آرمی ایکٹ تے وزیراعظم

لکھت: رئوف کلاسرا

پچھلے دناں وزیراعظم عمران خان وی ویلے تے قومی اسمبلی اپڑے ہوئے سن۔ اوہ جو پچھلی پارلیمنٹ وچ پنج ورھے نہیں گئے تے جدوں توں وزیراعظم بنے نیں شاید کجھ واری ای گئے ہون گے سگوں جدوں وزیراعظم توں پچھیا جاندا سی کہ اوہ اسمبلی کیوں نہیں جاندے تے کہندے سن کہ میں کیہ کرن جاواں پارلیمنٹ وچ کوئی سنجیدہ کم ہوندا ای نہیں۔ اج آرمی ایکٹ نوں منظور کران لئی اوہ آپ ہال وچ موجود سن کہ شاید پورے سال وچ ایہ کلّا سنجیدہ کم سی۔قومی اسمبلی دی پریس گیلری وچ ارکان اسمبلی نوں چنگے بالاں وانگوں آرمی چیف دی مدت توسیع دے قنون تے ووٹ پاندیاں یاد آیا کہ ایس قنون تے جماعت اسلامی سنے کجھ پارٹیاں نے ووٹ نہیں پایا سگوں امیر جماعت اسلامی مسلسل کئی دناں توں ایہدے تے تنقید وی کر رہے سن۔ ایس اسمبلی دی پریس گیلری توں بڑے مناظر ویکھے نیں تے ہولی ہولی ایہناں سیاستداناں توں دل بھر گیا۔ ہن نہ ایہناں تے پیار آندا اے تے نہ ای غصہ۔ ویہہ ورھے پہلاں جدوں ایس پارلیمنٹ وچ جانا شروع کیتا سی تے ساڈے سیاسی رومانس دے دن سن۔ بے نظیر بھٹو تے نوازشریف دی پارٹیاں نے جنرل مشرف نوں ٹف ٹائم دتا ہویا سی۔ اوہ جنرل مشرف دے ایل ایف او دے خلاف تحریک چلائے ہوئے سن تے روز سانوں خواجہ آصف جذبانی تقریراں کرکے گرماندے سن۔ اک دن خواجہ آصف نوں محسوس ہویا کہ کجھ مصالحہ پایا جاوے تاں جے عوام دیاں اکھاں وچ اتھرو وی لیائے جان تے اوہ ہاؤس وچ کھڑے ہوئے تے دوواں ہتھ بنھ کے تقریباً اکھاں وچ اتھرو لیا کے بولے کہ ایہناں دے پیو خواجہ صفدر نے جنرل ضیا دی جہڑی حمایت کیتی سی اوہ غلط سی تے اوہ ایہدے تے قوم توں معافی منگدے نیں۔ پورا ہال تاڑیاں نال گونج پیا کہ ویکھو کوئی تے اے جہڑا اپنے پیو دی ماضی وچ کیتی گئی غلطیاں تے قوم توں معافی منگ رہیا اے تے وعدہ کر رہیا اے کہ آئندہ انج نہ آپ کرے گا نہ ایہدی حمایت کرے گا۔ اوہی خواجہ آصف ویہہ ورھے بعد ایسے پارلیمنٹ وچ نواز لیگ دے ارکان پارلیمنٹ نوں سمجھان دی کوشش وچ لگے ہوئے سن کہ اعلیٰ قیادت دا فیصلہ اے کہ اسیں آرمی ایکٹ دی ترامیم دے حق وچ ووٹ پانا اے۔ بھانویں ذرائع دسدے نیں کہ نواز لیگ دے تقریباً ستر فیصد ایم این ایز ایس ترمیم دے خلاف سن تے ایہناں دا خیال سی کہ ایہناں دا تن ورھے پرانا بیانیہ خراب ہووے گا کہ الیکشن چوری کیتا سی تے عمران خان نوں سلیکٹ کیتا گیا سی۔مینوں یاد اے دو ہزار تن وچ اپنے انگریزی اخبار لئی میں کجھ اہم سیاستداناں دے پروفائل کر رہیا سی تے اکثر سیاستداناں نوں اوہناں دناں جمہوریت دی محبت دا دورہ پیا ہویا سی۔ اوہ ماضی وچ فوجی جرنیلاں دی حمایت تے یاں تے شرمندہ سن یاں قوم توںمعافی منگ رہے سن۔ اک شادی وچ خیبر پختونخوا دے اک سیاستدان مل گئے جہڑے جنرل مشرف دی حکومت وچ شامل سن۔ مینوں ہس کے کہن لگے: ایہ تسیں کیہ سیاستداناں دے انٹرویوز وچ اوہناں دے اعترافات تے معافی نامے شائع کرنے شروع کر دتے نیں؟ جدوں مشرف دی حکومت ختم ہووے گی تے تسیں میرے نال آنا اے تے میں وی پورے دل توں معافی منگ لواں گا تے تسیں شائع کرنی اے۔ میں اوہناں دا منہ تکدا رہ گیا۔ اوہ بولے: رؤف صاحب تسیں بہت بھولے او ایہ سب سیانے لوک نیں۔ ایہ ایہناں فوجی حکومتاں توں فائدہ چکدے نیں مزدے کردے نیں تے جدوں اقتدار چلا جاندا اے تے تہاڈے ورگے لوکاں نوں بیوقوف بنان لئی ایہ لوک بڑا سیریس منہ بنا کے قوم توں معافی منگ لین گے تے تسیں وی بھج کے چھاپ دیندے او تے اگلی واری ایہ لوک فیر لائن وچ کھڑے ہو کے آمراں نوں ووٹ دے رہے ہوندے نیں۔ مینوں اوہناں دی گل اوس ویلے یاد آئی جدوں اوہ خواجہ آصف جہڑے خواجہ صفدر دے معاملے وچ مافی منگدے سن تے آئندہ غلطیاں نہ دہران دا وعدہ کردے سن ، وی ووٹ پا رہے سن۔مینوں پریس گیلری وچ بیٹھے یاد آیا کہ ایہناں خواجہ آصف تے پیپلزپارٹی دے ارکان نے مشرف دور وچ ایم ایم اے دا جینا حرام کیتا ہویا سی۔ ایم اے والے جنرل مشرف دے ساتھیاں نال خفیہ مذاکرات کر رہے سن تے روز سانوں اسمبلی وچ پیپلزپارٹی تے نواز لیگ دے ارکان چیخ چیخ کے دسدے سن کہ ملک تے قوم دے نال کناں گھناؤنا مذاق ہو رہیا اے۔ سانوں پنج ورھے تک قومی اسمبلی وچ دسیا گیا کہ ایم ایم اے وردی دے نال جنرل مشرف نوں صدر بنان دا اوہ کم کر رہی اے جہدی قیمت نسلاں ادا کرن گیاں۔ پنج ورھے تک سانوں انج لگا کہ ایہ دوواں پارٹیاں ہن جمہوری فیصلے کرن گیاں تے ایہناں دی حکومتاں آن تے ایہ جمہوریت نوں آسمان تے لے جان گے۔ ساڈے ورگے بھولے ایہدے تے یقین کر بیٹھے فیر کیہ ہویا آصف زرداری نے صدر تے وزیراعظم گیلانی نے پہلی فرصت وچ جنرل کیانی نوں مدت ملازمت وچ تن ورھے دی توسیع دتی۔ گیلانی صاحب نے رات نوں قوم نال خطاب کرکے ایہ خوشخبری سنائی مطلب ایہ سی کہ تسیں ساڈی حکومت نوں جہڑے وڈے وڈے سکینڈلز وچ ملوث سی کجھ نہ کہن اسیں تہانوں کجھ نہیں کہواں گے۔ مینوں یاد اے زرداری دور وچ عجیب کم ہو رہیا سی کہ اک ریاست وچ کئی ریاستاں اِکو ویلے کم کر رہیاں سن۔ زرداری گیلانی صاحبان نوں ایہدے توں کوئی فرق نہیں پیندا سی اوہناں نوں بس ایہدے نال غرض سی کہ اوہناں نوں نہ روکیا جاوے تے فیر اوہناں نوں کسے نے نہیں روکیا انج اوہناں نے پنج ورھے پورے کر لئے۔ اوہی بے نظیر بھٹو جو جنرل مشرف دے وردی وچ صدر بنن دے خلاف سن جنرل مشرف نال خفیہ مذاکرات کر رہیاں سن تے بدلے وچ اپنے سارے مقدمات ختم کرا رہیاں سن۔ جدوں ایم ایم اے اقتدار وچ حصہ لین لئی ڈیل کر رہی سی تے ایسے پیپلزپارٹی نے آسمان سر تے چکیا ہویا سی تے فیر اوہی پیپلزپارٹی ایم ایم اے وانگوں جنرل مشرف نال پاور شیئرنگ لئی خفیہ ملاقاتاں کر رہی سی۔ ایسے طرح نوازشریف دا دور اسیںویکھیا۔ اوہ وی پارلیمنٹ توں دور رہے۔ اٹھ مہینے تک اوہ پارلیمنٹ نہیں گئے تے نہ ای سینیٹ نے اک سال اوہناں دی شکل ویکھی۔ اوہ وی وزیراعظم بنن لئی پارلیمنٹ گئے سن ایس توں ودھ اوہناں نوں وی عمران خان وانگوں پارلیمنٹ نال دلچسپی نہ سی جہڑا وزیراعظم اٹھ مہینے تک پارلیمنٹ ای نہ جاوے اوہنوں کیہ حق اے کہ ووٹ دی عزت دا نعرہ لاوے؟عمران خان وی اوہناںدناں فوجی حکومتاں تے برسدے سن تے جنرل مشرف نوں وردی دے نال صدر بنان دے خلاف سن۔ اوہناں دیاں تقریراں سنیاں تے اندازہ ہویا کہ شاید اوہناں توں وڈا جمہوریت پسند کوئی نہیں پر ہولی ہولی اوہناں نوں وی سمجھ آنا شروع ہو گئی کہ اقتدار لئی اوہناں نوں کجھ طاقتوراں نال دوستیاں نبھانا ہون گیاں۔ اسیں اجے کجھ دن پہلاں پرویز الٰہی دے منہ توں سنیا کہ کیویںعمران خان نوں پارٹی بنا کے دتی گئی تے اوہناں دے لوک توڑ کے اوہ نال لے گئے۔ خیر پرویز الٰہی صاحب نے ایہ نہیں دسیا کہ اوہناں نوں (ق) لیگ کس نے بنا کے دتی سی جہدی بنیاد تے اوہ وزیراعلیٰ تے شجاعت حسین وزیراعظم بن بیٹھے سن۔ جہناں نے اوہناں نوں (ق) لیگ بنا کے دتی سی اوہناں نے ای عمران خان نوں (ق) لیگ دے بندے توڑ کے دتے کہ ہن تسیں وی کجھ دن حکمرانی دا شوق پورا کر لوو۔ ایہناں ساریاں دے شوق پورے ہوئے نیں۔ ایم ایم اے نے جنرل مشرف دے نال رل کے شوق پورا کیتا زرداری گیلانی نے جنرل کیانی دے نال رل کے پنج ورھے پورے کر لئے ہن عمران خان نے وی اوہی راستہ چنیا اے۔ نوازشریف اقتدار وچ ڈیل نہ لے سکے سن تے اوہناں نے ہن لے لئی۔ اوہناں دے حامی مفت وچ پریشان تے افسردہ نیں۔ پاکستانی سیاستدان ڈیل تے ڈھیل دے بغیر نہیں چل سکدے۔ ایہ سب اوس ویلے تک وردی دے خلاف نیں جدوں تک ایہ اوہناں نوں کوئی ڈیل دے کے اقتدار وچ نہیں لیاندی یاں ڈھیل دے کے باہر نہیں گھل دیندی بھانویں بے نظیر بھٹو زرداری نوازشریف یاں ہن عمران خان ہون۔ سب جماعتاں دے ارکان نوں قومی اسمبلی وچ چنگے بچے بنے ویکھ کے یاد آیا کالج وچ سانوں این سی سی دی تربیت کرائی جاندی سی۔ بہت سارے رائٹ لیفٹ ٹرن تے اباوٹ ٹرن دے بعد اک اُچی آواز وچ عسکری آرڈر آندا سی جیسے تھے۔ مطلب دوبارہ اوسے پوزیشن تے چلے جان جتھوں شروع کیتا سی۔ پیپلزپارٹی تے نواز لیگ وی دوبارہ اوتھے جا کھڑی ہوئیاں نیں جتھوں شروع کیتا یس۔صرف اک حکم آن دی دیر سی…جیسے تھے!