پِلاک تے لہور یونیورسٹی فار ویمن دی سانجھ نال

’’ مولوی غلام رسول عالمپوری کانفرنس‘‘ دا پربند

رپورٹ: آفاق بٹ

پنجاب انسٹیٹیوٹ آف لینگوئج، آرٹ اینڈ کلچر (پِلاک) تے لہور یونیورسٹی فار ویمن دے اشتراک نال ’’مولوی غلام رسول عالمپوری کانفرنس‘‘ منعقد ہوئی جس دے مہمان خصوصی صاحبزادہ مسعود احمد عالمپوری، صدارت ڈاکٹر صغرا صدف جد کہ مہمانانِ اعزاز ڈاکٹر مجاہدہ بٹ شامل سن۔

صاحبزادہ مسعود احمد عالمپوری نے آکھیا کہ مولوی غلام رسول عالمپوری پیدائشی ولی اللہ سن۔ ایہناں دے کلام دے اندر علم و حکمت دے جیہڑے گوہر موجود نیں ایہناں توں استفادہ کرن دی لوڑ اے۔ اوہناں نے مولوی غلام رسول عالمپوری اُتے پی ایچ ڈی تے ایم فل کرن والے طلباء لئی بالترتیب اک لکھ تے پجاہ ہزار انعام دا اعلان کیتا۔ ڈاکٹر ناصر رانا نے کہیا کہ مولوی غلام رسول عالمپوری اک عالم باعمل صوفی شاعر سن۔

ایہناں دا کلام عام و خاص وچ یکساں مقبول سی۔ مذہبی طبقے دے اندر ایہناں دے کلام نوں بوہت قدر دی نگاہ نال ویکھیا جاندا اے۔ ڈاکٹر سعادت علی ثاقب نے کہیا کہ اک دور سی جدوں بچیاں نوں جہیز وچ قرآن مجید دے نال مولوی صاحب دی کتاب احسن القصص المعروف قصہ یوسف زلیخا وی دتی جاندی سی۔ ایہناں دا کلام روانی، تسلسل، نغمگی تے سوزوگداز نال بھرپور اے۔ اوہناں نے مولوی صاحب دا کلام ترنم دے نال وی پیش کیتا۔ ڈاکٹر مجاہدہ بٹ نے کہیا کہ مولوی صاحب دے کلام توں ظاہر ہوندا اے کہ ایہناں دا علم کسبی نہیں بلکہ لدنی سی، علوم دا بے پناہ خزانہ ایہناں دے کلام وچ موجود اے۔

ڈاکٹر حنا خان نے کہیا کہ مولوی غلام رسول دا کلام علم دا اک ٹھاٹھاں ماردا ہویا سمندر اے ایہناں دے کلام دی روانی نال لگدا اے جویں الفاظ ایہناں دے ساہمنے دست بستہ کھڑے ہون۔ جس شے نوں وی بیان کردے نیں تے کردے ای چلے جاندے نیں۔ محمد عاصم چودھری ڈائریکٹر پلاک نے کہیا کہ مولوی غلام رسول عالمپوری دا قصہ یوسف زلیخا جیہڑا کہ قرآن مجید توں ماخوذ اے۔ اوہناں نے ایس نوں بیان کردے ہوئے نہایت محتاط انداز اپنایا اے۔ کیوں جے ایہہ اک پیغمبر دی داستان حیات اے جنہوں قرآن مجید دی سورۃ یوسف وچ بیان کیتا گیا اے۔ اوہناں نے صرف پندرہ ورہے دی عمر وچ داستان امیر حمزہ تے 24 سال دی عمر وچ احسن القصص المعروف قصہ یوسف زلیخا لکھیا جیہڑا کہ دیہات دی محفلاں وچ کثرت نال پڑھیا جاندا سی۔ادارے دی ڈائریکٹر جنرل ڈاکٹر صغرا صدف نے کہیا کہ مولوی غلام رسول عالمپوری اک قادر الکلام صوفی شاعر تے ولی اللہ سن۔ ساڈے سارے صوفی شعراء اک ادارے دی حیثیت رکھدے نیں، ایہناں دے کلام نال لوکاں دے اذہان و قلوب دی آبیاری ہوندی اے۔ ایہناں دے علم و فضل دا کوئی متبادل نہیں۔ نامور گائیک آصف جاوید مہدی نے ایہناں دا کلام گا کے سنایا تےبھرپور داد وصول کیتی۔ کانفرنس وچ نظامت دے فرائض خاقان حیدر غازی ڈائریکٹر پروگرام نے سرانجام دتے۔