پنجاب دا معرکہ

تن مہینے توںپنجاب وچ جاری سیاسی بحران دا فیصلہ 22جولائی نوں ہو جاوے گا۔ اسمبلی اجلاس لئی ایس معرکے اتے پورے ملک دی نظراں نیں کیوں جے ایس معرکے دے فاتح نہ صرف پنجاب دی وزارت اعلیٰ دا منصب سنبھالے گا بلکہ ایس معرکے نے ایہہ فیصلہ وی کرنا اے کہ موجودہ اتحادی حکمران ہور عرصہ اقتدار وچ رہن گے یا ملک نے عام انتخابات ول جانا اے کیوں جے پنجاب دا بحران وفاق اتے وی اثرانداز ہوندا اے۔ 17جولائی دے ضمنی انتخاب دے ٹاکرے توں 22جولائی دے متوقع سیاسی معرکے دے نتائج واضح ہو جان گے کیوں جے پنجاب اسمبلی وچ حمزہ شہباز دی موجودہ برتری پی ٹی آئی نوں ملن والی پنج مخصوص نشستاں توں کافی گھٹ ہو گئی اے۔ حالات کیہ رخ کردے نیں تے پنجاب دا کیہڑا حکمران ہوندا اے؟ بے چینی نال انتظار کرن والیاں نوں سترہ
جولائی دے ضمنی انتخاب دے نتائج توں درست اندازہ لان وچ آسانی ہووے گا۔ حکومت تے اپوزیشن دونویں ضمنی انتخاب جتن لئی ایڑی چوٹی دا زور لا رہے نیں بظاہر اپوزیشن دے بیانیے نوں عوامی پذیرائی حاصل اے لیکن جیتن لئی الیکشن والے دن ووٹراں نوں گھراں توں کڈنا تے ووٹ کاسٹ کرن لئی پولنگ سٹیشن تک پہنچانا وی اہم اے۔ ایس حوالے نال جہڑی وی جماعت کوتاہی دی مرتکب ہووے گی نقصان دا سامنا کرے گی عمران خان تے مریم نواز دے متحرک ہون نال پنجاب دا سیاسی ماحول خوب گرم اے۔ دونویں پاسوں جت دے دعوے کردے ہوئے الزام تراشی دے نشتر چلائے جا رہے نیں جہدے توں سیاسی نبض شناس خدشہ ظاہر کرن لگے نیں کہ ضمنی الیکشن بڑی کشمکش تے ٹکرائو دا موجب بن سکدا اے کیوں جے ایہدے توں پنجاب دے حکمران دا فیصلہ ہون دے نال کہڑی جماعت دا بیانیہ عوام نوں پسند اے؟ دی وضاحت وی ہو جاوے گی۔ ملکی حالات خراب توں خراب تر ہوندے جا رہے نیں۔ مہنگائی وچ 13فیصد وادھا ہو چکیا جہڑا ملکی تریخ دا اک نواں ریکارڈ اے۔ عالمی مارکیٹ وچ تیل دے نرخ جدوں ڈِگدے جا رہے نیں پاکستان وچ قیمتاں ودھائی جا رہیاں نیں۔ آئی ایم ایف دے مطالبات ودھدے جا رہے نیں جہڑے ووٹراں دے فیصلے اتے کسے حد تک اثرا نداز ہون گے جہدے توں حکومت لئی مشکل صورتحال پیدا ہو سکدی اے لیکن ووٹراں نوں گھراں توں کڈنا تے پولنگ سٹیشن پہنچان نال حالات نوں سازگار بنایا جا سکدا اے۔
کجھ عرصہ توں سیاسی فیصلے وی عدالتاں وچ ہون لگے نیں۔ لہور ہائیکورٹ دا ڈپٹی سپیکر نوں اختیارات دی منتقلی دا فیصلہ اپوزیشن نے سپریم کورٹ وچ چیلنج کر دتا اے تے حکومت وی مخصوص نشستاں دے متعلق ہون والے فیصلے دے خلاف عدالت نال رجوع کر چکی اے۔ 22جولائی دے معرکے نوں سپریم کورٹ نے پنچایتی طور تے حل کردے ہوئے گدلے سیاسی ماحول توں وکھ رہن دی کوشش کیتی تے فریقین دے اتفاق رائے نال ای 22جولائی نوں رائے شماری دا دن مقرر کیتا اے۔ ایس پنچایتی فیصلے اتے کسے فریق ولوں تنقید نہیں ہوئی بلکہ دونیں پاسوں ایس عزم دا اظہار کیتا جا رہیا اے کہ فیصلے اتے اوہدی روح دے مطابق عمل کیتا جاوے گامگر سوال ایہہ اے کہ سیاستدان بحران پیدا ای کیوں کردے نیں تے فیر اپنے تنازعات خود حل کرن دی کوشش کیوں نہیں کردے؟ جے ایہہ خود رل بیٹھ کے تصفیہ کر لیتا کرن تے نہ صرف ایہناں دی اپنی ساکھ بہتر ہووے گی بلکہ اداریاں اتے تنقید دی روایت وی دم توڑ سکدی اے۔
