سود۔۔۔۔معیشت لئی کینسر !
لكهت:سینیٹر سراج الحق
معیشت دی تباہی دی صورت حال نوں عمیق نظراں نال ویکھیا جائے تے ساریاں خرابیاں دی جڑ سودی نظام معیشت اے۔ پاکستان اُتے ایس ویلے سو ارب ڈالر توں زیادہ دا قرضہ اے جس نے پوری معیشت نوں جکڑ رکھیا اے ملک دی کل جی ڈی پی 7500 ارب روپئے اے جس وچوں 2900 ارب سود دی ادائیگی وچ چلا جاندا اے جیہڑا کل آمدن دا انتالیس اعشاریہ ست فیصد بن دا اے۔ جے کسے ملک دی ادھی آمدن سود دی ادائیگی وچ چلی جائے تے اگے کنج ودھ سکدا اے؟
ایس ویلے امریکہ تے برطانیہ سنے دنیا دے 75 ملکاں وچ اسلامی بینکاری جاری اے تے حیرت انگیز طور اُتے غیر مسلم وی ایس توں فائدہ مند ہو رہے نیں۔ برطانیہ دے جس بینک نے اسلامی بینکاری دا آغاز کیتا سی ایس وچ سب توں پہلا اکائونٹ اک غیر مسلم نے کھلوایا تے ہن ایس بینک دی 14 شاخاں قائم ہو چکیاں نیں۔ ملائشیا دے اسلامی بینکاں وچ 40 فیصد توں ودھ کھاتہ دار غیر مسلم نیں۔ دنیا وچ ہر تھاں سرمایہ دارانہ نظام معیشت آخری ہچکیاں لے رہیاں اے۔ ساڈے کول ایس اُتے زیادہ پیش رفت نہ ہون دی اصل وجہ ملک وچ آئی ایم ایف تے ورلڈ بنک دا معیشت اُتے کنٹرول اے۔ آئی ایم ایف نے اژدھے وانگوں معیشت نوں جکڑ رکھیا اے۔سود اُتے قرضے دین والے ایہہ کنج پسند کر سکدے نیں کہ ایہناں دا کاروبار بند ہو جائے۔
سود دے حرام ہون اُتے کسے دلیل دی لوڑ نہیں کیوں جے اللہ تعالیٰ نے واضح لفظاں وچ فرمایا اے کہ جیہڑے لوک سود کھاندے نیں، ایہناں دا حال ایس بندے جہیا ہوندا اے جویں شیطان نے چھو کے بائولا کر دتا اے۔ ایس حالت وچ ایہناں دے مبتلا ہون دی وجہ ایہہ اے کہ اوہ کہندے نیں تجارت وی تے آخر سود جہی ای شے اے حالاں کے اللہ نے تجارت نوں حلال تے سود نوں حرام قرار دتا اے تاں جس بندے نوں ایس دے رب ولوں نصیحت اپڑے تے آئندہ لئی سود خوری توں باز آ جائے تے جو کجھ اوہ پہلے کھا چکیا سکھا چکیا، ایس دا معاملہ الہ دے حوالے اے تے جیہڑا ایس حکم دے بعد فیر ایسے حرکت دا اعادہ کرے اوہ جہنمی اے، جتھے اوہ ہمیشہ رہوے گا۔ اللہ سود دی جڑکات دیندا اے تے صدقات دی نشوونما کردا اے تے اللہ کسے ناشکرے بدعمل انسان نوں پسند ن ہیں کردا۔ (سورئہ البقرہ 275-76) حضرت عبداللہ بن مسعود فرماندے نیں کہ سود دے گناہ دے 73 درجے نیں جنہاں وچ کمترین درجہ ایہہ اے کہ جویں کوئی اپنی ماں نال بدکاری کردا اے۔
بانی پاکستان قائداعظم محمد علی جناح نے 72 ورھے پہلے اسٹیٹ بنک آف پاکستان دے افتتاح دے موقعے اُتے بلاسود معیشت دا اعلان کیتا سی پر بانی پاکستان دے ایس حکم دی نافرمانی کردے ہوئے اسیں پون صدی لنگھا دتی۔ دستور پاکستان دی دفعہ ایف 38 وچ دو ٹوک حکم دتا گیا اے کہ ریاست جنہی جلدی ممکن ہوئے، ربا نوں ختم کرے گی پر 40 ورھے توں حکمران دستور دی خلاف ورزی کر رہے نیں۔ ایسے طرح جماعت اسلامی دی درخواست اُتے وفاقی شرعی عدالت نے 1991 وچ سود دے خاتمے دا فیصلہ دتا سی جس دے خلاف ایس ویلے دے وزیراعظم نواز شریف نے اپیل کر دتی۔ پیپلز پارٹی تے تحریک انصاف دی موجودہ حکومت نے وی مسلم لیگ ن دی اپیل دی پیروی کیتی تے اپنے وکیل دے ذریعے اللہ تعالیٰ دے نال جنگ جاری رکھی ہوئی اے یعنی ایہناں 30 ورھیاں وچ حکومتاں تے بدلدیاں رہن پر ایہناں دیاں پالیسیاں وچ کوئی تبدیلی نہیں آئی۔ ایس دا مطلب ایہہ اے کہ 30 ورھیاں توں ریاست نے عدالتی احکامات نوں وی پس پشت پا رکھیا اے جدوں اللہ دا حکم اے کہ اسلام وچ مکمل داخل ہو جائو تے ایس وچ معیشت وی شامل اے۔ سرکار دو جہاں نے سودی نظام دے خاتمے دا اعلان کیتا تے نال ای دنیا نوں اک متبادل معاشی نظام وی دتا۔ عشروز کواۃ دا نظام نافذ کرنا اسلامی حکومت دی ذمے داری ہوندی اے۔ خلیفہ اول نے ایہناں لوکاں دے خلاف جنگ دا اعلان کیتا جنہاں نے آپ دی رحلت دے بعد زکوٰۃ دین توں انکار کیتا سی۔ قرآن کریم وچ زکوٰۃ دی رقم خرچ کرن لئی مدات دا ذکر اے اللہ دا وعدہ اے کہ جے وستیاں دے لوک ایمان لیاندے تے اللہ ایہناں اُتے اسمان دیاں رحمتاں تے زمین دی برکتاں دے دروازے کھول دیندا۔ لوڑ ایس امر دی اے کہ ریاست سودی نظام دے خاتمے لئی اپنی آئینی تے اسلامی ذمے داریاں پورے کرے۔ سٹیٹ بنک نے اسلامی بینکاری لئی اک ڈپٹی گورنر تے مقرر کیتا اے پر سودی معیشت دے خاتمے دا واضح روڈ میپ نہیں دتا جو دتا جاندا ضروری اے۔ حکومت دی طرفوں دو ٹوک اعلان ہو جانا چاہیدا اے کہ اوہ کدوں تیکر آئین دی ایہناں دفعات اُتے عمل درآمد ہو جائے گا جس دے ذریعے سودی نظام دا خاتمہ تے اسلامی نظام معیشت قائم ہو جائے۔
