے نیں۔ ایہو ساڈی قوم دی بے عقلی اے حالانکہ ایہو سیاستدان بوقت ضرورت سیاسی اتحاد کر کے ماضی دی غلطیاں بھلا کے اقتدار لئی اکٹھے ہو جاندے نیں جیویں کہ 2018 وچ عمران خان دی حکومت اقتدار وچ آئی تے آپس دی سیاسی دشمن جماعتاں پی ڈی ایم دے اتحاد دی صورت وچ اکٹھی ہو گئیاں۔ ہن ماضی دے دشمن سیاستدان اک پیالی وچ چاہ تے اک پلیٹ وچ کھانا کھا رہے نیں مگر ساڈی قوم دا حال ایہدے الٹ اے۔ اسیں جہڑی جماعت دے کارکن نیںاوہدے گن گاندے آں۔ مخالف جماعت دے قائدین تے کارکنان ساڈے معاشرے دے لوکاں نوں زہر لگدے نیں’ ایسے وجہ نال سیاسی دشمنیاں وچ وادھا ہویا اے۔
دنیا بھر دے ملکاں دا جائزہ لیتا جاوے تے جہناں ملکاں دے عوام دی تربیت نہیں ہوندی اوہناں ملکاں دی عوام بے لگام ہوندی اے تے اوتھے سیاستداناں تے شخصیات دے نال ایسے واقعات رونام ہوندے رہندے نیں تے جہناںملکاں وچ حکمران مسئلے حل کرن دے نال قوماں دی تربیت کردے نیں اوہو ملک وچ دنیا وچ ترقی یافتہ نیں۔ کاش کوئی ملک اتے ایسا حکمران مسیحا آوے جہڑا قوم دے مسائل حل کرن دے نال قوماں دی تربیت وی کرے۔ فیر نہ تے سعودی عرب جیا واقعہ پیش آوے گا تے نہ ای بھیرہ جیا۔ ایہدے لئی قوم نوں بھیڑ چال چھڈ کے سوچ تے شعور نوں پختہ کرناہووے گا تے ایسے لوکاں نوں ووٹ دے کے اسمبلیاں وچ بھجوانا ہووے گا جہڑے واقعی ملک تے قوم دا درد رکھدے ہون۔ جے ایسا نہ ہویا تے فیر ایس ملک دے سیاسی کارکناںنوں کوئی لگام نہیں دے سکے گا۔