حبیب جالب
بابا نجمی
کون کرے گا کھریاں گلاں تیرے بعد
سُک نہ جاون ہریاں ولاّں تیرے بعد
دکھ رہوے گا پچھ نہیں سکیا ظالم نال
گل کرن لئی کہنوں گھلاں تیرے بعد
راہواں بھُلیاں نہراں تے دریاواں نوں
تڑفیاں وچ سمندر چھلاں تیرے بعد
جھگیاں وچ نیں ہوکے ہنجو ہاواں بس
ہاسے بھنگڑے وچ محلاں تیرے بعد
بالاں گا میں دیوے جالب تیری سونہہ
وچ ہنیرے وچ کھڈلاں تیرے بعد
تیرے ورگا اک وی شہر چ دِسدا نہیں
جالب جس دے نال میں چلاں تیرے بعد
