کیجریوال توں ای کجھ سکھ لوو

بھارتی صوبے ہریانہ وچ 16اگست 1968ء نوں پیدا ہون والے 54 سالہ اروند کیجریوال پہلے بیوروکریٹ بنے فیر نظام بدلن دی خواہش وچ سیاست وچ آ گئے۔ اوہناں نے عام آدمی پارٹی بنائی۔ دہلی توں سیاست شروع کیتی۔ اوہ بڑی تیزی نال اگے ودھے۔ دسمبر 2013ء وچ وزیراعلیٰ بن گئے پر فیر 49 دیہاڑیاں دے بعد استعفیٰ دے دتا کیوں جے اوہ اسمبلی توں رپشن دے خلاف بل منظور نہیں سن کروا سکے۔ اوہناں نے اگلا الیکشن لڑیا تے دہلی دے لوکاں نے اکثریت دتی’ اوہ وزیراعلیٰ منتخب ہوئے’ فیر اوہناں نے وعدیاں تے عملدرآمد شروع کیتا۔ دہلی وچ لوڈشیڈنگ سی’ بجلی مہنگی سی’ سرکاری سکولاں تے ہسپتالاں دی حالت ماڑی سی۔ سڑکاں دی حالت وی بڑی خراب سی دہلی وچ صرف پنجاہ فیصد پانی دی سپلائی لئی پائپ لاین سی’ کیجریوال نے محنت کیتی۔ ہن دہلی وچ لوڈشیڈنگ نہیں’ بجلی فری اے’ سرکاری سکولاں وچ تعلیم فری اے’ دہلی دے ہسپتالاں وچ علاج مفت ہوندا اے۔ کیجریوال نے دہلی وچ محلہ کلینک متعارف کروایا۔ پورے بھارت وچ دہلی واحد ریاست اے جتھے مالیاتی خسارہ نہیں’ ست ورھیاں وچ دہلی حکومت دا بجٹ 30 ہزار کروڑ توں ودھ کے 75 ہزار کروڑ ہو گیا اے۔ ایس دوران دہلی دے جی ڈی پی وچ 150فیصد وادھا ہویا اے۔
اروند کیجریوال ہن تریجی واری دہلی دے وزیراعلیٰ بن چکے نیں’ اج دہلی دے دو کروڑ شہریاں نوں بنیادی سہولیات مفت حاصل نیں۔ دہلی دیاں سڑکاں شاندار نیں’ اوہناں نے دہلی دیاں عورتاں لئی مفت ٹرانسپورٹ دے رکھی اے۔ کیجریوال جدید ٹیکنالوجی دے قائل نیں۔ اوہناں نے وکھووکھ ایپس بنا رکھیاں نیں۔ تسیں ہر ویلے ایپ دے راہیں سکول وچ گئے ہوئے بچے نوں گھروں چیک کر سکدے او۔ دہلی وچ لوکاں دی حفاظت لئی اینے سی سی ٹی وی کیمرے لا دتے گئے نیں کہ دہلی نیویارک’ لندن تے شنگھائی توں ایس معاملے وچ اگے نکل گیا اے۔ اروند کیجریوال دہلی دے شہریاں نوں کرپشن توں وی بچا رہے نیں۔ اوہناں نے دہلی وچ ایہ طریقہ شروع کر رکھیا اے کہ دہلی دا کوئی وی شہری جنہے پاسپورٹ’ شناختی کارڈ’ ڈومیسائل یاں فیر کوئی لائسنس بنوانا ہووے اوہ ایپ یاں فون راہیں دسے گا کہ میں فلاں وقت گھر تے ہوواں گا تے مینوں ڈومیسائل یاں لائسنس بنوانا اے۔ شہری نے دس دتا’ ہن شہری دا کم ختم’ ہن کیجروال سرکار دا کم شروع۔ دہلی دے شہری دے دتے گئے مقام تے اک ٹیم آوے گی اوہناں دے کول فوٹو کاپی مشین وی ہووے گی۔ ایہ ٹیم اپنی کاروائی کرکے چلی جاوے گی ایس کاروائی دے بعد ست دن اندر حکومت پابند ہووے گی کہ اوہ شہری دا ڈومیسائل یاں لائسنس اوہدے گھر تے دیوے۔ ایس طرح شہری نوں کدھرے جانا پیا’ نہ دفتراں وچ دھکے کھانے پئے تے نہ ای کسے نوں رشوت دینی پئی۔ اوہنوں جس چیز دی لوڑ سی اوہ اوہنوں گھر تے مل گئی۔