کجھ مہینیاں توں سیاسی اختلاف رائے دشمنی دے قالب وچ ڈھلن لگیا اے۔ ایہہ طرز عمل قابل تحسین یا قابل تعریف نہیں کیوں جے ایس طرزعمل نال پنجاب ای نہیں پورے ملک دا سیاسی ماحول پراگندہ ہو رہیا اے۔ اختلاف رائے نوں دشمنی بنان نال کسے دا بھلا نہیں ہو سکدا بلکہ ملک و قوم دا وی نقصان ہون دا احتمال اے ۔ جے ضمنی انتخاب صاف شفاف نہیں ہوندے تے بیرونی مداخلت توں نتائج تبدیل کیتے جاندے نیں تے نویں سیاسی تحریک جنم لووے گی جہدے توں ملک وچ انتشار پیدا ہووے گا۔ ویلے توں پہلاں ای اپوزیشن ولوں دھاندلی دے الزامات عائد کیتے جان لگے نیں۔ ہن ایہہ الیکشن کمیشن دی ذمہ واری اے کہ اوہ اپنی غیر جانبداری یقینی بنا کے ایسے صاف شفاف انتخاب کرائے جہدے نتائج سارے تسلیم کرن۔ پنجاب دی مخصوص نشستاں دا نوٹیفکیشن جاری کرن دے دوران تاخیری حربے اپنان دی بنا اتے پہلاں ای اپوزیشن اوہدے کولوں خفا اے ۔ پی ٹی آئی اک توں ودھ تحفظات دا کھلے لفظاں وچ اظہار کر چکی۔ آخرکار عدالتی فیصلے دی وجہ نال مجبوراً نوٹیفکیشن کیتا گیا۔ الیکشن کمیشن دے تاخیری حربیاں توں اپوزیشن نوں چنگا پیغام نہیں گیا۔ علاوہ ازیں شنیدہ حلقے وثوق نال آکھن لگے نیں کہ ضمنی الیکشن دے کول الیکشن کمیشن ولوں فارن فنڈنگ کیس دا فیصلہ سنان دی تیاریاں مکمل ہو چکیاں نیں تے ایہہ کہ فیصلہ پی ٹی آئی دے خلاف اے۔ متوقع فیصلے دی رو نال نہ صرف جماعت کولوں انتخابی نشان بلا چھن سکدا اے بلکہ پوری جماعت کالعدم ہون دا وی امکان اے۔ ایس طرح پی ٹی آئی لئی اینی اوکھی صورتحال پیدا ہووے گی جہدے توں سیاسی گرماگرمی وچ وادھا ہووے گا۔ عمران خان جہڑے حکمراناں نوں مافیا آکھدے نیں اوہناں نوں ایہہ فیصلہ وی حکومتی ہدایت دا شاخسانہ قرار دین دا بہانہ ملے گا۔
پنجاب وچ 22جولائی نوں اختیارات تے وسائل دا تجربہ کاری نال مقابلہ ہوویگا۔ عدالتی فیصلے دی رو نال حمزہ شہباز نہ صرف بطور وزیراعلیٰ برقرار نیں بلکہ حکومتی مشینری وی بدستور اوہناں دے تابع اے۔ ایسے بنا تے بظاہر حکومتی اتحاد نوں برتری حاصل اے تے جے ضمنی انتخاب وچ وی حکومت اکثریت حاصل کر لیندی اے یا ادھی نشستاں ای جت جاندی اے جہدا امکان موجود اے تے نہ صرف حمزہ شہباز دا اقتدار مستحکم ہووے گا بلکہ وفاق وچ حکمران اتحاد نوں وی تقویت ملے گی۔ ایسا ہون نال عمران خان بیانیے دی نفی ہووے گی مگر ایہہ نہیں بھلنا چاہیدا کہ بطور وزیراعظم شہباز شریف انتخابی ماحول وچ شریک نہیں ہو سکدے نہ ای حمزہ شہباز الیکشن مہم وچ شامل ہو سکدے نیں۔ اوہناں نوں جو وی کرنا ہووے گا پس پردہ رہ کے ای کرنا ہووے گا۔ مریم نواز البتہ متحرک اے ضمنی انتخاب مگروں 22جولائی دا معرکہ جتنا آسان نہیں۔ اختیار تے وسائل دا ایس واری تجربے کاری نال سخت مقابلہ ہون جا رہیا اے۔ چودھری پرویز الٰہی اینی آسانی نال کسے نوں
وزارت اعلیٰ لے جان نہیں دین گے۔ وفاق وچ اسد قیصر سنے جس طرح حکومتی عہدیدار اک دے بعد دوجے سرنڈر کردے گئے سپیکر پنجاب اسمبلی وی ایسا کرن گے۔ ممکن نہیں پہلاں وی اوہناں نے ڈٹ کے مقابلہ کرن دی کوشش کیتی آئندہ وی اوہ ہر حد تک جان گے۔ سپیکر دے عدم تعاون نال ای پہلی واری حکمران جماعت نے اسمبلی دی عمارت وچ اجلاس کرن دے بجائے دوجی جگہ بجٹ اجلاس رکھیا۔ علاوہ ازیں بطور جہاندیدہ سیاستدان چودھری پرویزالٰہی نوں جوڑ توڑ دے خوب ہتھکنڈے پتہ نیں۔ ایسے بنا اتے کجھ سیاسی رمزشناس 22جولائی نوں اپ سیٹ دا امکان ظاہر کردے نیں۔ حکومتی حلقیاں نے حسب روایت دھونس نال کم لین دی کوشش کیتی تے اپوزیشن نہ صرف سخت مزاحمت کرے گی بلکہ نویں سیاسی تے عدالتی لڑائی دا آغاز ہو سکدا اے۔ حکومت نوں بخوبی پتہ ہونا چاہیدا اے کہ مقابلہ عثمان بزدار نال نہیں چودھری پرویزالٰہی دی تجربہ کاری نال اے۔ کاش 22جولائی دے معرکے توں سیاسی استحکام آ جاوے کیوں جے نویں سیاسی محاذ آرائی معاشی آتش فشاں اتے کھڑے ملک دی بنیاداں ہلا سکدی اے۔ ودھدی مایوسی’ بے یقینی تے بے چینی دا احساس کردے ہوئے جے فریقین نے تحمل نال کم لیتا تے ملک دی سیاسی فضا وچ بہتری آوے گی۔