سپریم کورٹ نے آرمی چیف دی مدت ملازمت وچ 6مہینے دی توسیع کر دتی

اسلام آباد: سپریم کورٹ نے آرمی چیف جنرل قمر جاوید باجوہ دی مدت ملازمت وچ 6مہینے دی توسیع دے دتی۔ عدالت نے حکومت نوں 6مہینے وچ قنون سازی کرن دا حکم دے دتا۔

چیف جسٹس پاکستان آصف سعید کھوسہ نے مختصر فیصلہ سنایا۔ عدالت نے آکھیا 28نومبر توں توسیع دے رہے نیں، 6مہینے بعد قنون سازی دا جائزہ لواں گے۔

چیف جسٹس آصف سعید کھوسہ نے اپنے فیصلے وچ آکھیا حکومت اک توں دوجی پوزیشن لیندی رہی، حکومت نے ترمیم لئی 6مہینے دا ویلا منگیا، معاملہ پارلیمنٹ تے حکومت تے چھڈدے آں، آرمی چیف دی دوبارہ تعیناتی تے قنون چپ اے۔

مختصر فیصلے وچ آکھیا گیا آرمی چیف دی موجودہ تقرری 6 مہینے لئی ہووے گی، ساڈے ساہمنے سوال آیا توسیع دتی جا سکدی اے یاں نہیں، آئین دے مطابق صدر مملکت افواج دے سپریم کمانڈر نیں۔

عدالت نے سنوائی دے آغاز تے سابق آرمی چیف اشفاق پرویز کیانی دی توسیع تے راحیل شریف دی ریٹائرمنٹ بارے دستاویزات 15منٹ وچ پیش کرن دی ہدایت کیتی۔

چیف جسٹس آکھیا اٹارنی جنرل کہندے نیں جنرل ریٹائرڈ نہیں ہوندا، جنرل ریٹائرڈ نہیں ہوندا تے پنشن وی نہیں مل سکدی۔

وقفے دے بعد جدوں دوبارہ سماعت شروع ہوئی تے چیف جسٹس پاکستان آصف سعید کھوسہ نے ریمارکس دتے سمری وچ تے عدالتی کاروائی دا وی ذکر کر دتا گیا اے، تسیں بھار آپ چکو ساڈے موڈھے کیوں استعمال کردے او، اپنا کم آپ کرو، سانوں وچ کیوں لیاندے او، عدالت دا ناں استعمال کیتا گیا تاں جے اسیں غلط وی نہ کہہ سکیے، سمری وچ عدالت دا ناں کڈھو، تعیناتی قنونی اے یاں نہیں اوہ جائزہ لواں گے۔چیف جسٹس پاکستان نے آکھیا اج توں تعیناتی 28نومبر توں کر دتی، کیہ آرمی چیف دا عہدہ اج خالی اے، اج تے جنرل باجوہ پہلے ای آرمی چیف نیں، آرمی چیف دا عہدہ آئینی عہدہ اے، جہڑا عہدہ خالی ای نہیں اوہدے تے تعیناتی کیویں ہو سکدی اے، عدالت دی ایڈوائس والا حصہ سمری توں کڈھو، صدر جے ساڈی ایڈوائس منگن تے اوہ وکھری گل اے، تسیں ایدھر اودھر گھمدے رہے اسیں کسے نوں ایڈوائس نہیں کرنی، لگدا اے ایس واری کافی سوچ وچار کیتی گئی اے۔

اٹارنی جنرل آکھیا آرٹیکل 243دے تحت آرمی چیف دی دوبارہ تعیناتی کر دتی گئی اے۔ چیف جسٹس نے استفسار کیتا اج ہون والی تعیناتی پہلاں توں کیویں وکھری اے؟ جہدے تے اٹارنی جنرل نے آکھیا تعیناتی آرٹیکل 243ون بی دے تحت کیتی گئی اے۔

چیف جسٹس پاکستان نے آکھیا مطمئن کرنا ہووے گا ہن ہون والی تعیناتی ٹھیک کیویں اے؟ ایس عہدے نوں پُر کرنا اے تے ضابطے دے تھت کیتا جانا چاہیدا اے۔