عاشقان رسول دے جنازے تے مزارات

لكهت:طیبہ ضیا ءچیمہ

علامہ خادم حسین رضوی دا جنازہ ایہناں دے عشق رسالتؐ دی گواہی دے رہیا سی۔ پاکستان دی بہتر سالہ تاریخ وچ مینار پاکستان وچ پہلی وار تل دھرن دی تھاں نہیں سی ، کوئی سیاستدان وڈے وڈے دعوے کردا رہیا پر مینار پاکستان نہ بھر سکیا۔ اک فقیر بھر گیا۔ کجھ تے کمال سی جیہڑا ڈیڑھ کروڑ دا مجمع جمع سی۔ دشمنان اسلام پاکستانیاں وچ عشق رسالتؐ دا جنون ویکھ کے پریشان نیں تے منافقین حسد دی اگ وچ سڑ رہے نیں۔
نام فقیر تِنہاں دا باھوْ
قبر جنہاں دی جیوے ھْو
(باہو ناں وی ایہناں ای دے زندہ رہندے نیں جنہاں دیاں قبراں زندہ نیں ) اولیا کرام اُتوں اتری مخلوق نہیں ہوندے، عام انسان ہوندے نیں پر رب ایہناں نوں خاص بنا دیندا اے۔ اولیاء کرام دے مزارات توں کوئی بندا بھُکا نہیں آیا۔ دن رات لنگر جاری رہندے نیں۔ بلاامتیاز ہر مذہب رنگ تے نسل دے لوک اکٹھے ہوندے نیں۔ ایہہ مزارات نہ کسے حکومت دی دیکھ بھال دے محتاج نیں تے نہ عوام دیاں رونقاں دے منتظر۔ ایہناں دا نظام اک غیبی طاقت چلا رہی اے۔ ایسے ذات پاک نے اپنے اولیاء دیاں قبراں نوں روشن رکھیا ہویا اے۔ کیہ لوک سن، زندہ سن تے کچی جھونپڑیاں مسکن سن، دنیا توں گئے تے بلند بالا وسیع و عریض مزارات مسکن بن گئے۔ ایہناں دے گھر تاریک سن پر دل روشن سن۔ آپ بھُکے پیاسے رہندے پر جیہڑا آیا سیراب ہو کے گیا۔ دنیا توں جان دے بعد وی مہمان نوازی دی روایت بدلی نہیں۔ ساڈے اک عزیز پنجاب توں سندھ شہباز قلندر حاضری لئی گئے تے اوتھے شرک و بدعات دا احوال وی سنایا۔ اولیا اللہ عاشق رسول صلی اللہ علیہ وسلم ہوندے نیں، خرافات نال ایہناں دا کجھ تعلق نہیں ہوندا۔ اکثریت شہباز قلندر دے بارے وچ کجھ وی معلومات نہیں رکھدی تے دھمال پانا فیشن بنا لیا اے۔سید عثمان مروندی المعروف لال شہباز قلندر ایران دے علاقے آذربائیجان دے ازبک قبیلے وچ 1178ء (5073ھ) وچ پیدا ہوئے۔ سید عثمان مروندی دا تعلق امام جعفر صادق دے خاندان توں سی۔آپ دے والد سید کبیر الدین جعفری دے آبائواجداد عراق توں مشہد آئے تے فیر مروند وچ سکونت اختیار کر لئی۔مروند دے حاکم سلطان شاہ نے اپنی دھی دی شادی معتبر سید خاندان دے صاحبزادے سید کبیر الدین نال کر دتی۔ ایہناں توں بیٹا عثمان یدا ہویا جیہڑا بعد وچ لال شہباز قلندر دے ناں توں مشہور ہویا۔ابتدائی تعلیم و تربیت نیک و زاہد والدین نے کیتی۔ اٹھارہ ورھے دے سن کہ والد دا انتقال ہو گیا تے دو ورھے بعد والدہ وی چلیاں گئیاں۔ شہباز قلندر مروند توں بغداد ہجرت کر گئے۔ بغداد توں عربی فارسی سنسکرت تے دنیا دی بے شمار زباناں اُتے عبور حاصل کیتا۔آپ ماہر لسانیات تے عربی گرائمر دے ماہر اکھواندے جاندے سن۔قرآن و حدیث تے فقہی علم وچ وی باکمال سن۔ اک دن آپ حضرت امام موسیٰ کاظم دے روضہ اُتے دعا کر رہے سن کہ اک بزرگ بابا ابراہیم مجرّد آپ دے نیڑے آ کے کھڑے ہوگئے تے آپ دا ناں سد کے کہیا، سید عثمان تسیں آ گئے، میں تہاڈا انتظار کر رہیا سی۔ بابا ابراہیم مجرد نوں حضرت امام حسین دے عشق دی حد تیکر عقیدت سی۔ کربلا وچ امام دے مزا شریف اُتے ای قیام رہندا جس دی وجہ نال ایہناں نوں بابا کربلائی وی کہیا جاندا سی۔بابا دی زندگی دے آخری لمحات سن۔ شہباز قلندر نوں حضرت امام موسیٰ کاظم دا موروثی خرقہ تے اک گلوبند جس وچ حضرت زین العابدین دے کجھ پتھر سن عطا کیتے۔ اہم وعظ و نصحیت دے بعد بابا دا وصال ہو گیا۔ شہباز قلندر نے بابا نوں اپنے ہتھاں نال کربلا دے احاطہ وچ دفن کیتا تے ایہناں دی وصیت دے مطابق سید جمال الدین مجردد قلندری دی تلاش وچ نکل پئے۔ ایہہ بزرگ اپنے زمانے دی اک چلدی پھردی لائبریری سن۔ علوم دا خزانہ سن پر اچانک سب کجھ چھڈ کے اک قبرستان وچ جاڈیرہ لایا۔ حضرت شہباز قلندر ایہناں تیکر اپڑ گئے تے کجھ عرصہ لنگھان دے بعد حج لئی روانہ ہو گئے۔ حج توں واپس بغداد اپڑے۔ حضرت امام علی، امام حسین تے حضرت عبدالقادر جیلانی دے مزارات اُتے حاضری دے بعد دین دی خدمات آپ نوں بلوچستان دے علاقیاں وچ لے گئیاں۔ پر ایہناں توں بلوچستان دے اک مقام دستِ شہباز اُتے قیام کیتا۔ اتھوں منگو پیر گئے۔ پہاڑاں اُتے چلہ کٹیا۔ ایس دے بعد ملتان تشریف لے گئے۔ ایس دور وچ ملتان ہند سندھ دا بغداد اکھواندا سی۔ حضرت بہاالدین زکریا دا طوطی بولدا سی۔ ناصر الدین قباچہ دی حکومت سی۔ حضرت بہائوالدین زکریا، بابا فرید الدین گنج شکر، سید جلال الدین بخاری تے لال شہباز قلندر دوست سن۔ شہباز قلندر 50 سال دی عمر وچ سندھ جام شورو دے پنڈ سہون تشریف لے آئے۔ پورا سندھ گمراہی وچ ڈبیا ہویا سی۔ ایس قلندر نے اپنے درویشاں دے ہمراہ بازار حسن دے باہر ڈیرہ لا لیا۔ قلندر دا رعب و بدبہ سی کہ بازار حسن دا کاروبار ماند پین لگیا لوکاں دے دل بدلن لگے، اللہ دے ایس قلندر دے پہاڑی اُتے قیام نے سندھ نوں مسلمان کر دتا۔
پانی پانی کر گئی مجھ کو قلندر کی یہ بات
تو جھکا جب غیر کے آگے نہ من تیرا نہ تن
اج وی ہندو نسلاں شہباز قلندر دی درگاہ اُتے عقیدت دے موتی نچھاور کر رہیاں نیں۔ سید عثمان المعروف لال شہباز قلندر دا تعلق اہل بیت رسول اللہ نال اے تاں اہل تشیع آپ نال بوہت عقیدت رکھدے نیں۔ شہباز قلندر دا صوفی سلسلہ سہرود ایہہ اے۔ 97 سال دی عمر وچ 1274ء وچ وصال ہویا۔ سہون دے جس مقام اُتے قیام پذیر سن۔ ایسے مقام وچ دفن نیں۔ حضرت شہباز قلندر نوں دنیا توں گئے 762 ورھے ہو گئے نیں پر اج وی پاکستان دے چارے صوبیاں توں ہر مذہب تے فرقے دے لوک اوتھے اکٹھے ہوندے نیں۔ جیہڑا کم دنیا دے طاقتور حکمران نہیں کر سکدے اوہ کم ایہہ ولی کر دیندے نیں۔ چارے صوبیاں دی زنجیربے نظیر نہیں بلکہ قلندر سہون شریف نیں۔
نہ تاج و تخت میںنہ لشکر و سپاہ میں ہے
جو بات مرد ِ قلندر کی بارگاہ میں ہے
ساڈے اک عزیز دے دل وچ خواہش ہوئی کہ پنجاب توں اینی دور سندھ آئے نیں تے کیوں نہ بھٹو دے مزار اُتے وی عائد کردے چلن۔ کٹھن سفر طے کر کے لاڑکانہ وچ گڑھی خدابخش اپڑے۔ کدی ذوالفقار علی بھٹو دا آبائی قبرستان سی، اج قبراں دے اُتے مینار تے مزار تعمیر اے۔ مزار دے اندر بھٹو دے نیڑے رشتہ دار مدفن نیں۔ ساڈے عزیز نے دسیا کہ اوتھے کوئی ویرانی سی ویرانی سی۔
نہ کوئی بندہ نہ بشر۔ وضو لئی کوئی ٹو ٹی سلامت نہیں سی تے نہ پانی میسر سی۔ بیت الخلاء دے دروازے ٹٹے ہوئے سن۔ سنگ مرمر دی عمارت دے اندر ریشمی چادراں وچ لپٹی اُچی نیچی قبراں اپنی داستان ویرانی سنا رہیاں سن۔ عزیز نے کہیا ’’زندہ ہے بھٹو زندہ ہے‘‘ دے نعرے سن دے سن دے اج ایتھے اپڑیا تے ہر پاسے موت دا عالم سی۔ اک بندا ملیا تے ایس نے دسیا کہ جدوں کوئی سرکاری شخصیت ایتھے آندی اے تے انسان نظر آندے نیں، باہر بیت الخلاء تے دیگر حالات و ماحول دس رہیا سی کہ ایس مزار دے رکھوالے کوئی مفلس لوک نیں۔ سلطان باہو ساری داستان اک مصرع وچ سمو گئے نیں ۔
کہنام فقیر تِنہاں دا باھوْ
قبر جنہاں دی جیوے ھْو