ربا
بابا نجمی
اپنے سر دی ویل کرائی تیرے لئی
سولی اُتے جان چڑھائی تیرے لئی
تیرے کولوں گھٹ نہیں سریا پانی دا
اساں تے لہو دی نہر وگائی تیرے لئی
چڑھدے لہندے تیرا ناں اپڑایا میں
کردا کنی ہور کمائی تیرے لئی
اجے وی تینوں شک اے میرے عملاں تے
پُتر اُتے چھری چلائی تیرے لئی
تیراں اُتے سجدہ کر کے تینوں میں
اپنی سولی آپ اٹھائی تیرے لئی
تیرے ورگا کوئی نہیں نال زمانے دے
بابا سر دی شرط لگائی تیرے لئی
