بارہواں میر پنجابی میلہ

اوپن ائیر تھیٹر وچ 2 دن مختلف سیشنز کیتے گئے جنھاں وچ ہر مکتبہ فکر دے لوکاں بھرویں رلت کیتی

رپورٹ: علی عمران چٹھہ

کجھ لوگ تریخ دےسینے اُتے پہاڑ وانگر ہوندے نیں کہ ویلے دیاں ہنیریاں طوفان اوہناں نوں ہلاون دی جرات نہیں رکھدے۔۔۔۔ایہہ لوگ سورج دی روشنی طراں ہوندے نیں جینہاں دی رُشنائی کسے وی ہنیر نگری وچ اپنی دُھپ دی نال ہمیش چانن دا موجب ہوندی اے۔۔۔۔ایہہ ظاہری طوراُ تے دنیا توں چلے جاندے نیں پر ایہناں دا پہاڑ ورگا حوصلہ تے اجہے سورج دی روشنائی ہمیش قائم رہندی اے۔۔۔علی ارشد میر وی حوصلے ہمت دا پہاڑ تے علم و دانش دا چمکدا سورج اے جس نوں ویلے دا طوفان تے ہنیرے کدی ختم نہیں کرسکے۔۔۔ایس روایت وچ دن بدن وادھا ہوندا اے۔۔۔ایہہ روایت ”میر پنجابی میلہ“ دی شکل وچ جاری اے۔۔

بارھواں میر پنجابی میلہ پروفیسر علی ارشد میر فاؤنڈیشن اور پنجاب آرٹس کونسل ،لہور دی چھتر چھاویں اوپن ائیر تھیٹر وچ 26-27دسمبر، 2020 نوں منایا گیا۔ پنجابی ادب دی مختلف اصناف وچ لکھی کتاباں لئی ”علی ارشد میرایوارڈ 2020 “ دا آہر کیتا گیا۔ کھوج پرکھ دی کھیتر وچ ڈاکٹر سعید خاور بھٹہ دی کتاب دا انتخاب کیتا گیا۔ پنجابی اُلتھا دی کھیتر وچ حمید رازی دی کتاب دا ناں ساہمنے آیا۔  پنجابی شاعری (کوّتا کھیتر) وچ عاصم پڑھیار تے عارفہ شہزاد جد کہ غزل کھیتر لئی ظفر اعوان دی کتاباں دا انتخاب کیتا گیا۔ پنجابی نثری ادب لئی فوزیہ رفیق دی کتاب داانتخاب کیتا گیا۔ بال ادب لئی شاعری وچ عبدالکریم قدسی، نثر لئی ڈاکٹرفضیلت بانو ہوراں دےنام ساہمنے آئے۔ دینی ادب کھیتر وچ محبوب سرمد حمدیہ کلام دا انتخاب کیتا گیا۔ دو روزہ میر پنجابی میلہ وچ پنجابی زبان و ثقافت تے ادب دے حوالے نال مختلف وچار وٹاندریاں دا بندوبست کیتا گیا۔۔۔
پہلے سیشن وچ ”نابری ریت تے اج دے دھاڑوی“ ٹیچے تحت عامر ریاض ٹوٹو اتے اقبال قیصر ہوراں نے گل بات کیتی۔ دوسرے سیشن وچ ”پنجاب مخالف بیانیہ تے پنجابی صحافت“ عنوان تحت عمار شاہ کاظمی صدر پنجاب نیشنل موومنٹ نے گفتگو کیتی۔ تیسرے سیشن وچ ڈاکٹر سعید بھٹہ نے ”راج دھارا تے لوک تکنی “تے اپنے خیالات دا اظہار کیتا۔

چوتھے سیشن وچ ”علی ارشد میر دی شاعری تے پنجابی زبان دیاں اوکڑاں“ موضوع تےکھوج کار الیاس گھمن نے وچار سانجھے کیتے۔ عفت عاشق نے پنجویں سیشن وچ ”بال ادب دیاں لوڑاں تھوڑاں“ موضوع تے اپنا مقالہ پیش کیتا۔“لہندے پنجاب دے مزدور اتے کساناں دیاں اوکڑاں“ سرناویں ہیٹھ ریاض دانشور نے گل بات کیتی۔ افضل آحسن رندھاوا دی ناول نگاری دے موضوع تے اعجاز ہوراں گل بات ہوئی۔ ”علی ارشد میر دی شاعری تے وحدت الوجود“ دے موضوع تے اختر خاں ہوراں اپنے وچار سانجھے کیتے جد کے عاصم اسلم نے ”علی ارشد میر تے پنجاب وسیب“ دے موضوع تے مقالہ پڑھیا۔ آخری سموادھ ”علی ارشد میر دی شاعری دا مزاحمتی پکھ“ سی۔ جس اندر فاروق ندیم نے ارشد میر ہوراں دی مزاحمتی وچاراں تے گل بات کیتی۔ فاروق ندیم، اعظم ملک ، اختر خان تے پروفیسر ڈاکٹر سرمدفروغ ارشد نے میزبانی کیتی۔ معروف پنجابی دانشور کرنل نادر علی اتے مصنف ایزد عزیز دے چلانا کرن دی خبراں تے حاضرین نے اپنیاں نشستاں توں کھڑ ے ہوکے اظہار افسوس کیتا تے خاموشی اختیار کیتی۔

ترنجن ناٹک منڈلی اتے ندیم عباس نے علی ارشد میر دی شاعری نوں ڈرامائی انداز وچ پیش کر کے حاضرین کولوں داد وصول کیتی ۔ میلہ وچ کُل پنجاب مشاعرہ دا آہر وی کیتا گیا۔ جس دی پردھانگی مسعود اوکاڑوی ہوراں کیتی۔ مشاعرے وچ صابر علی صابر، اعظم ملک، طاہرہ سرا، صغیر احمد صغیر، صفیہ حیات ، صائمہ الماس،احمد نعیم ارشد، ارشد منظور، اقبال درویش، علی جوشا اور پروفیسر ڈاکٹر سرمدفروغ ارشد اجہے نامورشعراء تے شاعرات نے اپنی شاعری نال علی ارشد میر دی شعری روایت نوں زندہ کیتا۔۔۔میلے دوران مختلف ویلیاں وچ چاہ ، سوپ ، اُبلے انڈے اتے بریانی نال مہماناں دے کھاون پیون دا پربندھ وی کیتا گیا۔ مشہور کلاکار قیصر پیا اتے شاہد خاں نے کامیڈی شو پیش کیتا اور لوکائی وچ ہاسے ونڈے۔ آخر وچ توحید احمد انس ،حسنین قادری ، کالے خاں بھاگ، نعمان ، ارشد علی ، بلال رجب اور میمونہ ساجد نے لوک گاون اتے علی ارشد میر دا کلام پیش کرکے حاضرین کولوں داد وصولی۔ سخت دھند، بارش اتے وبائی دناں باوجود لوکائی نے رلت کیتی۔ اور ماں بولی لئی اپنے پیار دا اظہار کیتا۔