شاہین آئی لینڈرز نوں اوہناں دے گھر ہران لئی تیار

پاکستان تے سری لنکا وچ ٹیسٹ سیریز لئی میدان اج توں لگے گا۔ قومی سکواڈ نے ٹیسٹ سیریز لئی اپنی تیاریاں چنگیاں تیاریاں کیتیاں۔ گرین شرٹس تے سری لنکن بورڈ الیون وچ وارم اپ میچ کولمبو کولٹس کرکٹ کلب گرائونڈ وچ 11 توں 14 تیکر کھیڈیا گیا جو ڈرا ہو گیا۔ ابتدائی اننگز وچ پاکستانی ٹیم 323 سکور بنا کے آئوٹ ہو گئی۔ کپتان بابر اعظم 88سکور دے نال نمایاں رہے۔ امام الحق کھاتہ وی نہ کھول سکے جد کہ عبداللہ شفیق 3سکور بنا کے پویلین لوٹ گئے۔ آغا سلمان 55′ محمد رضوان 31 سکور دے نال نمایاں رہے جد کہ سری لنکن کرکٹ الیون نے دوجے دن کھیڈ دے اختتام تے 5 وکٹاں گوا کے 287 سکور بنا لیتے۔ محمد نوازنے 2کھیڈاریاں نوں پویلین گھلیا۔ آغا سلمان’ نسیم شاہ تے یاسر شاہ نے 1,1وکٹ حاصل کیتی۔ تریجے دیہاڑے 375 دے مجموعی سکور اتے سر لنکن بورڈ الیون نے اننگز ڈیکلئیر کر دتی تے پاکستان نے دوجی اننگز وچ دو وکٹاں دے نقصان نال 178 رنز بنائے جیہدے وچ عبداللہ شفیق 63 جد کے اظہر علی 40 سکور اتے ناٹ آئوٹ رہے۔ سری لنکا وچ حالیہ سنگین سیاسی صورتحال تے کولمبو وچ پاکستانی ہائی کمیشن سری لنکا حکام نال مسلسل رابطے وچ اے تے ایسے تناظر وچ پاکستانی ٹیم دی سکیورٹی نوں وی ہور سخت کردتا گیا اے۔ سری لنکا دے دارالحکومت کولمبو وچ کرفیو تے مظاہریاں کارن پاکستانی ٹیم ہوٹل وچ مقید رہی تے اوول گرائونڈ وچ پریکٹس سیشن منسوخ کر دتا گیا سی۔ پاکستان کرکٹ ٹیم نے ہوٹل وچ ای نماز عیدالاضحی ادا کیتی۔مگروں فوج دے حفاظتی دستہ دے سخت پہرے وچ پریما داسا انٹرنیشنل کرکٹ سٹیڈیم پہنچ کے پریکٹس وچ حصہ لیا۔ قومی ٹیم 2015 مگروں پہلی واری سری لنکا دا دورہ کر رہی اے۔ پہلا ٹیسٹ 16جولائی توں 20جولائی تک گالے وچ کھیڈیا جاوے گا جد کہ دوجا ٹیسٹ میچ 24جولائی توں 28جولائی تک کولمبو وچ شیڈول اے۔ پاکستان کرکٹ ٹیم دے کپتان بابر اعظم نے آکھیا اے کہ سری لنکا دا دورہ بہت اہم نوعیت دا حامل اے۔ کنڈیشن دے حساب نال ساڈی پوری تیاری اے۔ ٹیسٹ میچ وچ صورتحال دے حساب نال کھیڈنا پیندا اے۔ ٹیم وچ سارے کھیڈاری چنگا پرفارم کر رہے نیں۔ غلطیاں توں سکھنے آں’ ایہدے توں سانوں بہت مدد ملدی اے۔ قومی ٹیم دے کپتان بابر اعظم نے آکھیا کہ سری لنکن کنڈیشنز وچ سپنرز اہم کردار ادا کرن گے۔ ٹیسٹ میچ وچ وی ٹیم بہتر پرفارمنس دا مظاہرہ کر رہی اے۔ پاکستانی ٹیم دی دنیا وچ بہتر پرفارمنس اتے سانوں خوش ہونا چاہیدا اے۔
قومی کرکٹ ٹیم دے کپتان بابر اعظم نے آکھیا کہ سری لنکا دا دورہ 2015 مگروں کر رہے آں۔ سارے کھیڈاری پرجوش نیں۔ اوہناں نے آکھیا کہ یاسر شاہ واپس آئے نیں’ جہدے توں سری لنکا وچ سپنراں نوں مدد ملے گی۔ اوہناں نے آکھیا کہ اسیں سری لنکا دی کنڈیشنز لئی تیار آں۔ فاسٹ بائولرز اتے وی اعتماد اے۔اوہ وی ہر کنڈیشن وچ چنگا پرفارم کر سکدے نیں۔ اوہناں دا آکھنا اے کہ سری لنکا دے خلاف ٹیسٹ سیریز توں پہلاں ساڈے کول کافی ویلا سی۔ ایس سیریزدے پوائنٹس اہم نیں۔ ہوم سیریز وچ ہر ٹیم مضبوط ہوندی اے۔ اوہنوںفیدہ ہوندا اے۔ اوہناں نے آکھیا کہ ٹیسٹ وچ ایڈجسٹ ہون وچ ویلا لگدا اے۔ اسیں ٹیسٹ کرکٹ وچ وی ٹریک اتے آ رہے آں۔ بابر اعظم دا ایہہ وی آکھنا اے کہ شعیب اختر نے کیمپ آ کے فاسٹ بائولراں دی بہت حوصلہ افزائی کیتی۔ بابر اعظم نے آکھیا کہ ہر میچ وچ کوشش ہوندی اے ٹارگٹ نوں حاصل کیتا جاوے۔ حالات جیویں دے وی ہون اسیں پازیٹو سوچ دے نال میچ کھیڈنا اے۔ اوہناں نے آکھیا کہ سیریز وچ اپ اینڈ ڈائون ہوندا اے۔ پرفارمنس نال بہتر کرن دی کوشش کرنے آں۔ بیٹسمین چنگی فارم وچ نیں۔ بہترین کھیڈ دا مظاہرہ کراں گے۔ ٹیم پاکستان دے اِن فارم پلئیرز دی گل کرئیے تے کپتان بابر اعظم پچھلے دو سال توں ٹیسٹ کرکٹ وچ وی مسلسل چنگی پرفارمنس دے رہے نیں تے ایس ویلے آئی سی سی ٹیسٹ بیٹنگ رینکنگز وچ 815 پوائنٹس دے نال چوتھے نمبر اتے نیں۔ایس دو میچاں دی سیریز وچ اگر اور اپنی آسٹریلیا دے خلاف سیریز والی فارم برقرار رکھدیاں ہوئیاں وڈے سکور کرن تے اپنی رینکنگ ہور بہتر کر سکدے نیں۔ ایس توں علاوہ اوپنر عبداللہ شفیق وی چنگی فارم وچ نیں۔ ٹیسٹ سپیشلسٹ تے سابق کپتان اظہر علی پاکستان ٹیسٹ ٹیم دی ریڈ دی ہڈی منے جاندے نیں تے او اپنی شاندار کارکردگی پاروں بار بار ثابت کر چکے نیں۔ 2015 سری لنکا اندر ہون والی سیریز وچ وی یونس خان تے مصباح الحق نال اظہر علی دی کارکردگی وی بہترین رہی۔ ایس واری وی امید کیتی جا رہی اے کہ او اپنے تجربے دی بنیاد اتے اپنے نال نال نویں کھڈاریاں نوں وی مفید مشوریاں نال چنگا پرفارم کرن وچ مدد کرن گے۔ بائولرز دی گل کرئیے تے شاہین آفریدی اپنی فارم برقرار رکھے ہوئے نیں تے ٹیسٹ رینکنگز وچ چوتھے نمبر اتے موجود نیں جد کہ حسن علی 14 ویں نمبر اتے نیں۔ دوجے بنھے یاسر شاہ دی واپسی نال سری لنکا دے سپننگ ٹریکس اُتے پاکستان دی بائولنگ ہور مضبوط ہو گئی اے۔
دوجے پاسے حریف سری لنکن ٹیم پاکستان نال سیریز توں پہلاں آسٹریلیا نال میچز کھیڈن وچ مصروف رہی تے اوہدے وچ میزبان سائیڈ نے چنگا پرفارم کر کے پاکستانی ٹیم لئی وی خطرے دی گھنٹی وجا دتی اے۔ دینش چندیمل دی ڈبل سنچری تے پربت جے سوریا دی 12وکٹاں دی مدد نال سری لنکا نے گالے وچ آسٹریلیا نوں اننگز تے 39رنز نال شکست دے کے دو میچاں دی سیریز 1-1نال برابر کر دتی سی۔ سری لنکن ٹیم دے کپتان ویمتھ کرونارتنے دا آکھنا اے کہ پاکستان کرکٹ ٹیم آسٹریلیا توں ودھ مضبوط حریف اے کیوں جے اوہ سپن نوں بہت چنگا کھیڈن دی صلاحیت رکھدے نیں۔ آسٹریلیا دے خلاف سیریز وچ کامیابی سمیٹن مگروں کرونارتنے نے آکھیا کہ بابر اعظم بہترین فارم وچ نیں جد کہ اوپنر امام الحق تے یاسر دی وی واپسی ہوئی جہدے توں پاکستان نوں فیدہ ہووے گا۔ اوہناں نے آکھیا کہ دنیش چندیمل نوں آکھیا سی کہ اوہ اک وڈی اننگز دے نال آن۔ پچھلے کجھ سالاں توں اوہ کامیاب نہیں ہو پار ہے سن لیکن آسٹریلیا دے خلاف اننگز نال اوہناں دا اعتماد بحال ہویااے۔
کرونارتنے نے آکھیا کہ جدوں تہاڈا سینئر کھیڈاری فارم بحال کر رہیا ہوندا اے تے بطور کپتان چیزاں آسان ہو جاندیاں نیں۔ اینجلیو میتھیوز نکام ہو سکدے نیں۔ میں نکام ہو سکنا واں لیکن مینوں پتہ اے اک کھیڈاری ٹیم لئی فائٹ کرے گا تے تسلی ہو جاندی اے۔
تازہ کارکردگی ویکھی جائے تے آئی لینڈرز دے کپتان کرونارتنے ٹیسٹ رینکنگز وچ ستویں نمبر اتے نیں۔ تے مسلسل چنگی کارکردگی وکھا رہے نیں جد کہ دنیش چندیمل دی سینچری تے اوہناں دے سپنرز دی چنگی کارکردگی پاکستان ٹیم لئی خطرے دی گھنٹی اے۔
دونویں ٹیماں سیریز جِتن لئی پر عزم نیں تے تیاریاں مکمل کر چکیاں نیں۔ دونواں پاسے چنگے پرفارمر موجود نیں جیہڑی ٹیم چنگی سٹریٹیجی نال میدان وچ اُترے گی اور اوس حکمت عملی اُتے چنگی طرح عمل کرے گی جت اوسے ٹیم دا مقدر بنے گی۔