’’ طلاق دا ودھدا ہویا رجحان‘‘

تحریر: اکرم عامر سرگودھا

معاشرے وچ ماں پیو نال بغاوت کر کے نکاح کرن والیاں نوں ’’پریمی جوڑا ‘‘ دا لقب دتا جاندا اے ایسے طرح ہون والی شادی نوں محبت دی شادی کہندے نیں، ایس نوعیت دے 90 فیصد نکاح کچہریاں وچ نام نہاد نکاح خواں پڑھاندے نیں تے بغاوت کر کے گھر توں نسن والیاں کُڑیاں اپنے والدین، بھین بھراواں، رشتہ داراں جنہاں نے ایہنوں (لڑکی) نوں نازنخریاں نال پال پوس کے جوان کیتا ہوندا اے دے خلاف طرح طرح دے سنگین گندے الزام جیہڑا ایہنوں وکیل پڑھاندا اے لا کے عدالت وچ کیس دائر کر کے اپنے ہون والے شوہر نوں محفوظ کر کے آپ غیر محفوظ ہو جاندی اے، انج دے جوڑے کئی کئی سال نکاح دے بغیر اک دوجے دی جنسی تسکین پوری کردے نیںانج دیاں شا دیاں رچان والیاں دی اکثریت فلماں توں متاثر ہو کے انج دا کم کردیاں نیں تے شادی دے ویلے ایہناں دے ذہن وچ فلماں جہیا منظر گردش کر رہیا ہوندا اے، اوہ تصور کر رہے ہوندے نیں کہ ایہناں دی آئندہ زندگی فلمی جوڑیاں وانگوں خوشگوار لنگھے گی پر فلماں وچ شادی دے بعد دی کہانی دی عکاسی نہیں کیتی جاندی، کیوں جے ایس صورت وچ فلم ڈبہ ہون دا خدشہ ہوندا اے الیکٹرانک و سوشل میڈیا تے جدید ذرائع ابلاغ نے شہراں دے نال دیہی پسماندہ علاقیاں دی دی رہن والی کُڑیاں دے دلاں وچ فلمی ہیروز جہے آئیڈیل پیدا کر دتے ہوندے نیں۔ انج دی کُڑیاں اپنے آئیڈیلز جس نال اوہ اپنے ماں باپ، بھین بھراواں نوں چھڈ کے نکاح کرن جا رہی ہوندی اے نال عہد و پیما کردے ہوئے اک دوجے توں قسماں تیکر لیندے دیندے نیں پر تسیں ایہہ سن کے حیران ہوئو گے کہ انج دی 61 فیصد شادیاں دا انجام طلاق اُتے ختم ہوندا اے تے صرف 39 فیصد پریمی جوڑے نبھا کر پاندے نیں، ایہناں وچوں صرف 11 فیصد وچ آخر تیکر محبت دی فضا قائم رہندی اے تے 28 فیصد پوری زندگی تنائو دا شکار رہندے نیں، جیہڑے بچے پیدا ہو جان پاروں اک دوجے دے نال زندگی لنگھان اُتے مجبور ہوندے نیں، انج دے ماں باپ دیاں اولاداں اکثریت وچ بے راہ روی دا شکار، نالائق تے معاشرے اُتے بوجھ ہوندیاں نیں تے ایہناں وچوں وڈے وڈے جرائم پیشہ وی بن دے نیں۔
غیر سرکاری اعداد و شمار دے مطابق 2020 وچ لہور، ملتان، گجرانوالہ، راولپنڈی، جہلم، شیخوپورہ، خوشاب، بھکر، سرگودھا، پاکپتن، ساہیوال، بہاولپور، لودھراں، رحیم یار خان، راجن پور سمیت 36 وچوں 30 ضلعیاں دی کورٹس وچ 4 لکھ 81 ہزاردے لگ بھگ خواتین نے خلع لئی رجوع کیتا، 3 لکھ 62 ہزار دے نیڑے کیساں دے فیصلے ہوئے، 7 ہزار دے لگ بھگ میاں بیویویاں نے عدالتاں وچ صلح کیتی تے 3 لکھ 55 ہزار دے نیڑے خواتین نے خلع حاصل کیتا جنہاں وچ پسند دی شادی کرن والی خواتین و لڑکیاں دی تعداد 82فیصد دے لگ بھگ سی، خواتین وچ ودھدے ہوئے طلاق ی وڈی وجہ سوشل تے الیکٹرانک میڈیا اے، جنہوں ویکھ کے کُڑیاں خواہشاں دی تکمیل نہ ہون اُتے شوہر نال وگاڑ پیدا کر لیندیاں نیں تے انج دی صورت وچ طلاق دی اکثریت وجہ کُڑیاں دی اپنے والدین تیکر رسائی نہ ہونا اے جیہڑے آ کے میاں بیوی دے وچکار معاملہ سدھار سکن کیوں جے پسند دی شادی کرن والی کُڑیاں دی اکثریت پہلے ای اپنے والدین نوں اپنے تئیں مار کے گھراں وچ آئیاں ہوندیاں نیں پسند دی شادی کرن والی کُڑیاں وچ اکثریت پڑھی لکھی ہوندی اے جیہڑی سوشل میڈیا دا استعمال وی خوب جاندیاں نیں تے ایہو سوشل میڈیا ایہناں دے گھراں دی تباہی دا باعث بن دا اے۔ رپورٹ دے مطابق پنجاب وچ 2020 وچ 243 پسند دی شادی کرن والی کُڑیاں نوں ایہناں دے والدین نے غیرت دے ناں اُتے قتل کیتا، جد کہ ایہناں وچوں 31جوڑے یعنی پسند دی شادی کرن والی کُڑیاں تے منڈے وی شامل نیں جد کہ انج دے لاتعداد واقعے وی ہون گے جیہڑے رپورٹ نہیں ہوئے ہون گے، پسند دی شادی کر کے نبھا نہ ہون اُتے لنگھے سال وچ 18 پریمی جوڑیاں نے اجتماعی خود کشی کیتی جد کہ پسند دی شادی دی وجہ بن کے 31 بندے جنہاں وچ 6 خواتین وی شامل نیں بدلے وچ قتل ہوئے۔ ایسے طرح طلاق دی ودھدی ہوئی شرح معاشرتی وگاڑ دا باعث بنن دے نال نال کئی خانداناں وچ دشمنیاں دا باعث بن گئی جس دے آن والے ویلے وچ بھیانک نتیجے برآمد ہون گے۔
پسند دی شادی دا رحجان 1998 وچ حدود آرڈیننس وچ ترمیم توں بعد آئے سال ودھدا ویکھن وچ آ رہیا اے جیہڑا کہ خطرناک صورت اختیار کر چکیا اے۔ اک زمانہ سی جے خدانخواستہ کدی طلاق دا واقعہ پیش آندا تے پنڈ دے معززین پنڈ توں دور جا کے طلاق لکھن یا فیصلے نوں سرانجام دیندے تاں جے ایس دا عذاب پورے پنڈ اُتے نازل نہ ہوئے تے دھی والیاں دے گھر وچ کوئی دناں تیکر افسوس کرن والیاں دا رش رہندا اک عرصے تیکر اوتھے دی فضا سوگوار رہندی سی پر اج کل دور جدید وچ اپنے خاوند نوں مجازی خدا سمجھن والی اوہ ای عورت نام نہاد مغربی آزادی تے ایسے زندگی دا پرچار کرن والے ساڈے ٹی وی پروگراماں دی وجہ نال فیشن تے آزادی دی دھن وچ مگن اج دی خواتین اپنے رویاں دی وجہ نال آپ طلاق دی شرح وچ بے پناہ وادھے دا سبب بن چکیاں نیں۔ معاشرہ ایس ویلے اخلاقی گراوٹ دی انتہا نوں اپڑ چکیا اے۔ ایس دی روک تھام لئی حکومت وقت نوں موثر اقدامات کرنے ہون گے نہیں تے آن والے ویلے وچ طلاق دی شرح ایس تشویشناک حد تیکر ودھ جائے گی جنہوں کنٹرول کرنا فیر مشکل ای نہیں ناممکن ہو جائے گا۔ایتھے قابل توجہ امر ایہہ وے کہ اپنے گھر، ماں باپ، بھین بھائی، عزیز و اقارب نوں چھڈ کے پسند دی شادی کرن دے بعد خلع حاصل کرن والی خواتین دی وڈی تعداد بے راہ روی دا شکار ہو کے معاشرتی وگاڑ دا باعث بن رہی اے تے انج دی خواتین دی اکثریت نوجوان نسل نوں تباہ کرن لئی مختلف ڈیریاں اُتے سر عام داد عیش دیندی نظر آندیاں نیں ۔ لوڑ ایس امر دی اے کہ انج دیاں شادیاں کرن والے جوڑیاں دی تربیت لئی ادارے قائم کیتے جان تے ایہناں اداریاں وچ طلاق لئی رجوع کرن والیاں خواتین دی اصلاح لئی وی اقدامات چکن دی لوڑ اے تاں جے طلاق دی شرح وچ کمی واقع ہوئے تے بے راہ روی تے معاشرتی وگاڑ وچ وی کمی واقع ہو جائے۔