ہائے میں مر گئی
سلیم آہنگ
ہیلو ہیلو میں پئی بولنی آں فون تے
خوشیاں منا لا آ کے میرے ڈُلھے خون تے
آکھنی آں سُن لوئو گل میری آخری
نہ رہوے بانس اتے نہ وجے بانسری
دُکھاں بھری جندڑی توں ہُن گئی آں رج میں
کدی نہ جٹھانی تے ننان بوہے پھڑکاں
فیر وی میں اوہناں دیاں دیدیاں وچ رڑکاں
سس سوہرے بڑی ات چکی ہوئی ورنہ
کون بھلا چاہندا اے حرام موت مرنا
بھُل ہوئی ایویں وی سی آر لا کے بہہ گئی
خیر پونے گھنٹے دی فلم باقی رہ گئی
چاہنی آں میں آپ چھیتی مگروں میں لہہ جاواں
پر جاندی جاندی گلاں پنج ست کہہ جاواں
چار سوٹ درزی توں لے کے اتوار نوں
بھیج دینا میری چھوٹی بھین گلزار نوں
جیہڑے میں دوپٹے تن بھیجے سی للاری نوں
اوہناں وچوں کرن لوانی نسواری نوں
باقیاں نوں تلے والی پیکو کروانی ایں
دھاگے والے پھمناں دی جھالر نوانی ایں
کیسری دوپٹہ جیہڑا گھلیا کڈھائی تے
اوہنوں کیہ کرانا لکھ رکھیا تپائی تے
جال وچ کھڑیا گلاب کڈھوانا ایں
پھُلاں وچ تھائیں تھائیں موتیاں دی کار اے
تاریاں دا کم اوہناں موتیاں دے باہر اے
پتہ ہُندا مرنے دا مینوں دکھیاری نوں
فیر کیہ میں پھوکنا سی ایس میناکاری نوں
کر دینا معاف تہانوں کیتا پریشان میں
سُکھی سُکھی پہنچ جاواں اگلے جہان میں
میرے بعدوں اپنا خیال تسیں رکھنا
ایویں نہ شدائیاں وانگوں تاریاں نوں تکنا
نالے ہُن چھڈ دینا سب ہیرا پھیریاں
کوٹھے اُتے بیٹھ کے نہ چُوپنا گنڈیریاں
تہانو چاہن والی کوئی ہور میرے جہی نہ
پر تسیں اک واری روکدے تے سہی نہ
صبح سرداراں ہوراں پوہڑی ساڈی منگی سی
چیتا رہوے اوہدے اُتے ٹائی تہاڈی ٹنگی سی
جتھے تسیں دیکھی سی چنگیر بھری ہولاں دی
اوتھے رکھی ہوئی اے گھروڑی مٹھے چولاں دی
بیسن اُتے دھریاں نیں دوویں ٹوتھ پیسٹاں
لاکر وچ پیاں ساڈی مووی دیاں کیسٹاں
وڈا سیٹ جیہڑا تہاڈے نال میں لیائی ساں
پرسوں اوہ آندی واری پیکے بھُل آئی ساں
چھوٹا سیٹ جیہڑا میرے داج وچ آیا سی
پیکے میرے بھیج دینا کیہڑا تسیں پایا سی
اک دل کہندا قابو غصے اُتے پالواں
ہور نہیں تے نویں سیتے سُوٹ ای ہنڈالواں
ہیلو فیر آکھنا کیہ آکھیا ایہ ڈھونگ اے
فٹے منہ تے پہلاں آکھ نمبر ایہ رونگ اے
