نواں سال
بابا نجمی
خیر دا چن چڑھاویں نویاں سالا توں
پچھلے وانگ نہ جاویں نویاں سالا توں
لکھی جاوے فر نہ کوئی تاریخ نویں
ظالم نوں سمجھاویں نویاں سالا توں
دہشت وحشت کھلری وچ زمانے دے
بھیڑے رنگ مُکاویں نویں سالا توں
بڑی اداسی دتی پچھلے سالاں نے
ہاسے ونڈدا آویں نویں سالا توں
پیر دھرن لئی تھاں نہ لبھے نفرت نوں
اینا پیار اُگاویں نویاں سالا توں
لوڑ پوے جے کدھرے بجھدے دیوے لئی
میرا لہو جاویں نویاں سالا توں
نیواں سر نہ ہووے کدھرے سچے دا
جھوٹھے سر کھہہ پاویں نویاں سالا توں
بے شک لاڈ لڈاویں اچیاں محلاں دے
جھگیاں وی پرچاویں نویاں سالا توں
بابا نجمی وانگوں توں وی لوکاں لئی
حق دا ڈھول وجاویں نویاں سالا توں