ایس ویلے دہلی دی اسمبلی وچ 62 سیٹاں اروند کیجریوال دی عام آدمی پارٹی دیاں نیں جد کہ مودی دی بی جے پی دے کول صرف اٹھ سیٹاں نیں۔ دہلی ماڈل ویکھ کے بھارت دی دوجی ریاستاں دے لوک اپنی اپنی حکومت اگے سوال کردے نیں کہ بجلی’ سکول’ صحت’ ٹرانسپورٹ’ جواب آندا اے کہ کیویں کریئے؟ لوک جواباً کہندے نیں جیویں کیجروال نے دہلی دے لوکاں نوں سب دتا اے۔ کیجریوال تے بہت زیادہ دبائو سی کہ اوہ اپنی پارٹی نوں دہلی تو ںباہر کڈھ کے دوجیاں ریاستاں وچ لیان کیوں جے کیجریوال کہندا اے کہ میں ہر شہری دا وزیراعلیٰ آں بھاویں اوہدا تعلق کسے وی جماعت نال ہووے’ بھاویں اوہ کسے وی مذہب دا ہووے’ بھاویں اوہ کسے وی ذات دا ہوو۔ سیاسی دبائو تے کیجریوال نے پنجاب وچ رسک لیا۔ پہلے تہانوں دس دیواں کہ پنجاب ہے کیہ؟ 1947ء وچ تقسیم توں پہلاں پنج دریاواں دی دھرتی پنجاب دے پنج ڈویژن سن۔ لہور’ راولپنڈی’ تے ملتان ساڈے حصے وچ آ گئے جد کہ دہلی تے جالندھر بھارت دے حصے وچ۔ اوہناں نے دہلی نوں وکھری ریاست بنایا’ پنجاب توں ای کڈھ کے ہریانہ نوں وکھرا صوبہ بنایا’ ہماچل پردیش نوں وی صوبہ بنایا۔ پنجاب دا بہت سارا حصہ راجستھان نوں دے دتا۔ ہن جو باقی بچیا اوہو ہندوستان وچ بچیا کھچیا پنجاب اے۔ ایسے ورھے 2022ء وچ کیجریوال نے اپنی پارٹی نوں پنجاب وچ الیکشن وچ اتاریا تے اوہدی پارٹی نے وڈے وڈے لیڈراں نوں ہرا کے 117 وچوں 92 سیٹاں جت لئیاں۔
پنجاب دے لوکاں نے وی دہلی ماڈل نوں پسند کیتا۔ کانگرس فیر وی اٹھاراں سیٹاں لے گئی’ بی جے پی تے صرف اک دو سیٹاں تک ای محدود رہی۔ ہن جدوں حلف دی واری آئی تے پنجاب دے نویں وزیراعلیٰ بھگونت مان نے شہید بھگت سنگھ دے پنڈ وچ حلف لیا۔ انج بھگت سنگھ شہید نے کہیا سی کہ جے اسیں آزادی دے بعد نظام نہیں بدلاں گے تے کجھ نہیں ہووے گا۔ کیجریوال کہندا ے کہ ساڈے دیس وچ سیاسی جماعتاں تے سیاستداناں نے انگریزاں دا دتا ہویا نظام اپنا رکھیا سی میںاوہنوں بدل دتا اے۔ کاش! ساڈے سیاستدان کیجریوال توں ای کجھ سکھ لین۔ جے اوہ لوکا ںنوں بہت ساریاں سہولتاں دے سکدے نیں تے ایہ کیوں نہیں؟ بقول اقبال:
اے دوست کرو ہمت کچھ دور سویرا ہے
گر چاہتے ہو منزل تو پرواز بدل ڈالو